Last updated on January 3rd, 2025 at 04:39 pm
ಬೆದ್ರ: ಕಂಬುಲೊಲೆಡ್ ಗಂತ್‌ಡ್ ಎರ್ಲೆನ್ ಬುಡ್ಪುನಕುಲು ಪೊಕ್ಕಡೆ ಇಜ್ಜಂದೆ ಕಡೆಸ್ಸಾವುನ, ಮಂಜೊಟ್ಟಿ ಬೊಕ್ಕ ಗಂತ್‌ಡ್ ಗಿಡರುನಕುಲು ಎರ್ಲೆಗ್ ಆಕುನ ಪ್ರಕರಣೊಲು ಸಾಬೀತಾಂಡ ಅಂಚಿನಕಲೆನ್ ಬರ್ಪಿನ ರಡ್ಡ್ ಕಂಬುಲಲೆರ್ದ್ ನಿಷೇಧ ಮನ್ಪುವ ಪನ್ದ್ ಜಿಲ್ಲಾ ಕಂಬುಲ ಸಮಿತಿ ಎಚ್ಚರ್ಗೆ ಕೊರ್ತುಂಡು.
ಬೆದ್ರದ ಒಂಟಿಕಟ್ಟೆಡುಪ್ಪುನ ಕೋಟಿ ಚೆನ್ನಯ ಕಂಬುಲ ಕ್ರೀಡಾಂಗಣದ ಮುಟ್ಟದ ಸಭಾಭವನೊಡು ಸಮಿತಿ ಗುರ್ಕಾರೆ ಬೆಳಪು ಡಾ. ದೇವಿಪ್ರಸಾದ್‌‌ರೆನ ಗುರ್ಕಾರ್ಮೆಡ್ ಗುರುವಾರ ನಡತಿನ ಜಿಲ್ಲಾ ಕಂಬಳ ಸಮಿತಿದ ತಾಪುರ್ತೋಪು ಇನಯಡ್ ಈ ಬಗೆಟ್ ಪಾಕ ಚರ್ಚೆ ಆದ್, ಕೆಲ ತೀರ್ಮಾನೊಲೆನ್ ಗೆತೊಂದುಂಡು.
24 ಗಂಟೆಡ್ ಮುಗಿಯೊಡಾಯಿನ ಕಂಬುಲೊಲು ಪೊಕ್ಕಡೆ ಪೊಕ್ಕಡೆ ಕಡೆಸ್ಸೊಂದಿತ್ತ್‌ದ್, ಉಂದು ಸರಕಾರೊದ ನೇಮೋಲೆಗ್ ವಿರುದ್ಧವಾದುಂಡು. ಇಂಚ ನೇಮೊಲೆನ್ ಪೊಲ್ಪುನ ಸಮ ಅತ್ತ್ ಪನ್ದ್ ಪನ್ಡೆರ್.
ಈ ದಿಸೆಟ್ ನಮ ನಮನ್ ಸಮ ಮಲ್ತೊಂಜಂಡ ಕಂಬುಲ ಬ್ಯಾನ್‌ಗ್ ನಮನೇ ಸಾದಿ ಮಲ್ತ್ ಕೊರ್ಲೆಕ ಆಪುಂಡು ಪನ್ದ್ ದೇವಿಪ್ರಸಾದ್‌ ಶೆಟ್ಟಿ ಪನ್ಡೆರ್. ಪೊರ್ತು ಪಾಲನೆನ್ ಕಟ್ಟ್‌ನಿಟ್ಟಾದ್ ಮನ್ಪೆರ ನೇಮೊಲೆನ್ ಕುಡ ಆತ್ ಗಟ್ಟಿ ಮಲ್ತ್‌ದ. ಒರಿ ಗಿಡರುನಾಯಗ್ ಪ್ರತಿ ವಿಭಾಗೊಡ್ಲಾ ಒಂಜಿ ಜೋಡಿ ಎರ್ಲೆನ್ ಗಿಡಪೆರ ಮಾತ್ರ ಅವಕಾಶ ಇಪ್ಪುಂಡು. ಆಂಡಲಾ, ಗಿಡರೊಡೇ ಪನ್ಪಿನ ಪೊರ್ತುಡು ತೀರ್ಪುಗಾರೆರೆ ಅಂಚೆನೇ ವ್ಯವಸ್ಥಾಪಕೆರೆ ಅನು ಗೆತೊಂಡಿಬೊಕ್ಕ ಮಾತ್ರ ರಡ್ಡ್ ಜೋಡಿ ಎರ್ಲೆನ್ ಗಿಡಪೊಲಿ. ಒರಿನ ಬೇತೆ ನೇಮೊಲೆಡ್ ದಾಲ ಪಗತೆ ಇಜ್ಜಿ ಪನ್ದ್ ಆರ್ ತೆರಿಪಾಯೆರ್.
ಆಂಬುಲೆನ್ಸ್‌ ಬೊಕ್ಕ ಪ್ರಥಮ ಚಿಕಿತ್ಸೆ ಕೇಂದ್ರೊನು ಮಾತಾ ಕಂಬುಲೊಲೆಡ್ ಕಡ್ಡಾಯ ಮನ್ಪುವ ಪನ್ದ್ ಸಮಿತಿ ಗುರ್ಕಾರ್ಲು ಪನ್ಡೆರ್.
ಪ್ರಧಾನ ಕಾರ್ಯಂತೆರ್ ಲೋಕೇಶ್‌ ಶೆಟ್ಟಿ, ತೀರ್ಪುಗಾರೆರೆ ಸಂಚಾಲಕೆ ವಿಜಯ ಕುಮಾರ್‌ ಕಂಗಿನಮನೆ, ಮಾಜಿ ಗುರ್ಕಾರೆ ರೋಹಿತ್‌ ಹೆಗ್ಡೆ ಎರ್ಮಾಳ್, ಒತ್ತು ಗುರ್ಕಾರೆ ರಶ್ಮಿತ್‌ ಶೆಟ್ಟಿ, ತೀರ್ಪುಗಾರೆ ರಾಜೀವ್‌ ಶೆಟ್ಟಿ ಎಡ್ತೂರು, ಅಡ್ವೆ ಕಂಬುಲೊದ ವ್ಯವಸ್ಥಾಪಕೆ ಕೊಳಚೂರು ಕೊಂಡೊಟ್ಟು ಸುಕುಮಾರ ಶೆಟ್ಟಿ ಸೇರ್ದ್ ಪ್ರಮುಖೆರ್ ಒತ್ತುಪಾಲಿತ್ತೆರ್.