Last updated on November 21st, 2024 at 12:12 pm
ನ್ಯೂಯಾರ್ಕ್ ನವೆಂಬರ್ 21: ಶತಕೋಟಿ ಡಾಲರ್ ಲಂಚ ಬೊಕ್ಕ ದಗೆತ ಆರೋಡ್ ಭಾರತೊದ ಉದ್ಯಮಿ ಗೌತಮ್ ಅದಾನಿ ಬೊಕ್ಕ ಆರೆನ ಅರ್ವತೆ ಸಾಗರ್ ಅದಾನಿ ಮೊಕ್ಲೆನ ಮಿತ್ತ್ ಅಮೆರಿಕದ ನ್ಯಾಯಂತಡೆ ಅರೆಸ್ಟ್ ವಾರೆಂಟ್ ಪಿದಡ್ಪಾದ್ಂಡ್.
ಸೌರ ವಿದ್ಯುತ್ ಕಂತ್ರಾಟ್‌ಗ್ ಸಂಬಂಧಿತ್‌ದ್ ₹2,237 ಕೋಟಿ ಲಂಚೊದ ಆರೋಪಡ್ ಗೌತಮ್ ಅದಾನಿ, ಸಾಗರ್ ಆರ್. ಅದಾನಿ ಹಾಗೂ ವಿನೀತ್ ಎಸ್. ಜೈನ್ ಮೊಕ್ಲೆನ ಮಿತ್ತ್ ಐನ್ ಅಂಶೊಲೆನ ಕ್ರಿಮಿನಲ್ ಆರೋಪಪಟ್ಟಿನ್ ನ್ಯೂಯಾರ್ಕ್‌ದ ಪೂರ್ವ ಜಿಲ್ಲಾ ನ್ಯಾಯಂತಡೆಗ್ ಅಮೆರಿಕದ ಪ್ರಾಸಿಕ್ಯೂಟ‌ರ್ ಸಂದಾದಿತ್ತೆರ್. ಅದಾನಿ ಗ್ರೀನ್ ಎನರ್ಜಿ ಬೊಕ್ಕ ಅಜುರೆ ಪವರ್ ಸಂಸ್ಥೆಲು ಭಾರತೊಡು ಮಾರುಕಟ್ಟೆ ಬಿಲೆರ್ದ್ ಎಚ್ಚಿನ ರೇಟ್‌ಡ್ ಸೌರಶಕ್ತಿ ಕಂತ್ರಾಟ್ ಗೆತೊನ್ರ ಭಾರತೀಯ ಅಧಿಕಾರಿಲೆಗ್ 250 ಮಿಲಿಯನ್ ಡಾಲರ್‌ರ್ದ್‌ಲಾ ಎಚ್ಚ ಲಂಚ ಕೊರ್ತೆರ್ ಪನ್ಪಿನ ಆರೋಪ. 2020-24ತ ಉಲಯಿಡ್ ಲಂಚ ಕೊರ್ತಿನ ಅತ್ತ್ಂಡ ಕೊರ್ಯೆರ ಯೋಜನೆ ಪಾಡ್ದಿನ ನಡಕೆಲು ನಡತ್‌ದ ಪನ್ದ್ ಪನೊಂದುಲ್ಲೆರ್.
ಅಮೆರಿಕದ ಕೋರ್ಟ್‌ಡ್ ಗೌತಮ್ ಅದಾನಿ ಬೊಕ್ಕ ಒರಿನಕಲೆನ ಮಿತ್ತ್‌ದ ಆರೋಪೊಲು ದಾಕಲಾತಿನ ಬೆರಿಟೇ ಅದಾನಿ ಗ್ರೀನ್ ಎನರ್ಜಿ ಸಂಸ್ಥೆ ತನ್ನ 600 ಮಿಲಿಯನ್ ಯುಎಸ್ ಡಾಲರ್ ಬಾಂಡ್‌ಲೆನ್ ಪಟ್ಟುನ ಯೋಜನೆನ್ ಉಂತಾದ್ಂಡ್. ಈ ಬಾಂಡ್‌ಲೆಗ್ ಪಾಕ ಇನ್ವೆಸ್ಟರ್‌ನಕುಲು ಅರ್ಜಿ ಪಾಡ್ದಿತ್ತೆರ್. ಕೋರ್ಟ್‌ಡ್ ಪ್ರಕರಣ ಬತ್ತಿನೇ ಸಂಸ್ಥೆ ತನ್ನ ನಡೆನ್ ಪಿರಗೆತೊಂದುಂಡು. ಅದಾನಿ ಗ್ರೂಪ್‌ದ ಎಚ್ಚಿನ ಸ್ಟಾಕ್‌ಲು ಇನಿ, ಗುರುವಾರ ನೆಲ ಮೂಸೊಂದುಲ್ಲ.