Last updated on December 26th, 2024 at 04:29 pm
ಕುಡ್ಲ: 500ರ್ದ್‌ಲಾ ಎಚ್ಚ ಡುಪ್ಲಿಕೇಟ್ ಬಂಗಾರ್‌ದ ಕಾಜಿಲೆನ್ ಅಡವು ದೀದ್ ಒರಿ ಕುಡ್ಲದ ಸಮಾಜ ಸೇವಾ ಸಹಕಾರಿ ಸಂಘೊರ್ದು 2 ಕೋಟಿರ್ದ್‌ಲಾ ಎಚ್ಚ ಕಡ ಗೆತೊಂದಿನ ನಡಕೆ ನಡತಿತ್ತ್‌ದ್, ಇತ್ತೆ ಈ ದಗೆ ಬೊಲ್ಪುಗು ಬತ್ತಿನೇ ಆರೋಪಿ ಪದ್ರಾಡಾತೆ.
ಪುತ್ತೂರು ತಾಲೂಕ್‌ದ ಈಶ್ವರಮಂಗಿಲ ಗ್ರಾಮೊದ ಅಬೂಬಕ್ಕರ್ ಸಿದ್ದಿಕ್ ದಗೆ ಮಲ್ದಿನ ಆರೋಪಿ. 500 ಡುಪ್ಲಿಕೇಟ್ ಬಂಗಾರ್‌ದ ಕಾಜಿಲೆನ್ ಅಡವು ದೀದ್ ಅಬೂಬಕ್ಕರ್ ಸಿದ್ದಿಕ್ 2,11,89,800 ರೂ. ಕಡ ಗೆತೊಂದು, ದಗೆ ಮಲ್ತ್‌ದೆ. ಅಂಚಾದ್, ಅಬೂಬಕ್ಕರ್ ಸಿದ್ದಿಕ್, ಬ್ಯಾಂಕ್ ಆಡಳಿತ ಮಂಡಳಿ ಬೊಕ್ಕ ನೌಕರೆರೆ ಮಿತ್ತ್ ಕುಡ್ಲದ ಸೆನ್ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್.
ಸಮಾಜ ಸೇವಾ ಸಹಕಾರಿ ಸಂಘೊಗು ಜಿಲ್ಲೆಡ್ ಪಾಕ ಶಾಖೆಲು ಇತ್ತ್‌ದ್, ಈ ಅವ್ಯವಹಾರದ ಆರೋಪ ಕೇಂದ್ ಬೈದಿನ ಕುಡ್ಲದ ಪಡೀಲ್‌ದ ಶಾಖೆಡ್. ಬಂಗಾರ್ ಪರೀಕ್ಷೆ ಮನ್ಪುವ ಸರಪೆ, ಬ್ಯಾಂಕ್‌ದ ಅಧ್ಯಕ್ಷೆ, ನಿರ್ದೇಶಕೆರ್ ಮ್ಯಾನೇಜರ್, ಸಿಬ್ಬಂದಿ ಸಹಕಾರೊರ್ದು ಅವ್ಯವಹಾರ ನಡತ್‌ದ್ಂಡ್ ಪನ್ಪಿನ ಆರೋಪ ಉಂಡು. ಈ ಬಗೆಟ್ ಬ್ಯಾಂಕ್‌ದ ಪದುಕೆರ್, ಮಾಜಿ ನಿರ್ದೇಶಕೆ ಡಿ.ಲೋಕನಾಥ್ ಕೊರ್ತಿನ ಒಯಿಲ್‌ದ ಪ್ರಕಾರ 28 ಜನೊತ ಮಿತ್ತ್ ಪ್ರಕರಣ ದಾಕಲಾತ್ಂಡ್. ಪ್ರಕರಣೊಗು ಸಂಬಂಧಿತ್ ದ್ ಬ್ಯಾಂಕ್‌ದ ಸರಪೆ ವಿವೇಕ್ ಆಚಾರ್ಯ ಪನ್ಪಿನಾರೆನ್ ಕೈದ್ ಮಲ್ದೆರ್. ದೆಂಗ್‌ತಪ್ಪಾದಿನ ಆರೋಪಿ ಅಬೂಬಕ್ಕರ್ ಸಿದ್ದಿಕ್‌ನ್ ನಾಡುನ ಬೇಲೆ ನಡತೊಂದುಂಡು.
ಈ ಪ್ರಕರಣೊಗು ಸಂಬಂಧಿತ್‌ದ್ ಬ್ಯಾಂಕ್ ಸ್ಪಷ್ಟನೆ ಕೊರ್ದಿತ್ತ್‌ದ್, ಎಂಕ್ಲೆನ ಸಂಘೊಡು ಇಂಚಿನ ಒಂಜಿ ನಡಕೆ ಆತ್‌ನ್ಡ್ ಪನ್ದ್ ಕಲು ಪನೊಂದುಲ್ಲೆರ್. ನಡಕೆದ ಬಗೆಟ್ ಎಂಕ್ಲ ಕಾನೂನು ರೀತಿಡ್ ಮಾತಾ ಕ್ರಮ ಗೆತೊಂದ. ಏರೆನ ಮಿತ್ತ್ ವಾ ಕ್ರಮ ಗೆತೊನೊಡು ಪನ್ಪಿನೆನ್ ಲಾ ಎಂಕ್ಲೆನ ಸಂಘೊದ ಆಡಳಿತ ಮಂಡಳಿದ ಇನಯ ಲೆತ್ತ್‌ದ್ ತೀರ್ಮಾನ ಮಲ್ದ್ಂಡ್ ಪನ್ದ್ ತೆರಿಪಾದೆರ್. ನನ ನಡಪುನ ಚುನಾವಣೆದ ದೃಷ್ಟಿಡ್ ಇಂಚಿನ ಬೇಲೆಲೆನ್ ಮಲ್ತೊಂದುಲ್ಲೆರ್. ಉಂದೆಕ್ ನನದ ದಿನೊಟು ಕಾನೂನು ರೀತಿಡ್ ಬೋಡಾಪಿನ ಕ್ರಮ ಗೆತೊನುವ. ಎಂಕ್ಲೆಗ್ ಪೋಲೀಸೆರೆ ಮಿತ್ತ್ ಅಂಚೆನೇ ನ್ಯಾಯಂತಡೆತ ಮಿತ್ತ್ ಗೌರವ, ನಂಬಿಕೆ ಉಂಡು ಪನ್ದ್ ಪನ್ಡೆರ್.