Last updated on September 13th, 2024 at 06:11 pm
ತುಳುನಾಡ್‌ಡ್ ತುಳು ಚಳವಳಿನ್ ಸುರು ಮಲ್ತಿನಾರ್, ತುಳು ಸಾಹಿತ್ಯೊದ ಬುಳೆಚಿಲ್‌ಗ್ ಬೋಡಾದ್ ವ್ಯಾಕರಣ, ಕಾದಂಬರಿ ಬರೆಯಿನಾರ್, ತನ್ನ ಒಟ್ಟುಗು ಇತ್ತಿನಕುಲೆಡ ತುಳುಟು ಬರೆಪಾದ್ ತನ್ನ ತುಳು ಸಾಹಿತ್ಯಮಾಲೆಡ್ ಅಚ್ಚಿ ಮಲ್ಪಾಯಿನಾರ್. ತುಳು ಬಾಸೆ ಸಾಹಿತ್ಯೊದ ಬುಳೆಚಿಲ್‌ಗ್ ಬೋಡಾದ್ ತನ್ನ ಸರ್ವಸ್ವೊನು ಕಳೆವೊನ್ದಿನಾರ್ ಒಡಿಪುದ ಪಣಿಯಾಡಿ ಶ್ರೀನಿವಾಸ ಉಪಾಧ್ಯೆರ್(ಎಸ್. ಯು. ಪಣಿಯಾಡಿಯೆರ್)
ಪಣಿಯಾಡಿದಾರ್ ಸ್ವಾತಂತ್ರ್ಯ ಚಳವಳತ್ತ ಒಟ್ಟುಗೇ ತುಳು ಚಳವಳ ಸುರುಮಲ್ತಿನಾರ್. ತುಳು ಸಾಹಿತ್ಯ ಮಾಲೆ, ತುಳುನಾಡ್ ಪ್ರೆಸ್, ತುಳು ಕಾದಂಬರಿ, ವ್ಯಾಕರಣ ಬರೆದಿನಿ – ಇಂಚ ಆರ್ ತುಳುಕು ಬೋಡಾದ್ ಮಲ್ತಿನ ಬೇಲೆ ಒಂಜಿ ರಡ್ಡತ್. ಸ್ವದೇಶಿ ಚಳವಳತ್ತ ಪುದರ್‌ಡ್ ಆರ್ ಸುರುಮಲ್ತಿನ ಬ್ಯಾಂಕ್ – ತುಳುನಾಡ್ ಬ್ಯಾಂಕ್. ಆರ್ ಪ್ರಕಟ ಮಲ್ತೊಂದಿತ್ತಿನ ‘ಅಂತರಂಗ’ ಕನ್ನಡ ಪತ್ರಿಕೋದ್ಯಮೊಡು ಮಸ್ತ್ ಪುದರ್ ಮಲ್ದಿನ ಒಂಜಿ ಎಡ್ಡೆ ಪತ್ರಿಕೆ ಆದಿತ್ತ್ಂಡ್. ಪಣಿಯಾಡಿದಾರೆನ ಬದ್ಕ್‌ದ ಕತೆ- ಸ್ವಾತಂತ್ರ್ಯ ಬೊಕ್ಕ ತುಳು ಚಳವಳೊಕು ಬೋಡಾದ್ ತನ್ನ ಇಲ್ಲ್ ಬದ್ಕ್ ಪೂರಾ ಕಲೆವೊಂದಿನ ಒರಿ ಎಡ್ಡೆ ಜನತ್ತ ಸೋಲ್-ಗೇಲ್‌ ಕತೆ, ಮಲ್ಲಾದಿಗೆದ ಕತೆ. “ಗೇಲಿತ್ತಿನವುಲು ಪೋಡಿಗೆ ಇಜ್ಜಿ”ಂದ್ ಗಾದೆ. ಸೋಲ್ ಇತ್ತ್ಂಡಲಾ ಪೋಡಿಗೆ ಇಜ್ಜಿ ಪಣ್ಪಿನ ಜನ ಪಣಿಯಾಡಿದಾರ್.
ವಾದಿರಾಜ ಉಪಾಧ್ಯ-ಯಮುನಾ ದಂಪತಿಲೆನ ಕಿಞ್ಞ ಮಗೆ ಆದ್ ಎಸ್. ಯು. ಪಣಿಯಾಡಿ(ಶ್ರೀನಿವಾಸ ಉಪಾಧ್ಯೆರ್) 1897ನೇ ವರ್ಸೊದ ಎಪ್ರಿಲ್ 4 ಪೋಪಿನಾನಿ ಪುಟ್ಟಿಯೆರ್.
1928ಡ್ ತುಳುವ ಮಹಾಸಭೆನ್ ಉಂಡು ಮಲ್ತ್‌ದ್ ಸಾಹಿತ್ಯೊದ ಒಟ್ಟುಗು ತುಳುತ ಬೇತೆ ಮರ್ಗಿಲ್‌ಲೆನ್ ಗಟ್ಟಿ ಮನ್ಪುನ ಬೇಲೆಗ್ ಜತ್ತೆರ್. ದಕ್ಷಿಣ ಕನ್ನಡ ಜಿಲ್ಲೆದ 1931ತ ಜಿಲ್ಲಾ ಪರಿಷತ್ ಸಭೆಟ್ ಪಣಿಯಾಡಿದಾರ್ ಜಿಲ್ಲೆದ ಪುದರ್‌ನ್ ‘ತುಳುನಾಡ್’ಂದ್ ದೀವೊಡುಂದು ಠರಾವು ಮಂಡನೆ ಮಲ್ತಿತ್ತೆರ್.
ತುಳುತೊಟ್ಟುಗು ದೇಶೊದ ತನ್ನಾಲ್ಮೆಗ್ ಪೊರ್ಮ್ಬೊಂದಿತ್ತಿನ ‘ಕೆಂಪಂಗಿದಾರ್’ ಕರ್ಪಿಲ್ಲ್‌ಗ್ಲಾ ಪೋದು ಬತ್ತ್‌ದೆರ್. ವೆಲ್ಲೂರುದ ಕರ್ಪಿಲ್ಲ್‌ಡ್ ಇಪ್ಪುನಗ ತುಳು ವ್ಯಾಕರಣೊನು ಬರೆಯೆರ್.
ಪಣಿಯಾಡಿದಾರೆನ ಈ ವ್ಯಾಕರಣೊದ ಬೂಕುಡು ವರ್ಣ, ಸಂಧಿ, ಶಬ್ದ, ಕಾರಕ, ಸ್ತ್ರೀಪ್ರತ್ಯಯ, ಸಮಾಸ, ನಾಮಜ, ಕ್ರಿಯಾಪದ, ಧಾತು, ಧಾತುಜ, ಅವ್ಯಯ, ವಿಶೇಷ ವಿಚಾರ – ಇಂಚ ಪದ್ರಾಡ್ ಭಾಗೊಲು ಉಲ್ಲ. ಪಣಿಯಾಡಿದಾರ್ ತದ್ಧಿತ ಪ್ರಕರಣೊಗು ‘ನಾಮಜಪ’ಣ್ದ್ ಕೃದಂತೊಗ್ ‘ಧಾತುಜ’ ಪಣ್ದ್ ಪುದರ್ ದೀತೆರ್. ‘ಧಾತು’ ಪ್ರಕರಣೊಡು ಸಾರತ್ತ ಇರ್ನೂದು ಧಾತುಲೆನ ಧಾತುಪಾಠ ಕೊರ್ತೆರ್. ಪ್ರತ್ಯಯೊಲೆನ ರೂಪ ತೋಜಾನಗ ಆರ್ ಬ್ರಾಣೆರೆನ ತುಳು, ಸಾಮಾನ್ಯ ತುಳು ರಡ್ಡೆಟ್ಲಾ ಉದಾರ್ಮೆ ಕೊರ್ತೆರ್.
ವಿಭಕ್ತಿ ಪ್ರಕರಣೆಡು ಉದಾರ್ಮೆ ಕೊರಿನ ವಾಕ್ಯೊಲೆನ್ ತೂನಗ ಪಣಿಯಾಡಿದಾರೆನ ಸ್ವಾತಂತ್ರ್ಯ ಚಳವಳ, ತುಳು ಚಳವಳ ನಿನೆಪಾವುಂಡು.
1. ಒಂಜನೆ ವಿಭಕ್ತಿ – ‘ತುಳುನಾಡ್‌ನ್ ಕನ್ನಡ ಮಳ್ತೆರ್’ (ದುಂಬುದಾಂತಿ ವಿಶೇಷಣ)
2. ರಡ್ಡನೆ ವಿಭಕ್ತಿ – ಕ್ರಿಯೆತ ಕರ್ಮೊನು ತೋಜಿಪಾವೆರೆಗ್ ಈ ವಿಭಕ್ತಿನ್ ಗವಸುವೆರ್ – ‘ತುಳು ವರಸುಳು ವಿಜಯನಗರನ್ ಆಳ್ದೆರ್‌’
3. ಮೂಜನೆ ವಿಭಕ್ತಿ – ಕರಣೊನ್ ತೋಜಿಪಾವರೆಗ್ ಈ ವಿಭಕ್ತಿನ್ ಗಲಸುವೆರ್ – ‘ತುಳುವೆರೆ ಆಲಸ್ಯಡ್ದ್ ತುಳುನಾಡ್ ಹಾಳಾಂಡ್’.
ಇಂಚ ತುಳುತ ಅಪಗದ(ಇತ್ತೆಗ್ಲಾ ಪ್ರಸ್ತುತ) ಸ್ಥಿತಿತ ಉದಾರ್ಮೆಲೆನ್ ಕೊರೊಂದು ಪೋತೆರ್.
ಸತೀ ಕಮಲೆ – ಉಂದು ಪಣಿಯಾಡಿದಾರ್ ಗುಜರಾತ್‌ದ ಬರೋಡಾಡ್ ಇಪ್ಪುನಗ ಬರೆತೀನ ಕಾದಂಬರಿ.
ತುಳುತನಯ ಕಾವ್ಯನಾಮೊಡು ಬರೆವೊಂದಿತ್ತಿನ ಪಣಿಯಾಡಿದಾರೆನ್, ತುಳುಕು ಬೋಡಾದ್ ಆರ್ ಬತ್ತಿನ ಬಂಙ, ಮಲ್ದಿನ ತ್ಯಾಗೊನು ತುಳುವೆರಾಯಿನ ನಮ ಏತ್ ನೆಂಪು ಮಲ್ತೊಂಡಲಾ ಕಮ್ಮಿಯೇ.
1950ಡ್ ಊರ್‌ಡ್ ನಷ್ಟ ಆದ್ ಮದ್ರಾಸ್‌ಗ್ ಒಕ್ಕೆಲ್ ಪೋದು ಅಲ್ಪನೇ ಕುಲ್ಲಿನ ಪಣಿಯಾಡಿದಾರ್ ಬೊಕ್ಕ ಊರ್‌ದಂಚಿ ಬತ್ತಿನೇ ಇಜ್ಜಿ. 1959 ನೇ ವರ್ಸೊಡು ಸಪ್ಟೆಂಬರ್ 13ನೇತಾನಿ ಎಸ್. ಯು ಪಣಿಯಾಡಿಯೆರ್ ತೀರ್ದ್ ಪೋಯೆರ್.
ಪಣಿಯಾಡಿದಾರೆನ ಬಗೆಟ್ ನನಲಾತ್ ತೆರಿಯೊನೆರೆ ತಿರ್ತ್‌ದ ಲಿಂಕ್‌ನ್ ಒತ್ತುಲೆ
https://archive.org/details/dli.language.1857