Last updated on December 14th, 2024 at 09:11 am
ಅವ್ 2009ನೇ ಇಸವಿ, ತುಳುನಾಡ್ ದ ಪರತಿರಿಟ್ ಬರೆದ್ ದೀಪಿನಂಚ ವಿಶ್ವ ತುಳು ಸಮ್ಮೇಳನ ಉಜಿರೆಡ್ ನಡತಿತ್ತ್ಂಡ್. ಆ ಸಮ್ಮೇಳನೊಗು ಬೈದಿತ್ತಿನ ಅಪಗದ ಮುಖ್ಯಮಂತ್ರಿ ಯಡಿಯೂರಪ್ಪೆರ್ ಸುರುತ ಸಲ ತುಳುನು ರಾಜ್ಯದ ಅಧಿಕೃತ ಬಾಸೆ ಮಲ್ಪುವ ಪನ್ದ್ ಆಶ್ವಾಸನ ಕೊರ್ದಿತ್ತೆರ್.
ತುಳು ಬಾಸೆನ್ ಸಂವಿಧಾನದ 8ನೇ ಪರಿಚ್ಚೇದೊಗು ಗೋಡ್ಯಾವೊಡು ಪನ್ಪಿನ ಬೇಡಿಕೆ 1971ನೇ ಇಸವಿರ್ದ್ ಉಂಡು ಆಂಡಲಾ ಅವ್ ಕೊಡಿ ಎತ್ತಂದಿನ ತೂದು ನಮ್ಮಕುಲು ತುಳುಕು ಸುರುಟು ಕರ್ನಾಟಕೊಡು ಮಾನ್ಯತೆ ತಿಕ್ಕ್ಂಡ ಬೊಕ್ಕ ಕೇಂದ್ರೊಡುಲಾ ಮಾನಾದಿಗೆ ತಿಕ್ಕರೆ ಸುಲಬ ಆವು ಪನ್ದ್ ರಾಜ್ಯೊಡು ಬಾಲೆಗ್ ಅಧಿತೃತ ಆಡಳಿತ ಬಾಸೆ ಪನ್ಪಿನ ಸ್ಥಾನಮಾನ ಕೊರೊಡು ಪನ್ದ್ ಬೇಡಿಕೆ ದೀವರೆ ಪತ್ತಿಯೆರ್.
2009ಡು ಕೊರ್ಪ ಕೊರ್ಪ ಪನ್ದ್ ಮಂಗೆಕೋಲ ಕಟ್ಟಾವರೆ ಸುರು ಮಲ್ತಿನ ಕರ್ನಾಟಕ ಸರಕಾರ ಇದಮುಟ್ಟಲಾ ತುಳುವೆರೆನ್ ಮಂಗೆ ಮಲ್ತೊಂದೇ ಉಂಡು. ಅವೆರ್ದ್ ಬೊಕ್ಕ ತುಳುನಾಡ್ ದ ಒಂಜಿ ಜನ ಮುಖ್ಯಮಂತ್ರಿ ಆಯೆರ್, ತುಳುವೆ ಸಂಸ್ಕೃತಿ ಸಚಿವೆ ಆಯೆರ್, ಕೇಂದ್ರೊಡು ಮಲ್ಲ ಮಲ್ಲ ಮಂತ್ರಿಲಾಯೆರ್, ತುಳುನಾಡ್ ದ ಜನ ಸ್ಪೀಕರ್ಲಾ ಆಯೆರ್, ಆಡಳಿತ ಪಕ್ಷೊದ ರಾಜ್ಯಾಧ್ಯಕ್ಷೆಲಾ ಆಯೆರ್, ಆಂಡ ಮೊಕಲೆನ ಏರ್ನ ಕೈಟ್ಲಾ ತುಳುಕು ಮಾನಾದಿಗೆ ದೆಪ್ಪಾದ್ ಕೊರಿಯರೆ ಆತಿಜಿ.
ಕರ್ನಾಟಕ ಸರಕಾರ ತುಳುಕು ಮಾನಾದಿಗೆ ಕೊರ್ಪುಂಡು, ತುಳುನು ಒರಿಪಾವುಂಡು ಪನ್ಪಿನ ನಂಬುನ ಇಸಯ ಅತ್ತ್. ಅವ್ ಇದಮುಟ್ಟ ತುಳುಕು ದಾಲ ಎಡ್ಡೆ ಮಲ್ದಿನ ಇಜ್ಜಿ. ತುಳುಕು ಸ್ಥಾನಮಾನ ಕೊರೊಡಾಂಡ 15 ವರ್ಸ ಬೋಡುಂದು ಇಜ್ಜಿ. ಒರ ವರದಿ, ಒರ ಕಾನೂನು ಇಲಾಖೆ, ಒರ ಬೇತೆ ರಾಜ್ಯೊಲೆಗ್ ಸಮಿತಿ ಪನ್ಪಿನ ಮರ್ಲ್ ನ್ ತುಳುವೆರ್ ನಂಬುನವೇ ಸೋಜಿಗ. ಏತ್ ಮಂಗೆ ಮಲ್ತ್ಂಡಲಾ ಮಂಗೆ ಆಪಿನಕುಲು ಉಪ್ಪುನಗ ಮಂಗೆ ಮಲ್ಪುನಕಲೆಗ್ ದಾನೆ. ಕರ್ನಾಟಕ ರಾಜ್ಯೊಡು ರಾತ್ರೆ ಪಗೆಲ್ ಆವೊರ್ದುಂಬು ಕಾನೂನು ಪಗತಿನ ಉಂಡು, ಪೊಸ ನೀತಿಲೆನ್ ಕನತಿನಲಾ ಉಂಡು, ಇಂಚ ಉಪ್ಪುನಗ ರಾಜ್ಯದ ರಡ್ಡ್ ಜಿಲ್ಲೆಲೆಡ್ ಅವ್ಲಾ ರಡ್ಡನೇ ಅಧಿಕೃತ ಬಾಸೆ ಮಲ್ಪರೆ ಈತ್ ನಾಟಕೊಲು ದಾಯೆಗ್ ಪನ್ದ್ ತುಳುವೆರ್ ಅರ್ಥ ಮಲ್ತೊನೊಡು.