Last updated on January 6th, 2025 at 03:31 pm
ಚೀನಾಡ್ ಎಲ್ಯ ಜೋಕುಲೆಡ ಎಚ್ಚಾದ್ ಪಗರೊಂದುಪ್ಪುನ ಹ್ಯೂಮನ್ ಮೆಟಾಪ್ನ್ಯೂಮೋ ವೈರಸ್ (HMPV) ಕರ್ನಾಟಕೊಡು ಮೂಜಿ ವರ್ಸೊದ ಅಂಚೆನೇ ಎಣ್ಮ ತಿಂಗೊಲ್ದ ಇರ್ವೆರ್ ಜೋಕುಲೆಡ ತೋಜಿದ್ ಬೈದ್ಂಡ್. ರಡ್ಡ್ ಪ್ರಕರಣೊಲು ತಿಕ್ಕಿನೆರ್ದಾವರ ಜನೊಕುಲು ಒಂತೆ ಪೋಡಿದೆರ್. ಪಿದಯಿ ದೇಶೊಗು ಓಲ್ಲಾ ಪೋವಂದಿನ ಜೋಕುಲೆಗ್ ಎಂಚ ಈ ಸೋಂಕು ತಾಗ್ಂಡ್ ಪನ್ಪಿನ ಮಾತೆರೆಗ್ಲಾ ಸೋದ್ಯ ಆತ್ಂಡ್. ಆಂಡಲಾ, ಈ ರಡ್ಡ್ ಪ್ರಕರಣೊಲು ಚೀನಾಡ್ ಪಗರೊಂದುಪ್ಪುನ HMPV ದ ಜಾತಿಗೇ ಸೇರ್ದ್ಂಡಾ ಇಜ್ಜಾ ಪನ್ದ್ ನನಲಾ ಪತ್ತ ತೆರಿದಿಜಿ.
ಆರೋಗ್ಯ ತಜ್ಞೆರೆ ಪ್ರಕಾರ ಸಾಮಾನ್ಯ ಶೀತೊದ ವೈರಸ್ ಲೆಕಾನೆ HMPV ವೈರಸ್ ಪಗರುಂಡು. ದಮ್ಮುದ ಸೋಂಕುನು ಕನಪುನ ಈ ವೈರಸ್ ಚಳಿತ ಪೊರ್ತುಡು ಎಚ್ಚಾಪುಂಡು. ಉಂದೆಕ್ ಕೊರೋನಾದ ಪೊರ್ತುದ ಲೆಕಂದಿನ ದುಂಬೆಚ್ಚರ್ಗೆ ಬೂಡೂಂದಿಜ್ಜಿ. ಆಂಡಲಾ ಮಾಸ್ಕ್ ಪಾಡೊಂದು, ಕೈ ದೆಕ್ಕೊಂದು ಇತ್ತ್ಂಡ ಎಡ್ಡೆ ಪನ್ದ್ ಪನ್ತೆರ್. ಜೋಕುಲೆಗ್ ಉಸಾರಿಜ್ಜಂಡ, ಇಲ್ಲಡೆ ಕುಲೊಂದು ಆರಾಮ ಮನ್ಪೊಡು, ಸಮ ನೀರ್ ಪದೊಡು. ಪೋಡ್ಯುನ ಅಗತ್ಯ ಇಜ್ಜಿ ಪನ್ದ್ ಪನ್ತೆರ್.
ಕರ್ನಾಟಕ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆದ ಪ್ರಧಾನ ಕಾರ್ಯಂತೆರ್ ಹರ್ಷ ಗುಪ್ತಾ ಪಾತೆರ್ದ್, 11 ವರ್ಸೊರ್ದ್ ತಿರ್ತ್‌ದ ಜೋಕುಲೆಡ ಎಚ್ಚಾದ್ HMPV ವೈರಸ್ ತೋಜಿದ್ ಬರ್ಪುಂಡು. ಶ್ವಾಸ ದೆಪ್ಪುನ ಸಮಸ್ಯೆ ಇತ್ತ್ಂಡ ಈ ರೋಗ ಬರ್ಪಿನ ಸಾಧ್ಯತೆ ಕಾಲಿ 1% ಮಾತ್ರ. ಚಳಿತ ಪೊರ್ತುಡು ಶೀತ, ಜ್ವರ ಬರ್ಪಿನ ಸಾಮಾನ್ಯ. ಪೋಡ್ಯುನ ಅಗತ್ಯ ಇಜ್ಜಿ ಪನ್ದ್ ಪನ್ಡೆರ್.