Last updated on December 26th, 2024 at 08:50 am
ಉತ್ತರ ಪ್ರದೇಶ: ಮದಿಮೆದ ಪ್ರಾಯ ಆದ್, ಪೊಣ್ಣು ತಿಕ್ಕಂದೆ ಇಪ್ಪುನ ಆಣುಲೆನೇ ಟಾರ್ಗೆಟ್ ಮಲ್ತ್‌ದ್ ದಗೆ ಮಲ್ಪುನ ಪೊಣ್ಣುಲೆನ ಸಂಖ್ಯೆ ಇಂಚಿಪ್ಪೊಗು ಎಚ್ಚ ಆವೊಂದುಂಡು. ಇಂಚ ಪಾಕ ಜನಕ್ ಮದಿಮೆದ ಪುದರ್‌ಡ್ ಮಂಗೆ ಮಲ್ದಿನ ಕಿಲಾಡಿ ಪೊಣ್ಣನ್ ಪೊಲೀಸೆರ್ ಕೈದ್ ಮಲ್ದೆರ್. ಉಂದೊಂಜಿ ಮಲ್ಲ ಮಾಫಿಯಾ ಲೆಕ ನಡತೊಂದಿತ್ತ್‌ದ್, ಇರ್ವೆರ್ ಪೊಂಜೊವುಲು ಮಾತ್ರ ಅತ್ತಂದೆ ಈ ಬೇಪುದ ಪಿರವುಡುಡು ಇತ್ತಿನ ಆಂಜೊವುಲೆನ್ಲಾ ಪೊಲೀಸೆರ್ ಪತ್ತ್‌ದೆರ್.
ಉತ್ತರ ಪ್ರದೇಶೊದ ಬಂದಡ್ ಈ ನಡಕೆ ನಡತ್‌ದ್ಂಡ್. ಕೈದಾತಿನ ಪೊಣ್ಣು ಆಜಿ ಮದಿಮೆ ಆದಿತ್ತ್‌ದ್, ಇದಮುಟ್ಟ ಆತಿನ ಮದಿಮೆಲೆಡ್ ಮದಿಮೆ ಆದ್ ಪೋತಿನ ಇಲ್ಲಲೆರ್ದ್ ಪದ್ದೈ ಬಂಗಾರ್ ಪಣವು ಕಂಡ್‌ದ್ ಪದ್ರಾಡಾದಿತ್ತಲ್. ಇತ್ತೆ ಅವ್ವೇ ರೀತಿಡ್ 7ನೇ ಮದಿಮೆದ ಅಟ್ಟನೆ ಆವೊಂದುಪ್ಪುನಗ ಆಲ್ ಪೊಲೀಸೆರೆ ಬಲೆಕ್ ಬೂರ್ದಲ್ ಪನ್ದ್ ಬಂದದ ಎಚ್ಚಿಗೆದ ಪೊಲೀಸ್ ಸೂಪರಿಟೆಂಡೆಂಟ್ ಶಿವರಾಜ್ ಒಲವು ಕೊರ್ತೆರ್.
ಪೊಲೀಸೆರೆ ಪ್ರಕಾರ, ಈ ಕೈದಾತಿನ ಇರ್ವೆರ್ ಪೊಂಜೊವುಲೆಡ್ ಪೂನಾಂ ಪನ್ಪಿನಾಲ್ ಮದಿಮಲೆಲೆಕ ಪೋಸ್‌ ಕೊರ್ಯಲ್ನ್ಡ ಕುಡೊರ್ತಿ ಪೊಂಜೊವು ಸಂಜನಾ ಗುಪ್ತಾ ಪೊಣ್ಣನ ಅಪ್ಪೆಲೆಕ ನಾಟಕ ಮಲ್ತೊಂದಿತ್ತಲ್, ಅಂಚೆನೇ ಈ ಗ್ಯಾಂಗ್‌ಡಿತ್ತಿನ ಇರ್ವೆರ್ ಆಂಜೊವುಲು ವಿಮಲೇಶ್ ವರ್ಮಾ ಬೊಕ್ಕ ಧರ್ಮೇಂದ್ರ ಪ್ರಜಾಪತಿ ಪನ್ಪಿನಕುಲು, ಮದಿಮೆಗ್ ಪೊಣ್ಣು ನಾಡೊಂದುಪ್ಪುನ ಆಣುಲೆನ್ ನಾಡ್ದ್ ಪೂನಂಗ್ ಗುರ್ತ ಮನ್ಪಾವೆದೆರ್. ಕಾಲಿ ಈತೇ ಅತ್ತಂದೆ ಪೊಣ್ಣನ್ ನಾಡ್ದ್ ಕೊರ್ತ ಪನ್ದ್ ಪನೊಂದು ಆಣನ ಕಡೆರ್ದ್ ವಿಮಲೇಶ್ ವರ್ಮಾ ಬೊಕ್ಕ ಧರ್ಮೇಂದ್ರ ಪ್ರಜಾಪತಿ ಕಾಸ್ ಪೀಂಕಾವೊಂದಿತ್ತೆರ್.
ಉಂದಾಯಿ ಬೊಕ್ಕ ಸಿಂಪಲ್ ಆದ್ ಕೋರ್ಟ್ ಮ್ಯಾರೇಜ್ ಆವೊಂದಿತ್ತ್ಂಡ್. ಮದಿಮೆ ಆಯಿ ಬೊಕ್ಕ ಮದಿಮಲ್ ಪೂನಂ ಆಣನ ಇಲ್ಲಗ್ ಪೋಪೆದಲ್. ಇಲ್ಲದಕ್ಲೆನ ನಂಬೊಲ್ಗೆ ಗೆಂದ್‌ದ್ ಆಲ್ ಅಲ್ಪ ಎಡ್ಡೆ ಪೊರ್ತು ತೂದು ಏರ್ಲಾ ಇಜ್ಜಂದಿನಪಗ ಇತ್ತಿನ ಕಾಸ್ ಬಂಗಾರ್ ಮಾತಾ ಪೂಜೊಂದು ಅಲ್ಪರ್ದ್ ಪದ್ರಾಡಾಪೆದಲ್.
ಏಳನೇ ಮದಿಮೆ ಆಯೆರ ಶಂಕರ್ ಉಪಾಧ್ಯಾಯ ಪನ್ಪಿನಾರೆಡ ಪಾತೆರಕತೆ ಆದ್ ಮದಿಮೆಗ್ ಕೋರ್ಟ್‌ಗ್ ಎತ್ತ್‌ನಗ ಆರೆಗ್ ಸಂಶಯ ಬತ್ತ್‌ದ್ ಪೋಲೀಸೆರೆ ಸಕಾಯೊಡು ಈ ಗ್ಯಾಂಗ್‌ನ್ ಅರೆಸ್ಟ್ ಮನ್ಪಾದೆರ್.