Last updated on November 8th, 2024 at 02:33 pm
ಕಾರ್ಲ: ಬಂಙ ಬೂರ್ದ್ ಓದ್‌ದ್ ಮದಿಮೆ ಆದ್, ಬಾಲೆ ಆಯಿ ಬೊಕ್ಕ ಬೇಲೆಗ್ ಪೋಯೆರ ಆವೊಂದಿಜ್ಜಿ ಪಂಡ್‌ದ್ ಡಿಪ್ರೆಷನ್‌ಡ್ ಗೆಸ್ಟ್ ಟೀಚರ್ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಒಡಿಪು ಜಿಲ್ಲೆದ ಕಾರ್ಲ ತಾಲೂಕ್‌ದ ಈದು ಗ್ರಾಮೊಡು ನಡತ್‌ದ್ಂಡ್. ಪ್ರಸನ್ನಾ (29) ಆತ್ಮಹತ್ಯೆ ಮರಲ್ತೊಂದಿನಾರ್.
ಬೆದ್ರ ನಿವಾಸಿ ಪ್ರಸನ್ನಾ ನ್ ಕಾರ್ಲದ ಈದು ಗ್ರಾಮೊದ ರಾಜೇಶ್ ಪನ್ಪಿನಾರೆಗ್ 2022ಟ್ ಮದಿಮೆ ಮಲ್ತ್ ಕೊರ್ದಿತ್ತೆರ್. ರಾಜೇಶ್ ಬೆಂಗಳೂರ್‌ದ ಪ್ರೈವೇಟ್ ಕಂಪೆನಿಡ್ ಬೇಲೆ ಮಲ್ತೊಂದಿತ್ತೆರ್. ಪ್ರಸನ್ನಾ ಹೊಸ್ಮಾರ್ ಪೆರಿಯ ಪ್ರಾಥಮಿಕ ಶಾಲೆಡ್ ಅತಿಥಿ ಶಿಕ್ಷಕಿಯಾದ್ ಬೆನೊಂದಿತ್ತೆರ್.
ಇರ್ವೆರೆಗ್ ಮದಿಮೆ ಆದ್ 10 ತಿಂಗೊಲ್ದ ಪೊಣ್ಣು ಬಾಲೆ ಇತ್ತ್‌ದ್, ಆರ್ ತನ್ನ ಅಪ್ಪೆ ಇಲ್ಲಗ್ ಫೋನ್ ಮಲ್ತ್‌ದ್ ಕಂಡನ್ಯನ ಇಲ್ಲದಕುಲು ಎಡ್ಡೆಡ್ ತೂವೊಂದುಲ್ಲೆರ್ ಪಂದ್ ಪನೊಂದಿತ್ತೆರ್. ಆಂಡ ಎಂಕ್ ಈತ್ ಬೇಗ ಬಾಲೆ ಬೊರ್ಚಿತ್ತ್ಂಡ್, ಎಂಕ್ ಬೇಲೆಗ್ ಪೋಯೆರ ಆವೊಂದಿಜ್ಜಿ ಪಂದ್ ಅ್ಂದುವೇ ತರೆಬೆಚ್ಚಡ್ ಡಿಪ್ರೆಷನ್‌ಗ್ ಜಾರ್ದಿತ್ತೆರ್. ಈ ಬಗೆಟ್ ಪ್ರಸನ್ನಾ ಒಡಿಪುದ ಬಾಳಿಗಾ ಆಸ್ಪತ್ರೆಡ್ ಮರ್ದ್ ಮಲ್ತೊಂದಿತ್ತೆರ್.
ಪ್ರಸನ್ನಾ ತಾನ್ ಈತ್ ಓದ್ಂಡಲಾ ತನ್ಕ್ ಬಾಲೆ ಆತಿನೆರ್ದಾವರ ಬೇಲೆಗ್ ಪೋಯೆರ ಆವೊಂದಿಜ್ಜಿ ಪಂಡ್‌ದ್ ಡಿಪ್ರೆಷನ್‌ಡ್ ನವೆಂಬರ್ 6ತಾನಿ ಕಂಡನ್ಯನ ಇಲ್ಲಡ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಈ ಬಗೆಟ್ ಕಾರ್ಲ ಗ್ರಾಮಾಂತರ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.