Last updated on September 25th, 2024 at 02:49 pm
ರಾಮಕುಂಜ: ಪುತ್ತೂರ್ರ್ದ್ ಕುಡ್ಲಗ್ ಪೋವೊಂದಿತ್ತಿನ ಆಂಬುಲೆನ್ಸ್ ಕುಡ್ಲದ ಪಡೀಲ್ದಲ್ಪ ಪಲ್ಟಿಯಾದ್ ಆಂಬುಲೆನ್ಸ್ಡ್ ಇತ್ತಿನ ರೋಗಿ, ಪರನೇರೆಂಕಿ ಗ್ರಾಮೊದ ರಾಮಜಾಲ್ ನಿವಾಸಿ ದಾಸಪ್ಪ ರೈ(73ವ.)ಪನ್ಪಿನಾರ್ ಅಲ್ಪನೇ ತೀರ್ದ್ ಆರೆನ ಬೊಡೆದಿ, ಮಗೆ ಬೊಕ್ಕ ಒರಿ ಸಂಬಂಧಿ ಜವನಗ್ ಗಡಿಕುಲಾತಿನ ನಡಕೆ ಸೆ.25ತ ಕಾಂಡೆ ನಡತ್ದ್ಂಡ್.
ಪರನೇರೆಂಕಿ ಗ್ರಾಮೊದ ಕದ್ರ ನಿವಾಸಿ, ಕೂಲಿಕಾರ್ಮಿಕೆ ದಾಸಪ್ಪ ರೈಕ್ಲೆಗ್ ಸೆ.24ತಾನಿ ನಡೀರ್ 1.30ತ ಅಂದಾಜಿಗ್ ಸ್ಟ್ರೋಕ್ ಆದ್ ಉಸಾರ್ ತತ್ತಿತ್ತ್ಂಡ್. ಅಂಚಾದ್ ಆರೆನ ಇಲ್ಲದ ಮುಟ್ಟದಾರ್, ರಾಮಕುಂಜೇಶ್ವರ ಇಂಗ್ಲಿಷ್ ಮೀಡಿಯಂ ಶಾಲೆದ ಮೇನೇಜರ್ ಆದುಪ್ಪುನ ರಮೇಶ್ ರೈಕುಲು ತನ್ನ ಕಾರ್ಡ್ ಪುತ್ತೂರ್ದ ಮಹಾವೀರ ಆಸ್ಪತ್ರೆಗ್ ಲೆತೊಂದು ಬತ್ತಿತ್ತೆರ್. ಅಲ್ಪ ಮರ್ದ್ ಆದ್ ಬೊಕ್ಕ ಎಚ್ಚಿನ ಮರ್ದ್ಗ್ ದಾಸಪ್ಪ ರೈ ಕ್ಲೆನ್ ಕುಡ್ಲದ ಫಸ್ಟ್ ನ್ಯೂರೋ ಆಸ್ಪತ್ರೆಗ್ ಇನ್ನೋವಾ ಆಂಬುಲೆನ್ಸ್ಡ್ ಪುತ್ತೂರ್ರ್ದ್ ಲೆತೊಂದು ಪೋದೀತ್ತೆರ್.
ಕಾಂಡೆ 4 ಗಂಟೆದ ಅಂದಾಜಿಗ್ ಆಂಬುಲೆನ್ಸ್ ಫಸ್ಟ್ ನ್ಯೂರೋ ಆಸ್ಪತ್ರೆದ ಕೈತಲ್ ಡ್ರೈವರ್ನ ಅಂಕೆ ತತ್ತ್ದ್ ಪಲ್ಟಿಯಾದ್ ಕರೆಂಟ್ ಕುಂದೊಗು ಎಡ್ತ್ದ್ಂಡ್. ನಡಕೆಡ್ ಆಂಬುಲೆನ್ಸ್ಡ್ ಇತ್ತಿನ ರೋಗಿ ದಾಸಪ್ಪ ರೈ ಅಲ್ಪನೇ ತೀರ್ದಿತ್ತ್ದ್ ಆರೆನ ಬೊಡೆದಿ ನಳಿನಿ ರೈ(54ವ.), ಮಗೆ ಹರ್ಷಿತ್(33 ವ.) ಬೊಕ್ಕ ಸಂಬಂಧಿಕೆ ಮನೀಷ್(24ವ.)ಪೆಟ್ಟಾದ್ ಆಸ್ಪತ್ರೆಗ್ ದಾಕಲಾತೆರ್ ಪಂದ್ ತೆರಿದ್ ಬೈದ್ಂಡ್.
ಎಡ್ತ ನಡತಿನ ಜಾಗೆದ ಈ ಭಾಗೊಡು ಸಾದಿದ ಬೇಲೆ ನಡತೊಂದಿತ್ತ್ದ್, ರೋಡ್ಡ್ ಬರ್ಸದ ನೀರ್ ಉಂತುದಿತ್ತ್ದ್ ಅಂಬುಲೆನ್ಸ್ ಸ್ಕಿಡ್ ಆದ್ ಬೊಕ್ಕ ಕರೆಂಟ್ ಕುಂದೊಗು ಎಡ್ತ್ದ್ ಪೊರೆಲ್ದ್ ಬೂರ್ದ್ಂಡ್ ಪನ್ಪಿ ಒಲವು ತಿಕ್ಕ್ದ್ಂಡ್.