Last updated on December 31st, 2024 at 02:47 pm
ಮಾಜಿ ಸಂಸದೆ ನಳಿನ್ ಕುಮಾರ್ ಕಟೀಲ್‌ರೆನ ಮಾರ್ಗದರ್ಶನ ಬೊಕ್ಕ ತೆನ್ಕಾಯಿ ಕುಡ್ಲ ಶಾಸಕೆ ಡಿ.ವೇದವ್ಯಾಸ ಕಾಮತ್ ಮೆರೆನ ಮುತಾಲಿಕೆಡ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನ ಅಂಚೆನೇ ಜಿಲ್ಲಾಡಳಿತೊದ ಸಾಕಾರೊಡು ‘ಮಂಗಳೂರು ಸ್ಟ್ರೀಟ್ ಫುಡ್ ಫಿಯೆಸ್ಟಾ’ ಸೀಸನ್-3 ಉಂದುವೇ ಬರ್ಪಿನ 2025ತ ಜನವರಿ 18 ರ್ದ್ 22ರ ಮುಟ್ಟ 5 ದಿನ ನಡಪರೆಗುಂಡು.
ಜನವರಿ 18ದ ಬಯ್ಯಡ್ ಜಿಲ್ಲೆದ ಪಾಕ ಗಣ್ಯೆರೆರ್ದ್ ಸೀಸನ್-3 ಅಧಿಕೃತವಾದ್ ತೊಡಂಗೆರೆ ಇತ್ತ್‌ದ್ , ಕರಾವಳಿ ಉತ್ಸವ ಮೈದಾನೊರ್ದು ನಾರಾಯಣ ಗುರು ಸರ್ಕಲ್, ಮಣ್ಣಗುಡ್ಡೆ ಗುರ್ಜಿ ಸರ್ಕಲ್, ಕೆನರಾ ಉರ್ವ ಮುಟ್ಟ ದಿನೋಲ ಬಯ್ಯ 4ರ್ದ್ ರಾತ್ರೆ 10 ಮುಟ್ಟ ಈ ತೆನಸ್‌ದ ಪರ್ಬ ನಡಪುಂಡು ಪನ್ದ್ ಇನಿ ನಡತಿನ ಪತ್ರಿಕಾಗೋಷ್ಠಿಡ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನ ಗೌರವಾಧ್ಯಕ್ಷೆ ಗಿರಿಧರ್ ಶೆಟ್ಟಿ ಬೊಕ್ಕ ಅಧ್ಯಕ್ಷೆ ದಿವಾಕರ್ ಪಾಂಡೇಶ್ವರ್ ತೆರಿಪಾಯೆರ್.
ದುಂಬುದಲೆಕನೆ ಗ್ರಾಹಕೆರೆಗ್ ತುಳುನಾಡ್‌ದ ಸಾಂಪ್ರದಾಯಿಕ ತೆನಸ್ ಮಾತ್ರ ಅತ್ತಂದೇ, ಉತ್ತರ ಕರ್ನಾಟಕ, ಗುಜರಾತಿ, ಆಂಧ್ರ, ಪಂಜಾಬಿ ಸೇರ್ದ್ ದಕ್ಷಿಣ ಭಾರತೀಯ, ಉತ್ತರ ಭಾರತೀಯ, ಸಸ್ಯಾಹಾರಿ, ಮಾಂಸಾಹಾರಿ, ಇಂಚ ಪಾಕ ಬಗೆತ ಸಾಂಪ್ರದಾಯಿಕ ತೆನಸ್‌ದ ಅಂಗಡಿಲು ಇಪ್ಪರೆಗುಲ್ಲ. ಅವೆಟ್ಲಾ ಈ ಸರ್ತಿ ಸಾರ್ವಜನಿಕೆರೆ ಕಾಯೆಸ್‌ದ ಮಿತ್ತ್ ಸಸ್ಯಾಹಾರಿ ಬೊಕ್ಕ ಮಾಂಸಹಾರಿಲೆಗ್ ಬೇತೆ ಬೇತೆ ಕೌಂಟರ್‌ಲೆನ ವ್ಯವಸ್ಥೆನ್ಲಾ ಮಲ್ದೆರ್.
ದುಂಬು ಇತ್ತಿನ ಪಾಕ ಬಗೆತ ಮನರಂಜನಾ ಕಾರ್ಯಕ್ರಮೊಲು ಈ ಸರ್ತಿಲಾ ಇತ್ತ್‌ದ್, ಜೋಕುಲೆಗ್ ಗೇಮಿಂಗ್ ಜೋನ್‌ಲಾ ಇಪ್ಪುಂಡು. ಐನ್ ದಿನೊಲಾ ಒಂಜೇ ಪೊರ್ತುಡು ಬೇತೆ ಬೇತೆ ಮಿತ್ತರ್ಮೆಲೆಡ್ ಸಾಂಸ್ಕೃತಿಕ ಕಾರ್ಯಕ್ರಮೊಲು ನಡಪರೆಗುಲ್ಲ. ನೈರ್ಮಲ್ಯೊದಂಚಿ ಗೇನ ಕೊರೊಂದು, ಗೊತ್ತುಮಲ್ದಿನ ಜಾಗೆಲೆಡೇ ಗಾಡಿಲೆನ್ ಪಾರ್ಕ್ ಮಲ್ತ್‌ದ್ ಈ ಲೇಸ್ ಗೆಂದ್ಯೆರೆ ಸಕಾಯ ಮನ್ಪೊಡು ಪನ್ದ್ ಪನ್ಡೆರ್.
ಪತ್ರಿಕಾಗೋಷ್ಟಿಡ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನ
ಪ್ರಮುಖೆರಾಯಿನ ಯತೀಶ್ ಬೈಕಂಪಾಡಿ, ಅಶ್ವಿತ್ ಕೊಟ್ಟಾರಿ, ಲಲಿತ್ ಮೆಂಡನ್, ಜಗದೀಶ್ ಕದ್ರಿ ಒತ್ತುಪಾಲ್‌ಡಿತ್ತೆರ್.