Last updated on November 25th, 2024 at 06:26 pm
ಪುತ್ತೂರು ನವೆಂಬರ್ 25: ತೀರ್ದಿನ ಕೂಲಿ ಕಾರ್ಮಿಕನ ಪುನನ್ ಇಲ್ಲದ ಕೈತಲ್ ಸಾದಿ ಬರಿಟ್ ದೀತಿನ ಪ್ರಕರಣೊಗು ಸಂಬಂಧಿತ್‌ದ್ ಪ್ರಮುಖ ಆರೋಪಿ ಹೆನ್ರಿ ತಾವೋ ಸೇರ್ದ್ ಮೂವೆರೆನ್ ಪುತ್ತೂರು ಪೊಲೀಸೆರ್ ಕೈದ್ ಮಲ್ದೆರ್.
ಕೈದಾತಿನಕಲೆನ್ ಹೆನ್ರಿ ತಾವೋ, ಮಗೆ ಕಿರಣ್, ಬೊಕ್ಕ ಪ್ರಕಾಶ್ ಪನ್ದ್ ಗುರ್ತ ಪತ್ತ್‌ದೆರ್. ಆರೋಪಿಲು ಬೇಲೆಗ್ ಬತ್ತಿತ್ತಿನ ಕೂಲಿ ಕಾರ್ಮಿಕೆ ಶಿವಪ್ಪೆ ಪನ್ಪಿನಾರೆನ ಮೃತದೇಹೊನು ಪಿಕಪ್‌ಡ್ ಕನತ್‌ದ್ ಆರೆನ ಇಲ್ಲದ ಎದುರುದ ಸಾದಿಬರಿಟ್ ದೀದ್ ಪೋತಿನ ನಡಕೆ ನ.16ತಾನಿ ಸಾಲ್ಮರ ಕೆರೆಮೂಲೆಡ್ ನಡತಿತ್ತ್ಂಡ್. ಈ ಬಗೆಟ್ ಶಿವಪ್ಪೆ ಮೇರ್ ಬೆನೊಂದಿತ್ತಿನ ಸಂಸ್ಥೆದ ದನಿ ಹೆನ್ರಿ ತಾವೋ ಸೇರ್ದ್ ಬೊಕ್ಕ ಮೂವೆರೆ ಮಿತ್ತ್ ಪ್ರಕರಣ ದಾಕಲಾದಿತ್ತ್ಂಡ್.
ಜಡ್ತೆ ಮಲ್ತಿನ ಪೊಲೀಸೆರ್ ಸ್ಪ್ಯಾನಿ ಮೇಸ್ತ್ರಿ ಪನ್ಪಿನಾರೆನ್ ಸುರುಟ್ ಕೈದ್ ಮಲ್ತಿತ್ತೆರ್. ಈ ನಡುಟು ಪ್ರಕರಣೊಗು ಸಂಬಂಧಿತ್‌ದ್ ಹೆನ್ರಿ ತಾವೋನ ಮಗನ ಮಿತ್ತ್‌ಲಾ ಆದಿ ದ್ರಾವಿಡ ಸಂಘಟನೆ ಪೊಲೀಸೆರೆಗ್ ಒಯಿಲ್ ಕೊರ್ದಿತ್ತ್ಂಡ್. ಪ್ರಕರಣೊದ ಪ್ರಮುಖ ಆರೋಪಿ ಹೆನ್ರಿ ತಾವೋನ ಬಂಧನೊಗು ಆಗ್ರಹಿತ್‌ದ್ ಆದಿ ದ್ರಾವಿಡ ಸಮಾಜ ಸೇವಾ ಸಂಘೊದ ಮುತಾಲಿಕೆಡ್ ನ.22ತಾನಿ ಪೊರ್ಮ್ಬಾಟ ನಡತಿತ್ತ್ಂಡ್.