Last updated on November 9th, 2024 at 07:39 pm
ಮುಲ್ಕಿ ನವೆಂಬರ್ 09: ರೈಲ್‌ಗ್ ತರೆಕೊರ್ದು ಜವನೆ ಒರಿ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಬೆಳ್ಳಾಯರು ರೈಲ್ವೇ ಪಟ್ಟೆಡ್ ಶುಕ್ರವಾರ ಮಧ್ಯಾಹ್ನ ನಡತಿತ್ತ್‌ದ್, ಇತ್ತೆ ಆತ್ಮಹತ್ಯೆ ಮಲ್ತೊಂದಿನ ಜನತ ಫ್ಲ್ಯಾಟ್‌ಡ್ ಆರೆನ ಬೊಡೆದಿ ಬೊಕ್ಕ ಬಾಲೆದ ಪುನ ತಿಕ್ಕ್‌ದ್ಂಡ್.
ಬೆಳ್ಳಾಯರು ರೈಲ್ವೇ ಪಟ್ಟೆಡ್ ಶುಕ್ರವಾರ ಮಧ್ಯಾಹ್ನ ಜವನೆ ಒರಿ ರೈಲ್‌ಗ್ ತರೆಕೊರ್ದು ಆತ್ಮಹತ್ಯೆ ಮಲ್ತೊಂದೆರ್, ಈ ಜನನ್ ಪಕ್ಷಿಕೆರೆ ನಿವಾಸಿ ಕಾರ್ತಿಕ್ ಭಟ್(32) ಪಂದ್ ಗುರ್ತ ಪತ್ತ್‌ದೆರ್. ಅಂಚೆನೇ ಆ ಜನತ ಒಲವು ಒಟ್ಟು ಮಲ್ತಿನ ಪೋಲೀಸೆರ್ ಕಾರ್ತಿಕ್ ಇತ್ತಿನ ಫ್ಲ್ಯಾಟ್‌ಗ್ ಪೋತೆರ್. ಆಂಡ ಫ್ಲ್ಯಾಟ್‌ದ ಬಾಕಿಲ್ ದೆತ್ತಿನ ಪೊಲೀಸೆರೆಗ್ ಮಾತ್ರ ಶಾಕ್ ಆತ್ಂಡ್. ಅಲ್ಪ ಕಾರ್ತಿಕ್‌ನ ಬೊಡೆದಿ ಬೊಕ್ಕ ಎಲ್ಯ ಬಾಲೆದ ಪುನ ತಿಕ್ಕ್‌ದ್ಂಡ್. ಮೂಜಿ ದಿನೊರ್ದಿಂಚಿ ಬಾಕಿಲ್ ಪಾಡ್ದೇ ಇತ್ತ್‌ದ್ ಬೊಡೆದಿ ಬಾಲೆನ್ ಕೆರ್ದ್ ಕಾರ್ತಿಕ್ ಆತ್ಮಹತ್ಯೆ ಮಲ್ತೊಂದುಪ್ಪೊಡು ಪನ್ಪಿನ ಸಂಶಯ ತೋಜೊಂದುಂಡು. ಬೊಡೆದಿ ಪ್ರಿಯಾಂಕ ((28) ಬಾಲೆ ಹೃದಯ್ (4) ಪನ್ದ್ ಗುರ್ತಪತ್ತ್‌ದೆರ್.
ಪಕ್ಷಿಕೆರೆ ಜಂಕ್ಷನ್‌ಡ್ “ಹೋಟೆಲ್ ಕಾರ್ತಿಕ್” ನಡಪಾವೊಂದುಪ್ಪುನ ಜನಾರ್ಧನ ಭಟ್ ಪನ್ಪಿನಾರೆನ ಮೂವೆರ್ ಜೋಕುಲೆಡ್ ಒರಿಯಾಯಿನ ಕಾರ್ತಿಕ್ ಕದ್ರಿದ ಸೊಸೈಟಿ ಒಂಜೆಟ್ ಬೇಲೆ ಮಲ್ತೊಂದಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್. ಶುಕ್ರವಾರ ಮಧ್ಯಾಹ್ನ ತನ್ನ ಸ್ಕೂಟರ್‌ನ್ ಕಲ್ಲಾಪು ದೇಲಂತಡೆದಲ್ಪ ಉಂತಾದ್ ರೈಲ್ ಪಟ್ಟೆದಂಚಿ ಪೋದಿತ್ತ್‌ದ್, ಒಂತೆ ಪೊರ್ತುಡು ಚಿಪ್ಪ್‌ಡ್ ಚೂರ್ ಆತಿನ ಸ್ಥಿತಿಟ್ ಪುನ ತಿಕ್ಕ್‌ದಿತ್ತ್ಂಡ್. ಮೂಲ್ಕಿ ಸ್ಟೇಷನ್ ಪೊಲೀಸೆರ್ ಪ್ರಕರಣೊದ ಜಡ್ತೆ ಮಲ್ತೊಂದಿತ್ತ್‌ದ್, ಎಚ್ಚಿನ ಒಲವು ನನ ಪಿನೊಡಾತೆ.