Last updated on November 30th, 2024 at 12:24 pm
ತೊರತ್ತಲ್: ತೊರತ್ತಲ್ ಮುಟ್ಟದ ಮೆಡಿಕಲ್‌ ಕಾಲೇಜಿಡ್ ಸುರುತ ವರ್ಸೊದ ವಿದ್ಯಾರ್ಥಿಗ್ ರ‍್ಯಾಗಿಂಗ್ ಮಲ್ದಿನ ಆರೋಪಡ್ ಮೂಜನೇ ವರ್ಸೊದ 9 ಜನ ಕೇರಳ ಮೂಲೊದ ವಿದ್ಯಾರ್ಥಿಲೆನ ಮಿತ್ತ ತೊರತ್ತಲ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಸಂತ್ರಸ್ತೆ ವಿದ್ಯಾರ್ಥಿಯೊರಿ ಒಯಿಲ್ ಬರೆಪಾದಿತ್ತ್‌ದ್, ಅವೇ ಕಾಲೇಜಿಡ್ ಕಲ್ತೊಂದುಪ್ಪುನ ಕೇರಳ ಮೂಲೊದ ಸಿದಾಯತ್‌, ಅಮಲ್‌ ಕೃಷ್ಣ ಸಾಜಿದ್‌, ಅಜೀಮ್‌ ಶಾ, ಆಡಮ್‌, ಫಯಾದ್‌, ಅತುಲ್‌ ಕೆ., ದಿಲೀಪ್‌, ಅಫೈಲ್‌, ಶಿಬಿನ್‌ ಆರೋಪಿಲು. ಇಡ್ಯಾ ಗ್ರಾಮೊಡು ಆರೋಪಿ ಸಿದಾಯತ್‌ ಇತ್ತಿನ ಬಾಡಾಯಿದಿಲ್ಲಡ್ ನಡಕೆ ನಡತ್‌ದ್ಂಡ್.
ಈ ವಿದ್ಯಾರ್ಥಿಲೆನ್ ಕಾಲೇಜಿನರ್ದ್ ಡಿಬಾರ್‌ ಮಲ್ದೆರ್ ಪನ್ದ್ ತೆರಿದ್ ಬೈದ್ಂಡ್.
ಕಾಲೇಜಿದ ಪೆರಿಯ ವಿದ್ಯಾರ್ಥಿ ಸಿದಾಯತ್‌ ನ. 25ತಾನಿ ಸಂಜೆ 5.45ಕ್ ಕಾಲ್ ಮಲ್ತ್‌ದ್, ಲೈವ್‌ ಲೊಕೇಶನ್‌ ಕಡಪುಡ್ದು ತನ್ನ ಬಾಡಾಯಿದಿಲ್ಲಗ್ ಬರ್ಯೆರೆ ಪಂದಿತ್ತ್‌ದ್, ಬೊಕ್ಕ ರ‍್ಯಾಗಿಂಗ್ ಮಲ್ದೆರ್. ತೊರತ್ತಲ್ ಪೊಲೀಸೆರ್ ಪ್ರಕರಣ ದಾಕಲ್ತೊಂದು ಜಡ್ತೆ ಮಲ್ತೊಂದುಲ್ಲೆರ್.