Last updated on September 28th, 2024 at 05:30 pm
ದೆಲ್ಲಿ ರೆಜಿಸ್ಟ್ರೇಷನ್‌ದ ಪರ BMW ಕಾರ್‌ನ್ ಸರ್ವಿಸ್‌ಗ್ ಕೊಂಡೊದು ಪೋನಗ ಪೆರ್ಸಾದಿದ ನಡುಟು ಸೂ ಪತೊಂದು ಪೊತ್ತುದು ಸುಡು ಸೂಕರಿಯಾತಿನ ನಡಕೆ ಕುಡ್ಲದ ಅಡ್ಯಾರ್‌ಡ್ ನಡತ್‌ದ್ಂಡ್.
ಅಡ್ಯಾರ್‌ದ ಸಹ್ಯಾದ್ರಿ ಕಾಲೇಜಿದ ಎದುರುಡು ಇನಿ ಮಧ್ಯಾಹ್ನ 1.30ತ ಅಂದಾಜಿಗ್ ಈ ನಡಕೆ ನಡತ್‌ದ್ಂಡ್. ಬಿಸಿರೋಡ್ ದಂಚಿರ್ದ್ ಡ್ರೈವರ್ ಗುರುದೀಪ್ ಪನ್ಪಿನಾರ್ ಕಾರ್ ಬುಡೊಂದು ಬತ್ತಿತ್ತ್‌ದ್ ಸಹ್ಯಾದ್ರಿ ಕಾಲೇಜಿದಡೆ ಎತ್ತೊಂದಿತ್ತಿಲೆಕನೆ ಎದುರುಡು ಪುಗೆ ತೋಜಿದ್ ಬೈದ್ಂಡ್. ಕಾರ್‌ಡ್ ಡ್ರೈವರ್ ಒರಿಯೇ ಇತ್ತ್‌ದ್ ಅಪಗನೇ ಕಾರ್‌ರ್ದ್ ಜತ್ತ್‌ದೆರ್. ಅವೆರ್ದ್ ಬೊಕ್ಕ, ಮಾತೆರ್ಲಾ ತೂವೊಂದಿತ್ತಿ ಲೆಕನೆ ನಡುರೋಡ್‌ಡೇ ಕಾರ್ ಬಗಬಗ ಪೊತ್ತ್‌ದು ಪೋತುಂಡು.
ಶಾರ್ಟ್ ಸರ್ಕ್ಯೂಟ್‌ರ್ದಾವರ ಕಾರ್‌ಗ್ ಸೂ ಪತೊಂದಿಪ್ಪು ಪನ್ಪಿನ ಅಂದಾಜಿ ಉಂಡು. ಕಾರ್‌ಡ್ ದಾದನೋ ಸಮಸ್ಯೆ ಉಂಡು ಪಂಡ್‌ದ್ ಅಡ್ಯಾರ್‌ದ BMW ಗ್ಯಾರೇಜ್‌ಗ್ ಕೊನೊವೊಂದಿತ್ತೆರ್. ಆತೆಟೇ ಸೂ ಪತೊಂದು ಪೊತ್ತುದು ಸುಡು ಸೂಕರಿಯಾತ್ಂಡ್ ಪಕದ್ ಪೊಲೀಸೆರ್ ತೆರಿಪಾದೆರ್. ಪೆರ್ಸಾದಿಡ್ ಒಂತೆ ಪೊರ್ತು ಗಾಡಿಲೆನ್ ಪೋವೆರೆ ಬುಡೊಂದಿಜ್ಜಂಡ್. ದೆಲ್ಲಿದ ರೆಜಿಸ್ಟ್ರೇಷನ್ ಇತ್ತಿನ BMW ಕಾರ್ ಆದಿತ್ತ್‌ದ್ 2011ತ ಮಾಡೆಲ್ ಪಂದ್ ಪಾತೆರೊಂದುಲ್ಲೆರ್.
ಕೆಲ ದಿನೊಕು ದುಂಬಾತೆ ತೊರ್ತಲ್ NITK ಇಂಜಿನಿಯರಿಂಗ್ ಕಾಲೇಜಿದಲ್ಪ ಒಡಿಪುದಂಚಿರ್ದ್ ಬರೊಂದಿತ್ತಿನ BMW ಕಾರ್ ಇಕಚೆನೇ ಸೂ ಪತೊಂದು ಪೊತ್ತುದು ಪೋದಿತ್ತ್ಂಡ್.