Last updated on August 30th, 2024 at 05:35 pm
ಬೊಲ್ತೇರ್ ತಾಲೂಕ್‌ದ ಉಜಿರೆದಲ್ಪ ನಡತಿತ್ತಿನ ವಿದ್ಯಾರ್ಥಿನಿ ಸೌಜನ್ಯಾನ ಸಾಮೂಹಿಕ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣೊಗು ಸಂಬಂಧಿತ್‌ದ್ ಸಂದಾದಿತ್ತಿನ ಮೂಜಿ ಅರ್ಜಿಲೆನ್ಲಾ ಕರ್ನಾಟಕ ಹೈಕೋರ್ಟ್ ವಜಾ ಮಲ್ದ್ಂಡ್. ಈ ಮುಕೇನ ಸೌಜನ್ಯ ಪ್ರಕರಣೊದ ಪಿರ ಜಡ್ತೆದ ಅವಕಾಶೊಲು ಕಮ್ಮಿ ಆತ. ಅವ್ವೇ ಪೊರ್ತುಡು ಸಂತೋಷ್ ರಾವ್ ನಿರಪರಾಧಿ ಪನ್ಪಿನ ದುಂಬುದ ತೀರ್ಪುನು ಹೈ ಕೋರ್ಟ್ ದೆರ್ತ್ ಪತ್ತ್‌ದ್ಂಡ್.
ನ್ಯಾಯಮೂರ್ತಿಲಾಯಿನ ಶ್ರೀನಿವಾಸ್ ಹರೀಶ್ ಕುಮಾರ್ ಬೊಕ್ಕ ಜೆ ಎಂ ಖಾಜಿ ಮೊಕಲೆನ ವಿಭಾಗೀಯ ಪೀಠ ಈ ಆದೇಶೊನು ಆ. 30 ದಾನಿ ಕೊರ್ತುಂಡು. ಈ ಮುಕೇನ ಸೌಜನ್ಯಾನ್ ಕೆರ್ತಿನ ಏರ್ ಪನ್ಪಿನ ಪ್ರಶ್ನೆ ಹೈ ಕೋರ್ಟ್ ತೀರ್ಪುದ ಬೊಕ್ಕಲಾ ಅಂಚೆನೇ ಒರಿದ್ಂಡ್.
ಈ ಪ್ರಕರಣೊಡು ಅಪಗ ಕೈದಾದಿತ್ತಿನ ಸಂತೋಷ್ ರಾವ್‌ನ ವಿರುದ್ಧ ಬೋಡಾಪಿನ ಸಾಕ್ಷ್ಯಧಾರೊಲು ಇಜ್ಜ ಪಂಡ್‌ದ್ ಆರೆನ್ 2023ತ ಜೂನ್ 16ತಾನಿ ಸಿಬಿಐ ಕೋರ್ಟ್ ಬುಡುಗಡೆ ಮಲ್ತಿತ್ತ್ಂಡ್.
ಸಿಬಿಐ ಕೋರ್ಟ್‌ದ ತೀರ್ಪುರ್ದ್ ಬೊಕ್ಕ ಪ್ರಕರಣೊದ ಪಿರ ಜಡ್ತೆ ಆವೊಡು ಪಂಡ್‌ದ್ ಸೌಜನ್ಯಾನ ಅಮ್ಮೆರ್, ಚಂದಪ್ಪ ಗೌಡೆರ್ ಅರ್ಜಿ ಪಾಡ್ದಿತ್ತೆರ್ . ಅವೆನ್ ಕರ್ನಾಟಕ ಹೈಕೋರ್ಟ್ ಇನಿ ವಜಾ ಮಲ್ದ್ಂಡ್. ಒಟ್ಟುಗು ಸಿಬಿಐ ವಿಶೇಷ ಜೋಕುಲೆನ ನ್ಯಾಯಂತಡೆದ ಆದೇಶೊನು ಬರಿಕ್ ದೀದ್, ಸಂತೋಷ್ ರಾವ್‌ನೇ ಆರೋಪಿಯಾದ್ ಪರಿಗಣನೆ ಮನ್ಪೊಡೂಂದ್ ಕೇಂದ್ ಸಿಬಿಐ ಸಂದಾದಿನ ಅರ್ಜಿನ್ಲಾ ಕರ್ನಾಟಕ ಹೈಕೋರ್ಟ್ ವಜಾ ಮಲ್ದ್ಂಡ್.
ಈ ಪ್ರಕರಣೊಡು ಆರೋಪಿ ಆದಿತ್ತಿನ ಸಂತೋಷ್ ರಾವ್‌ನ್ ಕೇಂದ್ರೀಯ ತನಿಖಾ ದಳೊದ (ಸಿಬಿಐ) ವಿಶೇಷ ಜೋಕುಲೆನ ನ್ಯಾಯಂತಡೆ ನಿರ್ದೋಷಿ ಪಂದ್ ಪಂಡಿ ಬೊಕ್ಕ ಅವೆನ್ ಪ್ರಶ್ನೆ ಮಲ್ತ್‌ದ್ ಸಿಬಿಐ ಅರ್ಜಿ ಪಾಡ್ದಿತ್ತ್‌ದ್, ಐಪಿಸಿ ಸೆಕ್ಷನ್ 302 (ಕೊಲೆ) ಬೊಕ್ಕ 376 (ಅತ್ಯಾಚಾರ) ಆರೋಪೊದ ಅಡಿಟ್ ಸಂತೋಷ್ ರಾವ್‌ನ್ ದೋಷಿ ಪಂದ್ ಆದೇಶ ಕೊರೊಡು ಪಂದ್ ಕೇಂದಿತ್ತ್ಂಡ್.
ವಿಚಾರಣಾಧೀನ ನ್ಯಾಯಂತಡೆಟ್ ಬುಡುಗಡೆ ಆತಿನ ಸಂತೋಷ್ ರಾವ್, ಸೌಜನ್ಯ ಅತ್ಯಾಚಾರ ಬೊಕ್ಕ ಕೊಲೆ ಪ್ರಕರಣೊದ ಕುಡೊರ ಜಡ್ತೆ ಮಲ್ತ್‌ದ್ ನಿಜ ಆರೋಪಿಲೆನ್ ಪತ್ತೆರೆ ಚೆನ್ನೈದ ಸಿಬಿಐಗ್ ಕೊರೊಡು ಪಂಡ್‌ದ್ ಅರ್ಜಿ ಪಾಡ್ದಿತ್ತೆರ್. ಅವುಲಾ ವಜಾ ಆತ್ಂಡ್. ಅವೆತ ಒಟ್ಟುಗು ಅಕ್ರಮ ಬಂಧನೊಗು ಪರಿಹಾರ ಕೇಂದ್ ಸಂತೋಷ್ ರಾವ್ ಪಾಡ್ದಿತ್ತಿನ ಅರ್ಜಿನ್ಲಾ ವಜಾ ಮಲ್ದೆರ್.