Last updated on September 24th, 2024 at 08:43 am
ಬಿ.ಸಿ.ರೋಡ್-ಪುಂಜಾಲಕಟ್ಟೆ ಪೆರ್ಸಾದಿದ ವಗ್ಗ ಮುಟ್ಟದ ಕೊಪ್ಪಳ ದಲ್ಪ ಕುಡುಮರ್ದ್ ಕುಡ್ಲಗ್ ಪೋವೊಂದಿತ್ತಿನ ಕೆಎಸ್‌ಆರ್‌ಟಿಸಿ ಬಸ್ ಒಂಜಿ ಡ್ರೈವರ್‌ನ ಅಂಕೆ ತತ್ತ್‌ದ್ ಪೆರ್ಸಾದಿದ ಬರಿತ ಕಣಿಕ್ ಪೊರೆಲ್ದ್ ಬೂರ್ದಿನ ನಡಕೆ ಕೋಡೆ ಬಯ್ಯಡ್ ನಡತ್‌ದ್ಂಡ್.
ಬಸ್‌ಡ್ ಸುಮಾರ್ 50 ಜನ ಇತ್ತ್‌ದ್, 13 ಜನೊಕು ಗಡಿಕುಲಾತ. ಪೆಟ್ಟಾತಿನಕಲೆನ್ ಬಂಟ್ಸವಾಳ ರಕಾರಿ ಆಸ್ಪತ್ರೆಗ್ ಸೇರಾದಿತ್ತ್‌ದ್, ತರೆ ಬೊಕ್ಕ ಬೆರಿಮುಲ್ಲುಗು ಪೆಟ್ಟಾತಿನ ತನುಶ್ರೀ(17), ಶಾಕೀರ್ (32), ಕಸ್ತೂರಿ(68) , ಶೋಭಾ ಶೆಟ್ಟಿ(48), ಬೊಕ್ಕ ವಿಶ್ವನಾಥ(70) ಮೊಕಲೆನ್ ಕುಡ್ಲದ ಆಸ್ಪತ್ರೆಗ್ ಸೆರಾದ್ಂಡ್.
ಕಿಞ ಕಿಞ ಗಡಿಕುಲಾತಿನ ಪವನ್(30), ನಿಖೀತ(29), ಸುಧಾಮ(23), ಹೇಮಾವತಿ(43), ರಾಜಶ್ರೀ (27), ಹೇಮಲತಾ(40), ಶಿಲ್ಪಾ(16) ಹಾಗೂ ಸ್ವಾತಿ(16) ಮರ್ದ್ ಗೆತೊಂದು ಇಲ್ಲಗ್ ಪೋತೆರ್ ಪಂದ್ ಬಂಟ್ವಾಳ ಆಸ್ಪತ್ರೆದ ಮೂಲೊಲು ತೆರಿಪಾದ.
ಬಸ್ಸ್ ಅಲಕ್ಕ ಮಗ್‌ರ್ದ್ ಬೂರ್ದಿನೆರ್ದಾವರ ಅವೆತುಲಯಿ ಇತ್ತಿನ ಪ್ರಯಾಣಿಕೆರೆಗ್ ಪಿದಯಿ ಬರ್ಯೆರೆ ಆವಂದೆ ಇತ್ತ್‌ದ್, ಬೊಕ್ಕ ಮುಟ್ಟಡೆ ಇತ್ತಿನಕಲೆನ ಸಕಾಯೊರ್ದು ಪ್ರಯಾಣಿಕೆರ್ ಪಿದಯಿ ಬತ್ತೆರ್.
ಬಸ್ ಬರಸ್‌ಡ್ ಪೋವೊಂದಿತ್ತ್‌ದ್ ಈ ಪೊರ್ತುಡು ಒವ್ವಾ ಗಾಡಿ ಅಡ್ಡ ಬತ್ತ್ಂಡ್ ಪಂದ್ ಡ್ರೈವರ್ ಬ್ರೇಕ್ ಪಾಡ್ದಿತ್ತ್‌ದ್, ಬಸ್ ಒರರ್ದ್ ಒರಾನೆ ಪೆರ್ಸಾದಿದ ಬರಿಕ್ ಪೋದು ಪಲ್ಟಿ ಆತ್ಂಡ್ ಪಂದ್ ಬಸ್ ಡ್ರೈವರ್ ಪಂತೆರ್ ಪಂದ್ ಟ್ರಾಫಿಕ್ ಪೊಲೀಸೆರ್ ತೆರಿಪಾದೆರ್. ಬಸ್‌ದ ಟಯರ್ ತರೆದ್ ಬ್ರೇಕ್ ತಿಕ್ಕಂದೆ ಬಸ್ ಪಲ್ಟಿಯಾತ್ಂಡ್ ಪಂದ್ ತೂಯಿನ ಒಂಜಾತ್ ಜನ ಆರೋಪ ಮಲ್ದೆರ್. ಆಂಡ ನಡಕೆಗ್ ಪತ್ತ ನೆವನ ತೆರಿದ್ ಬೈದಿಜಿ.
ಜಾಗೆಗ್ ಬಂಟ್ವಾಳ ಟ್ರಾಫಿಕ್ ಸ್ಟೇಷನ್ ಪಿಎಸ್‌ಐ ಸುತೇಶ್ ಕೆ.ಪಿ. ಭೇಟಿ ಕೊರ್ದು ಪರಿಶೀಲನೆ ಮಲ್ತಿತ್ತ್‌ದ್, ಬೊಕ್ಕ ಕ್ರೇನ್‌ದ ಮುಕೇನ ಬಸ್‌ನ್ ಕಣಿರ್ದ್ ಪಿದಯಿ ದೆತ್ತೆರ್
ನಡಕೆದ ಬಗೆಟ್ ಬಂಟ್ವಾಳ ಟ್ರಾಫಿಕ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.