Last updated on October 1st, 2024 at 07:13 pm
ಕೇರಳೊಡು ಓಣಂ ಪನ್ದ್ ಉಪ್ಪುನ ಪರ್ಬೊನು ಇತ್ತೆ ಯಾನ್ ದುಂಬು ಯಾನ್ ದುಂಬು ಪನ್ಪಿಲೆಕ್ಕ ತುಳುನಾಡ್‌ದ ಕಾಲೇಜಿಲು ಮಲ್ತೊಂದುಲ್ಲ. ಉಂದೆತ ಗೌಜಿ ಗಮ್ಮತ್ ತೂನಗ ಉಂದೆಕ್ ಲಕ್ಷ ಲಕ್ಷ ಕರ್ಚಿ ಆಪುನ ಗ್ಯಾರಂಟಿ. ಓಣಂ ಮಲ್ಪುನೆಕ್ಕ್ ದಾಲಾ ತಕರಾರ್ ಇಜ್ಜಿ, ಐಕ್ ತಕ್ಕ ಬಜೆಟ್ ಇತ್ತ್ಂಡ ಏತ್ಲಾ ಗಮ್ಮತ್ ಮಲ್ಪೊಲಿ. ಆಂಡ ಒಂಜಿ ಕಣ್ಣ್ ಗ್ ಬೊಲ್ನೆಯಿ ಬೊಕ್ಕೊಂಜೆಕ್ಕ್ ಸುಣ್ಣ ದಾಯೆಗ್?
ತುಳುನಾಡ್‌ಡ್ ಇತ್ತಿನ ಈ ಕಾಲೇಜಿಲೆಡ್ ತುಳು ಕ್ಲಬ್ ಮಲ್ಪುಲೆ-ಜೋಕುಲೆಡ ತುಳು ಬೇಲೆ ಮಲ್ಪಾಲೆ ಪನ್ನಗ ಅವ್ ಗ್ರೂಪಿಸಂ ಆಪುಂಡು, ಆಕ್ಟಿವಿಸಂ ಆಪುಂಡು ಮಲ್ಪರೆ ಆಪುಜಿ ಪನ್ದ್ ಪನ್ತಿನ ಕಾಲೇಜಿಲು ಇನಿ ಕೇರಳದಕಲೆನ್ ಗುಡ್ಡೆ ಪಾಡೊಂಡು ಓಣಂ ಮಲ್ಪುನ ಗ್ರೂಪಿಸಂ ಆಪುಜಾ? ಜೋಕುಲು ತುಳುತ ಪ್ರೋಗ್ರಾಂ ಮಲ್ಪುವ ಒಂತೆ ಪನವುದ ಸಕಾಯ ಮಲ್ಪುಲೆ ಪನ್ನಗ ದುಂಬು ಪಿರ ತೂಪಿನ ಕಾಲೇಜಿಲು ಕೇರಳದ ಪರ್ಬೊನು ವಾ ಲಾಬಿದ ಆಸೆಗ್ ಮಲ್ಪುವೆರ್?
ಉಂದೆಟ್ ಕಾಲಿ ಕಾಲೇಜಿಲೆನ ತಪ್ಪು ಇಜ್ಜಿ. ಸ್ವಾಭಿಮಾನ ದಾಂತಿನ ತುಳುವ ಜವನೆರ್-ಜೋಕುಲೆನಲಾ ಆತೇ ತಪ್ಪು ಉಂಡು. ಅಕಲೆನ ಬಾಸೆದ ಡಿಜೆ ಪಾಡ್ದ್ ನಲ್ಪುನ ತುಳುವ ಜವನೆರೆಗ್ ನಮ್ಮ ಬಾಸೆಗ್ಲಾ ದಾದಾಂಡಲ ಮಲ್ಪೊಡು ಪನ್ದ್ ಉಡಲ್‌ಗ್ ಬೈಜಿ. ಕೇರಳದ ಓಣಂಗ್ ಗದ್ದಲ ಗೌಜಿ ಮಲ್ತಿಲೆಕ್ಕ ನಮ ತುಳುನಾಡ ಉಚ್ಚಯ ಮಲ್ತ್ ತುಳುವ ಸಂಸ್ಕೃತಿನ್ಲಾ ತೂಪಾವುನ ಪ್ರೋಗ್ರಾಂ ಮಲ್ಪುವ ಎಂಕಲೆಗ್ ಫಂಡ್ ಕೊರ್ಲೆ ಪನ್ದ್ ಕೇನುನ ತಂಕ ಇಜ್ಜಿ. ಒಂಜಿ ವೇಳೆ ಕೊರ್ಪುಜಿ ಪನ್ಡೆರ್ಡ ಆ ಅನ್ಯಾಯೊಗು ತಿಗಲೆ ಕೊರ್ದು ಉಂತುನ ಬಿರ್ಸಾದಿಗೆಲಾ ಇಜ್ಜಿ.
ತುಳುವ ಜವನೆರೆಗ್ ಪುಟ್ಟಿನೆರ್ದಿಂಚಿ ಬರಿತಿಲ್ಲದ ಬಾಸೆಲೆನ ಮರ್ಲ್‌ಡ್ ನಮ್ಮ ಬಾಸೆಗ್ ದಾಲ ಕೇನುನನೇ ತಪ್ಪು ಪನ್ಪಿಲೆಕ್ಕ ಆತ್ಂಡ್. ಮಲಯಾಲಿಲೆನ ಪ್ರೋಗ್ರಾಂ ಗ್ ಮುಂಡು,ಕಚ್ಚೆ,ಸೀರೆ ತುತೊಂದು ಪೋಪಿನಕುಲು ತುಳುತ ಕಜ್ಜೊಗು ಮುಂಡಾಸ್ ಕಟ್ಟೆರೆ ರೆಡಿ ಇಜ್ಜೆರ್. ಮಲಯಾಲಿ-ಕನ್ನಡೊದ ಡಿಜೆಡ್ ತುಳು ಕೋಂಟುಡು ತಿಗಲೆ ಪತೊಂದು ನರೆಲೊಂದುಂಡು.
ಕೇರಳದ ಜೋಕುಲೆನ್ ಒಯ್ಪೊಡು ಪನ್ದ್ ದಾಲಾ ಮಲ್ಪರೆ ರೆಡಿ ಉಪ್ಪುನ ಮ್ಯಾನೇಜ್‌ಮೆಂಟ್‌ಲೆಗ್ ತುಳುಕು ಒಂಜಿ ದಾಲಾ ಮಲ್ಪೊಡು ಪನ್ದ್ ಮಂಡೆಗ್ ಪೋವಂದಿನ ಸೋಜಿಗ. ಕಾಲಿ ಒಂಜಿ ದಿನತ ಎಲ್ಯ ಕಜ್ಜ, ನಾಲ್ ಜನ ಸ್ಟೇಜ್‌ಡ್ ಕುಲ್ಲಾದ್ ಪ್ರೋಗ್ರಾಂ ಮಲ್ತ್ಂಡ ಯಾರಂದ್ ತುಳುನು ಮಾಸ್‌ಗ್ ಎತ್ತಾವುನ ಬೇಲೆ ಆವೊಂಡು.
ತುಳುವ ಜವನೆರ್ ಜೋಕುಲೆಡ ಬಿನ್ನಪು. ತುಳುತ ಬುಲೆಚ್ಚಿಲ್ ನಿಕ್ಲೆನ ಕೈಟ್ ಉಂಡು. ತುಳುತ ಒರಿಪುಗಾದ್ ತುಳುನು ಮಾಸ್‌ಗ್ ಕನಲೆ. ಕಾಲೇಜಿಲೆಡ ಲಡಯಿ ಮಲ್ತ್ ತುಳುತ ಉಚ್ಚಯ ಮಲ್ಪುಲೆ. ಇನಿ ನಿಕುಲು ಮುಂಡು ಪಾಡೊಂಡು ಕೇರಳದಕಲೆನ ಪ್ರೋಗ್ರಾಂಡ್ ನಲ್ತಿಲೆಕ್ಕ ಎಲ್ಲೆ ನಿಕುಲು ತುಳುವೆರೆ ಉಚ್ಚಯ ಮಲ್ಪುನಗ ಏತ್ ಕೇರಳದಕುಲು ಬತ್ತ್ ನಿಕಲೆನ ಬೆರಿಯ ಉಪ್ಪುವೆರ್ ತೂಕ. ಸ್ವಾಭಿಮಾನಿಲಾಲೆ, ತುಳುಕಾದ್ ಬದ್ಕ್‌ಲೆ, ತುಳು ಒರಿಪಾಲೆ.