Last updated on December 10th, 2024 at 06:27 pm
ಗ್ಯಾಸ್ ಸಿಲಿಂಡರ್ ಕೊನೊಪುನ ಟಾಟಾ ಏಸ್‌ ಗಾಡಿ ಬೈಕ್‌ಗ್ ಎಡ್ತ್‌ದ್ ಬೈಕ್ ಬುಡೊಂದಿತ್ತಿನ ಕಾರ್ ರೇಸ್ ಚಾಂಪಿಯನ್ ರಂಜಿತ್‌ ಬಲ್ಲಾಳ್ (59) ಅಲ್ಪನೇ ತೀರ್ದಿನ ನಡಕೆ ಕುಂದಾಪುರ – ಬೈಂದೂರು ರಾಷ್ಟ್ರೀಯ ಪೆರ್ಸಾದಿ 66ರ ಅರಾಟೆ ಸಂಕದಲ್ಪ ನಡತ್‌ದ್ಂಡ್.
ರಂಜಿತ್‌ ಬಲ್ಲಾಳ್ ಕುಡ್ಲ ಮೂಲೊದ ಕೆ.ಬಿ. ಯುವರಾಜ ಬಲ್ಲಾಳ್ ಮೆರೆನ ಮಗೆ ಆದಿತ್ತ್‌ದ್, ಮೇರ್ ಇಲ್ಲದಕಲೆನೊಟ್ಟುಗು 3 ದಿನ ದುಂಬುದೆ ಗೋವಾಗೆ ಪ್ರವಾಸಗ್ ಪೋದಿತ್ತೆರ್. ರಂಜಿತ್‌ ಬೈಕ್‌‌ಡ್ ಬರೊಂದಿತ್ತೆರ್ನ್ಡ, ಪಿರವುಡು ಇಲ್ಲದಕುಲು ಮಾತ ಬರೊಂದಿತ್ತೆರ್. ಆಂಡ ಅರಾಟೆ ಸಂಕೊರ್ದು ಒಂತೆ ಪಿರವು ಒಂಜಿ ಸಂಕೊಡು ಸಂಚಾರ ನಿಷೇದಿತ್‌ದ್ ಇತ್ತಿನೆರ್ದಾವರ ಡೈವರ್ಶನ್‌ ಕೊರ್ದಿತ್ತ್‌ದ್, ಅಲ್ಪ ಟಾಟಾ ಏಸ್‌ ಡ್ರೈವರ್ ಗಾಡಿನ್ ಒರರ್ದ್ ಒರನೆ ಮೆಲ್ಲ ಮಲ್ತ್‌ದೆರ್. ಈ ಪೊರ್ತುಡು ಪಿರವುಡು ಬರೊಂದಿತ್ತಿನ ಬೈಕ್ ಟಾಟಾ ಏಸ್‌ ಗಾಡಿಗ್ ಎಡ್ತ್‌ದ್ಂಡ್. ಎಡ್ತಿನೆಟ್ ಬೈಕ್ ಬುಡೊಂದಿತ್ತಿನ ರಂಜಿತ್‌ ಬಲ್ಲಾಳ್ ಅಲ್ಪನೇ ತೀರ್ದೆರ್.
ರಂಜಿತ್‌ ಕಾರ್ ರ್‍ಯಾಲಿಡ್ ನ್ಯಾಶನಲ್‌ ಚಾಂಪಿಯನ್ ಆದಿತ್ತ್‌ದ್, ಪ್ರತಿಭಾವಂತೆರಾದಿತ್ತಿನ ಮೇರ್ ನೂದೆರ್ದ್‌ಲಾ ಎಚ್ಚ ಟ್ರೋಫಿಲೆನ್ ಗೆದ್‌ದಿತ್ತೆರ್. ಆಟೋ ಕ್ರಾಸ್‌ ಹಿಲ್‌ ಕ್ಲೈಂಬ್‌ಡ್ ಮಾತೆರೆರ್ದ್ ಬರಸ್‌ದ ಡ್ರೈವರ್ ಆದಿತ್ತೆರ್. ಚಾಂಪಿಯನ್‌ಶಿಪ್‌ಲೆಡ್ ಪಾಲ್‌ಪಡೆಪೆದಿನ ರಂಜಿತ್‌ ಪಾಕ ಜನೊಕು ತರಬೇತಿಲಾ ಕೊರ್ದಿತ್ತ್‌ದ್, ಅವೆಟ್‌ಲಾ ಕೆಲ ಜನ ರಾಷ್ಟ್ರೀಯ ಚಾಂಪಿಯನ್‌‌ಲಾ ಆದಿತ್ತೆರ್. ಆತೇ ಅತ್ತಂದೆ ಬ್ಯಾಡ್ಮಿಂಟನ್‌, ಕ್ರಿಕೆಟ್‌ ಬೊಕ್ಕ ಸ್ನೂಕರ್‌ ಗೊಬ್ಬುಲಾ ಗೊಬ್ಬೆದೆರ್.