Last updated on September 17th, 2024 at 09:16 am
ಕುಡ್ಲ: ಮಂಗಳಮುಖಿಲೆನ ಬೇನೆ್-ಬೆಸರ್-ಬದ್‌‌ಕ್‌ನ್ ತೂಪಾವುನ ಒಂಜಾತ್ ಸಿನಿಮಾಲು ದುಂಬೇ ಬತ್ತ್‌ದ. ಈ ಚಿತ್ರೊಲೆಡ್ ಮಂಗಳಮುಖಿಲೆನ ಪಾತ್ರೊನು ಆಂಜೊವುಲು ಮಲ್ಪೆದೆರ್. ಆಂಡ ಉಂದುವೇ ಕಡೀರ ಸರ್ತಿ ಮಂಗಳಮುಖಿಯೆರೆ ಕಥೆ್ ಪನ್ಪುನ ‘ಶಿವಲೀಲಾ’ಡ್ ಮಂಗಳಮುಖಿಯೆರೇ ಪ್ರಧಾನ ಪಾತ್ರೊಡು ಇಪ್ಪೆರಗುಲ್ಲೆರ್.
ಮಂಗಳಮುಖಿನಕುಲೆನ್ ಸಮಾಜ ತಾತ್ಸಾರೊಡು ತೂಪುಂಡು. ಅಕುಲೆನ್ ನಾಗರಿಕ ಸಮಾಜ ತನ್ಕುಲೆಡ್ ಒರಿ ಪಂದ್ ಸ್ವೀಕರಿಪಂದೇ ದೂರೊನೇ ದೀತ್ಂಡ್. ಈ ನೆವನೊಲೆರ್ದಾವರ ಎಚ್ಚಿನ ಮಂಗಳಮುಖಿನಕುಲು ಕೂಪೆ್ ಕೂಪೆ್ ಆದ್ ನಾಗರಿಕ ಸಮಾಜರ್ದ್ ದೂರೊಡು ವಾಸ ಮಲ್ತೊಂದುಪ್ಪುವೆರ್. ಮಂಗಳಮುಖಿನಕುಲು ಬರ್ಪಿನ ಬಂಙ ಏರೆಗ್ಲಾ ತೆರಿದಿಜಿ. ಮೊಕ್ಲೆನ ಬೇನೆ್-ಬೆಸರ್‌ನ್ ತೂಪಾವುನ, ಮಂಗಳಮುಖಿನಕುಲೇ ಪ್ರಧಾನಪಾತ್ರೊಡುಪ್ಪುನ ‘ಶಿವಲೀಲಾ’ ಸಿನಿಮಾದ ಶೂಟಿಂಗ್ ಜೋರುಡೇ ಆವೊಂದೂಂಡು.
ಎಚ್ಚಿನ ಶೂಟಿಂಗ್ ಆದ್ ಆತ್ಂಡ್: ಕುಡ್ಲ, ಬೆಂಗಳೂರು, ತುಮಕೂರು, ಹೊಸಪೇಟೆಡ್ ಈ ಸಿನೆಮಾದ ಶೂಟಿಂಗ್ ನಡತೊಂದುಂಡು. ಅಕ್ಲೆನ ಬದ್‌ಕ್, ಜೋಕುಲಾಟಿಗೆದ ಪೊರ್ತುಡು ಬೈದಿನ ಬಂಙ, ಸಮಾಜೊದ ತಾತ್ಸಾರೊಲೆನ್ ಈ ಸಿನಿಮಾಡ್ ತೋಜಾವೊಂದುಲ್ಲೆರ್. ಅಶೋಕ್ ಜಯರಾಮ್ ಮೇರ್ ‘ಶಿವಲೀಲಾ’ ಡೈರೆಕ್ಷನ್‌ದ ಒಟ್ಟುಗು ಪ್ರೊಡಕ್ಷನ್‌ದ ಜಬದ್ದರಿನ್ಲಾ ಗೆತೊಂದೆರ್.
ಕೊ-ಪ್ರೊಡ್ಯೂಸರ್ ಆಯಿನ ಸುರುತ ಮಂಗಳಮುಖಿ: ಅನಿ ಕುಡ್ಲ ಈ ಚಿತ್ರೊದ ಸಹ ನಿರ್ಮಾಪಕೆರ್. ಸಹ ನಿರ್ಮಾಣೊದ ಜಬದ್ದರಿ ಗೆತೊಂದಿನ ಸುರುತ ಮಂಗಳಮುಖಿ. ಈತ್‌‌ನೇಟ ದೇಶೊಡು ಮಂಗಳಮುಖಿಯೆರ್ ಸಿನಿಮಾ ಕೋ ಪ್ರೊಡ್ಯೂಸರ್ ಆದಿಜ್ಜಂಡ್. ಈ ‘ಶಿವಲೀಲಾ’ ಸಿನಿಮಾದ ಮುಕೇನ ಅನಿ ಕುಡ್ಲ ದೇಶೊದ ಸುರೂತ ಮಂಗಳಮುಖಿ ಕೋ ಪ್ರೊಡ್ಯೂಸರ್ ಆತೆರ್.
ಪ್ಯಾನ್ ಇಂಡಿಯಾ ಸಿನಿಮಾ: ಕನ್ನಡೊಡು ಆವೊಂದುಪ್ಪುನ ಈ ಸಿನಿಮಾ ಆಜಿ ಭಾಷೆಲೆಡ್ ಪರದೆದ ಮಿತ್ತ್ ಬರ್ರೆ್ ಉಂಡು. ತುಳು, ಮಲಯಾಳಂ, ತಮಿಳ್, ಹಿಂದಿ, ತೆಲುಗು ಭಾಷೆಲೆಗ್ ಈ ಸಿನಿಮಾ ಡಬ್ ಆವರೆ ಉಂಡು.
ಸೋಷಿಯಲ್ ಮೀಡಿಯಾ ಇನ್ಪ್ಲುಯೆನ್ಸರ್, ರೀಲ್ಸ್‌ಲೆಡೇ ಪುಗರ್ತೆ ಪಡೆತಿನ ದಚ್ಚು ದಿವು ಈ ಸಿನಿಮಾಡ್ ನಾಯಕ ನಟೆ ಆದುಲ್ಲೆರ್.
ಜೋಗತಿ ಮಂಜಮ್ಮ ಸೇರ್ದ್ 2,000 ಮಂಗಳಮುಖಿಯೆರೆ ಪಾತ್ರ: ಈ ಸಿನಿಮಾಡ್ ಮಂಗಳಮುಖಿ, ಪದ್ಮಶ್ರೀ ಪುರಸ್ಕೃತೆರಾಯಿನ ಜೋಗತಿ ಮಂಜಮ್ಮ ಸೇರ್ದ್ ಪಾಕ ಜನ ತೃತೀಯಲಿಂಗಿಲು ಮೈನ್ ರೋಲ್‌ಡ್ ಉಲ್ಲೆರ್. ವಿಲನ್ ಪಾತ್ರೊನು ರಾಶಿ ಪನ್ಪಿನ ಮಂಗಳಮುಖಿ ಮಲ್ದೆರ್. ಒಟ್ಟು 2 ಸಾರ ಮಂಗಳಮುಖಿನಕುಲು ನಟನೆ್ ಮಲ್ತೊಂದುಪ್ಪುನವು ಕುಡೊಂಜಿ ಇಸೇಸ.
ಸಮಾಜೊರ್ದು ದೂರೊನೇ ಇಪ್ಪುನ ಮಂಗಳಮುಖಿಯೆರೇ ನಟನೆ ಮಲ್ದಿನ, ಅಕ್ಲೆನ ಬೇನೆ್-ಬೆಸರ್‌ನ್ ಪನ್ಪುನ ಈ ಸಿನಿಮಾ ಅಕ್ಲೆನ ಬಗೆತ ಭಾವನೆಲೆನ್ ಪರಿಮಾರ್ಪುಂಡಾ? ಪನ್ಪಿನೆನ್ ಕಾತ್‌ದ್ ತೂವೊಡಾತೆ.