Last updated on November 22nd, 2024 at 04:19 pm
ಕುಡ್ಲ ನವೆಂಬರ್ 22 : 13 ವರ್ಷೊದ ಪೊಣ್ಣನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿನ ಪ್ರಕರಣೊಗು ಸಂಬಂಧಿತ್‌ದ್ ಒರ್ಯಗ್ 20 ವರ್ಸ ಕಠಿಣ ಕರ್ಪಿಲ್ಲ ಶಿಕ್ಷೆ ಅಂಚೆನೇ 50,000 ರೂ. ದಂಡ ಪಾಡ್ದ್ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸೆಷನ್ಸ್ ನ್ಯಾಯಂತಡೆ (ಪೋಕ್ಸೋ) ತೀರ್ಪು ಕೊರ್ತುಂಡು.
ಬೊಲ್ತೇರ್ ತಾಲೂಕ್‌ದ ಕೆ ಸುಧೀರ್ ಪನ್ಪಿನಾಯೆ ಶಿಕ್ಷೆ ಆತಿನ ಆರೋಪಿ. ಡಿಸೆಂಬರ್ 2021ಟ್ ಆರೋಪಿ ಇಲ್ಲಗ್ ಟಿವಿ ತೂಯೆರ ಬತ್ತಿತ್ತಿನ ಸಂತ್ರಸ್ತೆದಿ ಪೊಣ್ಣನ್ ಇಲ್ಲರ್ದ್ ಒಂತೆ ದೂರೊಡು ಇಪ್ಪುನ ಅಜ್ಜಿಲ್ಲಡೆ ಲೆತೊಂದು ಪೋದು ಆಲೆನ ಮಿತ್ತ್ ಅತ್ಯಾಚಾರ ಮಲ್ತಿತ್ತ್‌ದ್, ಬೊಕ್ಕ ಪೊಣ್ಣು ಆಲಾದೇ ಬತ್ತ್‌ದಲ್ ಪನ್ದ್ ಇಲ್ಲದಕ್ಲೆಗ್ ಪನ್ದಿತ್ತಿನ ಆರೋಪಿ ಬೆದರಿಕೆಲಾ ಪಾಡ್ದಿತ್ತೆ ಅಂಚೆನೇ ಪೊಣ್ಣನ ಮಿತ್ತ್ ಪಾಕ ಸರ್ತಿ ಅತ್ಯಾಚಾರೊಲಾ ಮಲ್ದಿತ್ತೆ.
ಆಗಸ್ಟ್ 2022 ಟ್, ಪೊಣ್ಣು ಬಂಜಿನಾಲಾದಿತ್ತಲ್. ಈ ವಿಚಾರ ತೆರಿನೇ ಆರೋಪಿ ಸಂತ್ರಸ್ತೆದಿನ ಇಲ್ಲದಕ್ಲೆಗ್ ಯಾನ್ ಆಲೆನ್ ಮದಿಮೆ ಆಪೆ ಪನ್ದ್ ಪನ್ಡ್‌ದ್, ಆಲೆಗ್ ಬೊಳ್ಳಿದ ಕರಿಮಣಿ , ಕಾರುಂಗಿಲ ಪಾಡ್ಪಾದ್, ಪೋಟೋ ಕಲೆತೆ. ಬೊಕ್ಕ ಪುಟ್ಟಿನ ದಿನೊತ ಪಾರ್ಟಿ ಉಂಡು ಪನ್ದ್ ಸಂತ್ರಸ್ತೆದಿನ್ ಚಿಕ್ಕಮಗಳೂರುಗ್ ಲೆತೊಂದು ಪೋತೆ. ಅಲ್ಪರ್ದ್ ಆಸ್ಪತ್ರೆಯೊಂಜೆಟ್ ಮೋಲು ಎನ್ನ ಬೊಡೆದಿ ಪನ್ದ್ ಪನ್ಡ್‌ದ್, ಆಲೆನ ಬಂಜಿ ಬೂರ್ಪಾದೆ.
ಆಂಡ ಆಯನ ನಸೀಬ್ ಸಮ ದಾಂತಿನೆರ್ದಾವರ ಏರೋ ಒರಿ ಜೋಕುಲೆನ ಸಹಾಯವಾಣಿಗ್ ಕಾಲ್ ಮಲ್ತ್‌ದ್ ಒಲವು ಕೊರ್ತೆರ್. ಬೊಕ್ಕ ಪೊಲೀಸೆರ್ ವಿಚಾರಣೆ ಮಲ್ತ್‌ದಾನಗ ಸಂತ್ರಸ್ತೆದಿನ ಇಲ್ಲದಕುಲು ಒವ್ವೇ ಒಲವು ಕೊರ್ತುಜೆರ್. ಆಂಡ ಸಂತ್ರಸ್ತೆದಿನ ಕೌನ್ಸೆಲಿಂಗ್ ಮಲ್ತಿ ಬೊಕ್ಕ ನಡತಿನ ಮಾತಾ ವಿಚಾರೊನ್ಲಾ ಆಲ್ ಬಾಯಿ ಬುಡ್ತಲ್. ಅವು ಆಯಿ ಬೊಕ್ಕ, ಸುಧೀರ್‌ನ ಮಿತ್ತ್ ಜೋಕ್ಲೆನ ಲೈಂಗಿಕ ಅಪರಾಧೊಲೆನ ಸಂರಕ್ಷಣಾ ಕಾಯ್ದೆ ಬೊಕ್ಕ ಭಾರತೀಯ ದಂಡ ಸಂಹಿತೆದ ಬೇತೆ ಬೇತೆ ಸೆಕ್ಷನ್‌‌ಲೆನ ಅಡಿಟ್ ಎಫ್‌ಐಆರ್ ದಾಕಲಾದಿತ್ತ್ಂಡ್. ಸರ್ಕಲ್ ಇನ್ಸ್‌ಪೆಕ್ಟರ್ ಆಯಿನ ಶಿವಕುಮಾರ್ ಬಿ ಬೊಕ್ಕ ಸತ್ಯನಾರಾಯಣ ಕೆ ಜಡ್ತೆ ಮಲ್ತ್‌ದ್ ನ್ಯಾಯಂತಡೆಕ್ ದೋಷಾರೋಪ ಪಟ್ಟಿ ಸಂದಾದೆರ್.
ಇತ್ತೆ ನ್ಯಾಯಂತಡೆ ಅತ್ಯಾಚಾರೊಗು ಐಪಿಸಿ ಸೆಕ್ಷನ್ 376 ಬೊಕ್ಕ ಪೋಕ್ಸೊ ಕಾಯಿದೆ ಸೆಕ್ಷನ್ 6 ತ ಅಡಿಟ್ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸೆಷನ್ಸ್ ಫಾಸ್ಟ್ ಟ್ರ್ಯಾಕ್ ವಿಶೇಷ ನ್ಯಾಯಂತಡೆ – 2 (ಪೋಕ್ಸೊ) ನ್ಯಾಯಾಧೀಶೆರಾಯಿನ ಮಾನು ಕೆಎಸ್ ಮೇರ್ ಸುಧೀರ್‌ಗ್ 20 ವರ್ಸೊಲೆನ ಕಠಿಣ ಕರ್ಪಿಲ್ಲ ಶಿಕ್ಷೆ ಬೊಕ್ಕ 40,000 ರೂ. ಮಿತ್ತ್‌ಡ್, ಸಾಕ್ಷ್ಯ ನಾಶ ಮಲ್ತಿನೆಕ್ ಐಪಿಸಿ ಸೆಕ್ಷನ್ 201 ತ ಅಡಿಟ್ ಅವರು ಮೂರಜಿ ವರ್ಸೊದ ಸರಳ ಕರ್ಪಿಲ್ಲ ಶಿಕ್ಷೆ ಬೊಕ್ಕ 10,000 ರೂ. ದಂಡದ ಕಾಸ್‌ಡ್ 50 ಸಾವಿರ ರೂ.ನ್ ಸಂತ್ರಸ್ತೆದಿಗ್ ಕೊರ್ಯೆರ ನ್ಯಾಯಂತಡೆ ಆದೇಶ ಮಲ್ದ್ಂಡ್. ಈತೇ ಅತ್ತಂದೆ ಐಪಿಸಿ ಸೆಕ್ಷನ್ 357(ಎ) ಬೊಕ್ಕ ಸಂತ್ರಸ್ತ ಪರಿಹಾರ ಯೋಜನೆದಡಿಟ್ ಸಂತ್ರಸ್ತೆರೆಗ್ 2 ಲಕ್ಷ ರೂ.ಪರಿಹಾರ ಕೊರ್ಯೆರ ಜಿಲ್ಲಾ ಕಾನೂನು ಸೇವೆಲೆನ ಪ್ರಾಧಿಕಾರ ಆದೇಶ ಕೊರ್ದು ತೀರ್ಪು ಕೊರ್ತುಂಡು.