Last updated on November 23rd, 2024 at 05:51 pm
ಕುಡ್ಲ: ಮೂಜಿ ಸರ್ತಿ ತಲಾಖ್‌ ಪನ್ಡ್‌ದ್ ಬೊಡೆದಿನ್ ಇಲ್ಲರ್ದ್ ಪಿದಯಿ ಪಾಡ್ದಿನ ನಡಕೆ ಉಳ್ಳಾಲ ಸಮ್ಮರ್‌ ಸ್ಯಾಂಡ್‌ ದಲ್ಪ ನಡತಿತ್ತ್‌ದ್, ಆರೋಪಿ ಮೊಹಮ್ಮದ್‌ ದಿಲ್ಫಾಜ್ನ್ ಪೊಲೀಸೆರ್ ಕೈದ್ ಮಲ್ದೆರ್. ಮೊಹಮ್ಮದ್‌ ದಿಲ್ಫಾಜ್ನ ಮಿತ್ತ್ ಬೊಡೆದಿ ಹೀನಾ ಫಾತಿಮಾ ಮೇರ್ ಕುಡ್ಲದ ಮಹಿಳಾ ಪೊಲೀಸ್‌ ಸ್ಟೇಷನ್‌ಡ್ ಒಯಿಲ್ ಬರೆಪಾದಿತ್ತೆರ್.
ಒಯಿಲ್‌ದ ಒಲವು
“2019ದ ಎ.20ದಾನಿ ದಿಲ್ಫಾಜ್ನ್ ಮೋಕೆ ಮಲ್ತ್ ಮದಿಮೆ ಆದಿತ್ತ್‌ದ್, ಮದಿಮೆದ ಪೊರ್ತುಡು ಎನ್ನ ಅಮ್ಮೆರ್ 22 ಪವನ್‌ ಬಂಗಾರ್ ಪಾಡ್ದೆರ್. ಅತ್ತಂದೆ ವಾಚ್‌ ಗೆತೊನ್ರ ದಿಲ್ಫಾಜ್‌ 50 ಸಾ. ರೂ. ಕೇನ್ದ್ ಗೆತೊಂದಿತ್ತೆ. ಮದಿಮೆ ಆಯಿ ಬೊಕ್ಕ ಎನ್ನ ಒಟ್ಟು ಒಂತೆ ಸಮೆ ಎಡ್ಡೆಡೇ ಇತ್ತೆ. ಬೊಕ್ಕ ಬೊಕ್ಕ ಬೇತೆ ಪೊಂಜೊವುಲೆನ ಒಟ್ಟುಗು ಅನೈತಿಕ ಸಂಬಂಧ ಸುರು ಮಲ್ತಿತ್ತೆ.
ಈ ಬಗೆಟ್ ಕೇನ್ಡಿನಪಗ ದೈಹಿಕ ಹಲ್ಲೆ ಮಲ್ತ್‌ದೆ. ಅವೆಕ್ ಮರ್ದ್ ಗೆತೊಂದೆ. ಈ ಬಗೆಟ್ ಕುಟುಮೊದ ಪೆರಿಯಕ್ಲು ಪಂಚಾತಿಗೆ ಮಲ್ತ್‌ದ್ ದಿಲ್ಫಾಜ್‌ಗ್ ಬುದ್ಧಿ ಪಾತೆರ ಪನ್ದಿತ್ತೆರ್. ಆಂಡಲಾ ಆಯೆ ತನ್ನ ದುಂಬುದ ಬುದ್ಧಿ ಬುಡ್ತಿಜಘ. ನ. 8ದಾನಿ ಎನ್ನ ಅಮ್ಮೆರ್ ದಿಲ್ಫಾಜ್‌‌ಡ ಈ ಬಗೆಟ್ ವಿಚಾರಿತಿನೆಕ್ ದಿಲ್ಫಾಜ್‌ ಎನ್ನ ಮಿತ್ತ್ ಹಲ್ಲೆ ಮಲ್ತ್‌ದೆ.
ಅಮ್ಮೆರೆನ್ ಇಲ್ಲಗ್ ಬರ್ರ ಪನ್ಡ್‌ದ್ ಆರೆನ ಎದುರುಡು 3 ಸರ್ತಿ ತಲಾಖ್‌ ಪನ್ಡ್‌ದ್, ನನ ಈ ಎನ್ನ ಬೊಡೆದಿ ಅತ್ತ್ ಪನ್ಡ್‌ದ್ ಇಲ್ಲರ್ದ್ ಪಿದಯಿ ಪಾಡ್ದೆ. ದಿಲ್ಫಾಜ್ನ ಅಮ್ಮೆ ಉಮರಬ್ಬ ಸರಿಯಾತಿನ ಬದಿ ತಿಕ್ಕ್‌ದಿಜಿ ಪನ್ಡ್‌ದ್ ಅಪಗಪಗ ಮಾನಸಿಕ ಕಿರುಕುಳ ಕೊರೊಂದಿತ್ತೆರ್. ಎನ್ನ ಅಜ್ಜಿ ನನ್ನ ಪುದರ್‌ಡ್ ದೀತಿನ ಕಾಸ್‌ನ್, ಅವು ಮೆಚೂರ್‌ ಆಯಿ ಬೊಕ್ಕ ಬರ್ಪಿನ 8 ಲ.ರೂ.ನ್ ಕೊರೊಡು ಪನ್ಡ್‌ದ್ ಕಿರುಕುಳ ಕೊರ್ತೆರ್” ಪನ್ದ್ ಹೀನಾ ಬರೆಪಾದಿನ ಒಯಿಲ್‌ದ ಪ್ರಕಾರ ಎಫ್ಐಆರ್‌ ದಾಕಲಾದಿತ್ತ್ಂಡ್.
3 ಕಾಯಿದೆಲೆನ ಅಡಿಟ್ ಪ್ರಕರಣ
ಆರೋಪಿನ ಮಿತ್ತ್ ವರದಕ್ಷಿಣೆ ನಿಷೇಧ ಕಾಯಿದೆ ಬೊಕ್ಕ ಮುಸ್ಲಿಂ ಪೊಂಜೊವುಲೆನ(ಮದಿಮೆದ ಹಕ್ಕುಲೆನ ರಕ್ಷಣೆ) ಕಾಯಿದೆದಡಿಟ್ ಪ್ರಕರಣ ದಾಕಲಾತ್ಂಡ್. ಆಯಗ್ ನ್ಯಾಯಾಂಗ ಬಂಧನ ಕೊರ್ತೆರ್.