Last updated on September 1st, 2024 at 11:31 am
ಒಡಿಪು: ಜಿಲ್ಲೆಡ್ ಜೂನ್‌ 1ರ್ದ್ ಆ.29ರ ಮುಟ್ಟ ದೊರಿನ ಗಾಲಿ ಬರ್ಸ, ಅವೆರ್ದಾವರ ಉಂಡಾತಿನ ಬೊಲ್ಲರ್ದ್ ಇಲ್ಲ್, ಸಾದಿ, ಟ್ರಾನ್ಸ್‌ಫಾರ್ಮರ್‌ ಹಾನಿ ಮಾತಾ ಸೇರ್ದ್ ಸುಮಾರ್ 234.58 ಕೋ.ರೂ. ನಷ್ಟ ಆತ್ಂಡ್. ಆಂಡ ರಾಜ್ಯ ಸರಕಾರೊರ್ದ್ ಇದಮುಟ್ಟ ಒಂಜಿ ಪೈಸೆದ ಪರಿಹಾರ ಬೈದಿಜಿ. ಜಿಲ್ಲಾಧಿಕಾರಿ/ ತಹಶೀಲ್ದಾರ್‌ ಪಿ.ಡಿ. ಖಾತೆ‌ಡ್ ಉಪ್ಪುನ ಸುಮಾರ್ 16 ಕೋ.ರೂ.ನ್ ಎಮರ್ಜೆನ್ಸಿ ರಿಲೀಫ್‌ಗ್ ಮಾತ್ರ ಗಲಸೊಂದುಲ್ಲೆರ್.
ಜಿಲ್ಲೆಯ 7 ತಾಲೂಕ್‌ಲೆಡ್ ರಡ್ಡ್ ತಿಂಗೊಲುಡು ಗಾಳಿ ಬರ್ಸೊಡು 38 ಇಲ್ಲ್‌ಲ್ ಅಲಕ್ಕ ತೆಟ್ಟ್‌ದಿತ್ತ್‌ದ್, 796 ಇಲ್ಲ್‌ಲೆಗ್ ಭಾಗಶಃ ಹಾನಿ ಆತ್ಂಡ್. ಇಂಚಿನ ಇಲ್ಲ್‌ಲೆನ ವರದಿನ್ ಅಲ್ಪದ ಪಂಚಾಯತಿ, ತಹಶೀಲ್ದಾರ್‌ ಮುಕೇನ ರಾಜ್ಯ ಕಚೇರಿಗ್ ಎತ್ತಾದಿತ್ತ್ಂಡಲಾ ಪರಿಹಾರ ನನಲಾ ಬೈದಿಜಿ. ಗುಡ್ಡೆ ಜರಿದ್, ತೆಡಿಲ್ ಆಕ್‌ದ್ 3 ಜೂವ ಪೋದಿತ್ತ್‌ದ್, ಪ್ರತಿ ಇಲ್ಲದಕ್ಲೆಗ್ಲಾ 5 ಲಕ್ಷ ರೂ. ಪರಿಹಾರ ಕೊರ್ತುಂಡು. 5 ಕೈಕಂಜಿಲೆ ಜೂವ ಪೋದಿತ್ತ್‌ದ್, ಒಟ್ಟಾರೆ 1.55 ಲಕ್ಷ ರೂ. ಪರಿಹಾರ ಕೊರ್ತುಂಡು.
ಏತೇತ್ ಹಾನಿ?
ರಾಜ್ಯ ಪೆರ್ಸಾದಿ, ಪೇಂಟೆದ ಸಾದಿಲು, ಜಿಲ್ಲೆದ ಮುಖ್ಯ ಸಾದಿಲು, ಗ್ರಾಮೀಣ ಸಾದಿಲು ಸೇರ್ದ್ 1,457.36 ಕಿ.ಮೀ. ಸಾದಿ ಜಿಲ್ಲೆಡ್ ತೆಟ್ಟ್‌ದ್ ಪೋತುಂಡು. ಉಂದೆರ್ದೇ ಸುಮಾರ್ 171.62 ಕೋ.ರೂ. ನಷ್ಟ ಆತ್ಂಡ್ ಪಂದ್ ಅಂದಾಜಿ ಮಲ್ದೆರ್. ಕಂಡಿ ಅಣೆಕಟ್ಟ, ಸಂಕ, ಮೋರಿ ಇಂಚಿನ ಸೇರ್ದ್ 132ಕ್ ಹಾನಿ ಆದಿತ್ತ್‌ದ್, 53.25 ಕೋ.ರೂ. ನಷ್ಟ ಆತ್ಂಡ್.
4,125 ಕರೆಂಟ್ ಕುಂದೊಲು, 2 ಟ್ರಾನ್ಸ್‌ಫಾರ್ಮರ್‌, 72.35 ಕಿ.ಮೀ. ಕರೆಂಟ್ ಲೇನ್‌ ತೆಟ್ಟ್‌ದ್ ಸುಮಾರ್ 7 ಕೋ.ರೂ. ನಷ್ಟ ಆತ್ಂಡ್. ಪ್ರಾಥಮಿಕ ಶಾಲೆ, ಸರಕಾರಿ ಕಟ್ವಾನ, ಸಮುದಾಯ ಆರೋಗ್ಯ ಕೇಂದ್ರ, ಪ್ರಾಥಮಿಕ ಆರೋಗ್ಯ ಕೇಂದ್ರ, ಅಂಗನವಾಡಿ ಕಟ್ವಾನ ಸೇರ್ದ್ 116 ಕಟ್ವಾನೊಲೆಗ್ ಹಾನಿ ಆದಿತ್ತ್‌ದ್, 2.16 ಕೋ.ರೂ. ನಷ್ಟ ಅಂದಾಜಿ ಮಲ್ದೆರ್.