Last updated on December 11th, 2024 at 06:05 pm
ಪುತ್ತೂರು ಡಿಸೆಂಬರ್ 11: ಅಯ್ಯಪ್ಪ ಸ್ವಾಮಿನ ಭಕ್ತೆರೆಗ್ ಸ್ವಾಮಿನ ಮೈಮೆದ ಪ್ರತ್ಯಕ್ಷ್ಯ ದರ್ಶನ ಆಪುಂಡು ಪನ್ಪಿನ ಪಾಕ ಸುದ್ದಿಲು ಕೇನೊಂದೆ ಇಪ್ಪುವ. ಅವ್ವೇ ನೆವನೊಗು ಅಯ್ಯಪ್ಪ ಸ್ವಾಮಿನ ಮಾಮಲ್ಲ ಕ್ಷೇತ್ರ ಶಬರಿಮಲೆಗ್ ಬರ್ಪಿನ ಭಕ್ತೆರೆ ಸಂಖ್ಯೆ ವರ್ಸೊರ್ದು ವರ್ಸ ಎಚ್ಚ ಆವೊಂದೇ ಇಪ್ಪುಂಡು. ಅಂಚಿನವೇ ಒಂಜಿ ಕಾರ್ನಿಕ ಪುತ್ತೂರ್‌ಡ್ ಬೊಲ್ಪುಗು ಬೈದ್ಂಡ್. ಒಂದು ಉಸ್ಕ್ ದಮ್ಮ್ ಬಾಯಿ ಬರಂದಿನ ಆಣ್ ಒರಿ ಒಂಜಿ ವರ್ಸೊಗು ದುಂಬು ಮಾಲೆ ಪಾಡ್ದ್ ಮಲೆಕ್ ಪೋದಿತ್ತೆರ್. ಈ ಸರ್ತಿ ಕುಡ ಮಾಲೆ ಪಾಡ್ದಿನ ಬಾಲೆ ಸ್ವಾಮಿ ಇತ್ತೆ ಪಾತೆರ್ಯೆರ ಪತ್ತ್‌ದೆರ್. ದೈವ-ದೇವೆರೆನ್ ನಂಬುನಕ್ಲೆಗ್ ಈ ವಿಚಾರ ನಂಬೊಲ್ಗೆದ ವಿಷಯ ಆಂಡ, ನಂಬಂದಿನಕಲೆಗ್ ಉಂದೊಂಜಿ ಚರ್ಚೆಯ ವಿಷಯ ಆದುಂಡು.
ಪುತ್ತೂರ್‌ದ ಸಾಮೆತ್ತಡ್ಕ ನಿವಾಸಿ ಪ್ರಸನ್ನ ಸ್ವಾಮಿ ಇತ್ತೆ ಪಾತೆರುನ ಮುಕೇನ ಅಯ್ಯಪ್ಪ ಮಾಲಾಧಾರಿಲೆಗ್ ಸೋದ್ಯ ಕನತ್‌ದೆರ್. ಎಲ್ಯ ಜೋಕುಲು ಸುರು ಸುರುಕು ಎಂಚ ಕೊಞ್ಞ ಪಾತೆರುವೆರೋ, ಅಂಚೆನೇ ಈ ಆಣ್‌ಲಾ ಪಾತೆರ್ಯೆರ ಸುರು ಮಲ್ದೆರ್. ಒಂಜಿ ಶಬ್ದಲಾ ಸಮ ಪಾತೆರಂದಿನ ಪುತ್ತೂರು ನಿವಾಸಿ ಪ್ರಸನ್ನ ಪನ್ಪಿನ ಈ ಆಣ್ ಕರಿನ ವರ್ಸ ಮಾಲೆ ಪಾಡ್ದ್, ನಲ್ಪತ್ತೆಣ್ಮ ದಿನೊತ ವೃತ ಪತ್ತ್‌ದ್ ಶಬರಿಮಲೆ ಏರ್ದಿತ್ತೆರ್.
ಸುಮಾರು 48 ಮೈಲಿ ಬಂಙೊದ ಕಾಡಸಾದಿಡೆ ಪೋದು ಸ್ವಾಮಿ ದರ್ಶನೊನು ಮಲ್ತಿತ್ತಿನ ಈ ಆಣ್ ಇತ್ತೆ ಪಾತೆರ್ಯೆರ ಪತ್ತ್‌ದೆರ್. ಒಂದಜಿ ಶಬ್ದ ಪಾತೆರ್ರಲಾ ಒಂಜಿ ವರ್ಸೊಗು ದುಂಬು ಬಂಙ ಬರೊಂದಿತ್ತಿನ ಈ ಆಣ್ ಇನಿ ಅಯ್ಯಪ್ಪ ಸ್ವಾಮಿನ ಶರಣು ಲೆಪ್ಪುವೆರ್. ಪಾತೆರ ಬಾಯಿರ್ದೇ ಬರೊಂದಿತ್ತ್‌ದ್, ಎಣ್ಮ ಶರಣು ಪ್ರಸನ್ನ ದಾಲ ಬಂಙದಾಂತೆ ಲೆಪ್ಪುವೆರ್. ಬೊಕ್ಕದ ಶಬ್ದೊಲು ಆತ್ ಸ್ಪಷ್ಟ ಇಜ್ಜಿಂಡಲಾ, ಅರ್ಥ ಆಪಿನ ಲೆಕ ಉಂಡು.
ಕಡೀರ ಸರ್ತಿ ಮಾಲೆ ಪಾಡ್ದಿನ ಪೊರ್ತುಡು ಕೈ ಬಾಸೆಡ್ ಪಾತೆರೊಂದಿತ್ತಿನ ಪ್ರಸನ್ನೆ ಬಾಯಿಡ್ ಪಾತೆರುನ ತೂದು ಗುರು ಸ್ವಾಮಿಲೆಗ್ ಬಾರಿ ಸಂತೋಸಾತ್ಂಡ್.
ಪ್ದಸನ್ನೆ ಪುತ್ತೂರ್‌ದ ಮಹಾಲಿಂಗೇಶ್ವರ ಐಟಿಐ ಡ್ ರಡ್ಡನೇ ವರ್ಸೊದ ಸಿವಿಲ್ ಡಿಪ್ಲೊಮಾ ಮಲ್ತೊಂದುಲ್ಲೆರ್. ಇತ್ತೆ ಮೆರೆನ ಸ್ವಭಾವೊಡಾತಿನ ಪಗತೆ ಆರೆನ ಮಿತ್ತ್ ಅಯ್ಯಪ್ಪ ಸ್ವಾಮಿ ದಯೆ ತೋಜಾದೆರ್ ಪನ್ಪಿನ ಪೆರಿಯ ಅಯ್ಯಪ್ಪ ಮಾಲಾಧಾರಿಲೆನ ಅಭಿಪ್ರಾಯ.