Last updated on January 7th, 2025 at 09:38 am
ಕುಡ್ಲ: ಬಾರೀ ಅಪರೂಪೊದ ಪ್ರಕರಣ ಒಂಜೆಟ್ ಪೊಂಜೊವು ಒರ್ತಿ ನಾಲ್ ಜೋಕುಲೆನ್ ಪೆದ್ದಿನ ನಡಕೆ ಕಂಕನಾಡಿ ಫಾದರ್ ಮುಲ್ಲರ್ ಆಸ್ಪತ್ರೆಡ್ ನಡತ್‌ದ್ಂಡ್. ಬೈದ್ಯೆರೆ ಕೂಟ ಶಸ್ತ್ರಚಿಕಿತ್ಸೆ ಮಲ್ತ್‌ದ್ ಪೆದ್‌ಪಾದಿತ್ತ್‌ದ್, ಅಪ್ಪೆ ಜೋಕುಲು ಆರೋಗ್ಯವಾದುಲ್ಲೆರ್ ಪನ್ದ್ ಬೈದ್ಯೆರ್ ತೆರಿಪಾದೆರ್.
ತೆಲಂಗಾಣ ರಾಜ್ಯೊದ ತೇಜ ಪನ್ಪಿನಾರೆನ ಬೊಡೆದಿ ಬಾನೋತ್ ದುರ್ಗಾ ಪನ್ಪಿನಾರ್ ನಾಲ್ ಜೋಕುಲೆನ್ ಪೆದ್ದಿನ ಅಪ್ಪೆ. ಈ ನಾಲ್ವೆರ್ ಜೋಕುಲೆಡ್ ರಡ್ಡ್ ಆಣ್, ರಡ್ಡ್ ಪೊಣ್ಣುಲು. ಈ ನಾಲ್ ಜೋಕುಲ್ಲಾ ಆರೋಗ್ಯವಾದುಲ್ಲೆರ್. ಒಂತೆ ಬೇಗ ಪೆದ್ದಿನೆರ್ದಾವರ ಇತ್ತೆಗ್ ಜೋಕುಲೆಗ್ ಎನ್ಐಸಿಯುಡ್ ಮರ್ದ್ ನಡತೊಂದುಂಡು.
ನಾಲ್ ಜೋಕುಲೆನ್ ಒರನೆ ಪೆದ್ದುನ ಬಾರೀ ಅಪರೂಪ ಆದಿತ್ತ್‌ದ್, ಉಂದು 7 ಲಕ್ಷ ಬಂಜಿನಕ್ಲೆನೆಟ್ ಒರ್ತಿಡ ಮಾತ್ರ ತೂವರೆ ತಿಕ್ಕುಂಡು. ಸ್ತ್ರೀರೋಗ ತಜ್ಞೆದಿ, ಡಾ.ಜೋಯ್ಲೀನ್ ಡಿ ಅಲ್ಮೇಡಾ ಬಂಜಿನಾರೆನ ಆರೈಕೆ ಮಲ್ತಿತ್ತೆರ್. ಪೆದ್ದುನ ಪೊರ್ತುಡು ಆಸ್ಪತ್ರೆದ ಡೆಲಿವರಿ ಬೊಕ್ಕ ಜೋಕುಲೆನ ವಿಭಾಗೊದ ವೈದ್ಯಕೀಯ ಕೂಟ ಬಾರೀ ಜಾಗ್‌ರ್ತೆಡ್ ಬೇಲೆ ಮಲ್ತ್‌ದ್, ಅಪ್ಪೆ-ಜೋಕುಲೆನ ಆರೈಕೆ ಮಲ್ದ್ಂಡ್.