ಮಾಜಿ ಮುಖ್ಯಮಂತ್ರಿ ಎಸ್.ಎಂ. ಕೃಷ್ಣ ತೀರ್ಯೆರ್

Last updated on December 10th, 2024 at 06:50 am

ಕರ್ನಾಟಕೊದ ಮಾಜಿ ಮುಖ್ಯಮಂತ್ರಿ ಬೊಕ್ಕ ಕೇಂದ್ರದ ಮಾಜಿ ಸಚಿವೆ ಆದಿತ್ತಿನ ಎಸ್.ಎಂ. ಕೃಷ್ಣ ಮೇರ್ ತೀರ್ಯೆರ್. ಬೆಂಗ್ಳೂರ್‌ದ ಸದಾಶಿವನಗರೊದ ತನ್ನ ಇಲ್ಲಡ್ ರಾತ್ರೆ ತೀರ್ದೆರ್. ಮೇರೆಗ್ 92 ವರ್ಸ ಪ್ರಾಯ ಆದಿತ್ತ್ಂಡ್.

ವಯೋಸಹಜ ಕಾಯಿಲೆರ್ದ್ ನರಲೊಂದಿತ್ತಿನ ಮೇರ್ ಬೆಂಗ್ಳೂರ್‌ದ ಸದಾಶಿವನಗರೊದ ಇಲ್ಲಡ್ ತೀರ್ದೆರ್. ಕರ್ನಾಟಕೊದ ಪೆರಿಯ ರಾಜಕಾರಣಿಲೆಡ್ ಮೇರ್ಲಾ ಒರಿ. 1999 ರ್ದ್ 2004 ಮುಟ್ಟ ಕರ್ನಾಟಕ ರಾಜ್ಯೊದ ಮುಖ್ಯಮಂತ್ರಿ ಆದಿತ್ತೆರ್. ಮಹಾರಾಷ್ಟ್ರ ರಾಜ್ಯೊದ ಮಾಜಿ ರಾಜ್ಯಪಾಲೆರಾದಿತ್ತಿನ ಮೇರ್, ಕೇಂದ್ರ ವಿದೇಶಾಂಗ ಸಚಿವೆರಾದ್‌ಲಾ ಬೇಲೆ ಮಲ್ದೆರ್. ವಿದ್ಯಾಭ್ಯಾಸೊದ ದೃಷ್ಟಿಡ್, ಕರ್ನಾಟಕೊದ ಎಚ್ಚ ಸುಶಿಕ್ಷಿತ ಮುಖ್ಯಮಂತ್ರಿಲೆಡ್ ಕೃಷ್ಣೆರ್ಲಾ ಒರಿ.

ಮೇರ್ ಪಾಕ ಸಮೆ ಕಾಂಗ್ರೆಸ್ ಪಕ್ಷೊದ ಪದುಕೆ ಆದಿತ್ತೆರ್, ಪಗತೊಂದಿತ್ತಿನ ರಾಜಕೀಯ ಸನ್ನಿವೇಶೊಲೆರ್ದಾವರ ಮಾರ್ಚ್ 2017 ಟ್ ಭಾರತೀಯ ಜನತಾ ಪಕ್ಷೊನು ಗೋಡ್ಯೆರ್. ಮೇರ್ 1999 ರ್ದ್ 2004 ಮುಟ್ಟ ಕರ್ನಾಟಕೊದ 16 ನೇ ಮುಖ್ಯಮಂತ್ರಿಯಾದಿತ್ತೆರ್ ಬೊಕ್ಕ 2004 ರ್ದ್ 2008 ಮುಟ್ಟ ಮಹಾರಾಷ್ಟ್ರೊದ 19 ನೇ ರಾಜ್ಯಪಾಲೆರಾದಿತ್ತೆರ್.

ಎಸ್.ಎಂ.ಕೃಷ್ಣ ಮೇರ್ ಡಿಸೆಂಬರ್ 1989 ರ್ದ್ ಜನವರಿ 1992 ಮುಟ್ಟ ಕರ್ನಾಟಕ ವಿಧಾನಸಭೆತ ಸ್ಪೀಕರ್ ಆದ್ ಸೇವೆ ಮಲ್ದೆರ್.1979 ರ್ದ್ 2014 ಮುಟ್ಟ ಬೇತೆ ಬೇತೆ ಪೊರ್ತುಲೆಡ್ ಲೋಕಸಭೆ ಬೊಕ್ಕ ರಾಜ್ಯಸಭೆತ ಪದುಕೆರಾದಿತ್ತೆರ್. ಮೆರೆಗ್ 2023ತ ಸಾಲ್‌ದ ಪದ್ಮವಿಭೂಷಣ ಪ್ರಶಸ್ತಿ ತಿಕ್ಕ್‌ದ್ಂಡ್.