Last updated on September 26th, 2024 at 01:40 pm
ಉಳ್ಳಾಲ : ಮುಖ್ಯಮಂತ್ರಿ ಸಿದ್ದರಾಮಯ್ಯೆರೆನ ಮುಡಾ ಹಗರಣೊಡು ಕೈ ಉಂಡು ಪನ್ಪಿ ಆರೋಪೊದ ದಿಸೆಟ್ ಆರ್ ರಾಜೀನಾಮೆ ಕೊರ್ನ್ಡ ಎಡ್ಡೆ. ಕಾನೂನುಬದ್ಧವಾದ್ ಕಾನೂನು ಕೊಲಲ ಮನ್ಪೆರ ಮುಖ್ಯಮಂತ್ರಿಗ್ ಅವಕಾಶ ಇತ್ತ್‌ದ್, ಸಾರ್ವಜನಿಕೆರೆ ದೃಷ್ಟಿಕೋನೊಡು ರಾಜೀನಾಮೆ ಸೂಕ್ತವಾದುಂಡು ಪಂದ್ ಮಾಜಿ ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ್‌ ಹೆಗ್ಡೆ ತನ್ನ ಅಭಿಪ್ರಾಯ ಪಟ್ಟೊಂದೆರ್.
ಸುದ್ದಿಗಾರರೆಡ ಪಾತೆರ್ನ ಆರ್, ಮುಡಾ ಹಗರಣೊದ ಬಗೆಟ್ ರಾಜ್ಯಪಾಲೆರೆ ಪ್ರಾಸಿಕ್ಯೂಷನ್‌ ಆದೇಶೊನು ಪ್ರಶ್ನೆ ಮಲ್ತಿನ ಸಿದ್ದರಾಮಯ್ಯೆರೆ ವಿರುದ್ಧ ವಾಸ್ತವಾಂಶೊಲೆನ ಬಗೆಟ್ ಜಡ್ತೆ ಆಪಿನ ಅಗತ್ಯ ಉಂಡು ಪಂದ್ ಹೈಕೋರ್ಟ್‌ ತೀರ್ಪು ಕೊರ್ತುಂಡು. ಯಾನ್ ಒವ್ವೇ ತಪ್ಪು ಮಲ್ದಿಜಿ ಪಂದ್ ಸಿದ್ದರಾಮಯ್ಯೆ ಪನೊಂದೆರ್.
ಆಂಡ ಇತ್ತೆದ ಆರೋಪೊಲೆನ ಗಂಭೀರತೆನ್ ಗೇನೊಡು ದೀವೊಂದು ಎಡ್ಡೆ ನಿರ್ಧಾರ ಗೆತೊನೊಡು ಪಂದ್ ಆರ್ ಪಂಡೆರ್.
ದುಂಬು ರೈಲ್ವೆ ಸಚಿವೆರಾದಿತ್ತಿನ ಲಾಲ್‌ ಬಹದ್ದೂರ್‌ ಶಾಸ್ತ್ರಿಲು ರೈಲ್ ಕಲುನಡಕೆದ ಪೊರ್ತುಡು ತನ್ನ ಸ್ಥಾನೊಗು ರಾಜೀನಾಮೆ ಕೊರ್ದಿತ್ತೆರ್. ಇತ್ತೆದ ರಾಜಕೀಯೊಡು ಅಂಚಿನ ಪ್ರವೃತ್ತಿ ಇಜ್ಜಿ.
ರಾಜೀನಾಮೆ ಕೊರ್ಪುನ ಬುಡ್ಪುನ ಆರೆಗ್ ಬುಡ್ನವು. ಈ ಪ್ರಕರಣೊನು ಸಿಬಿಐ ಅತ್ತ್ಂಡ ಲೋಕಾಯುಕ್ತದಂಚಿನ ಸಂಸ್ಥೆಗ್ ಒಪ್ಯಾವೊವೊಡು ಪಂದ್ ಯಾನ್ ಪನ್ಪುಜಿ. ಪ್ರತಿಯೊಂಜಿ ತನಿಖಾ ಸಂಸ್ಥೆಲಾ ತನ್ನ ಬೇಲೆನ್ ಶ್ರದ್ಧೆಡ್ ಮನ್ಪುಂಡು ಪಂದ್ ಯಾನ್ ಎನ್ನುವೆ.
ಹೈಕೋರ್ಟ್‌ ತೀರ್ಪು ಕೊರ್ತಿನ ಮುಡಾ ವಿಷಯೊಡು ಮಾತ್ರ. ಮಿತ್ತ್‌ರ್ದ್ ತೂನಗ ಪುರಾಪು ಉಂಡು ಪಂದ್ ಹೈಕೋರ್ಟ್‌ ಪನ್ತ್‌ನ್ಡ್. ಅಂಚ ಇಪ್ಪುನಗ ರಾಜೀನಾಮೆ ಕೊರೊಡು ಪಂದ್ ಪಂಡೆರ್.
ಸರಕಾರಿ ನೌಕರೆರ್ ಅಂಚೆನೇ ಜನಪ್ರತಿನಿಧಿಲು ಅಪರಾಧ ಮಲ್ತಿನಗ ಪ್ರಕರಣ ದಾಕಲ್ಪೆರ ಇಪ್ಪುನ ನಿಬಂಧನೆನ್ಲಾ ಗೆತ್ತ್‌ಪಾಡೊಡು ಪಂದ್‌ಲಾ ನ್ಯಾ| ಹೆಗ್ಡೆ ಪಂಡೆರ್.