Last updated on January 7th, 2025 at 10:32 am
ಕೌಂಟುಬಿಕ ಅಂಚೆನೆ ಪನವುದ ಎಚ್ಚಿಕಮ್ಮಿಡ್ ತನ್ಕುಲೆನ ರಡ್ಡ್ ಜೋಕುಲೆಗ್ ಇಸ ಕೊರ್ದು ಕೆರ್ದ್ ಬೊಕ್ಕ ಡೆತ್ ನೋಟ್ ಬರೆದ್ ದೀದ್ ಕಂಡನೆ ಬೊಡೆದಿ ಬಲ್ಲ್ ದೆತೊಂದು ಸೈದಿನ ನಡಕೆ ಬೆಂಗಳೂರುದ ಸದಾಶಿವನಗರಡ್ ನಡದ್ಂಡ್.
ಉತ್ತರಪ್ರದೇಶ ಅಲಹಬಾದ್‌ ಮೂಲದ ಅನೂಪ್‌ (38) ಬೊಕ್ಕ ಬೊಡೆದಿ ರಾಖಿ (35) ತನ್ಕುಲೆನ ಜೋಕುಲಾಯಿನ ಮಗಲ್ ಅನುಪ್ರಿಯಾ (5) ಬೊಕ್ಕ ಪ್ರಿಯಾಂಶ್‌ (2) ಮೊಕಲೆಗ್ ವನಸ್ ಡ್ ವಿಷ ಪಾಡ್ದ್ ಕೆರ್ದ್ ಆತ್ಮಹತ್ಯೆ ಮಲ್ತೊಂದೆರ್. ಸೋಮವಾರ ಕಾಂಡೆ ಇಲ್ಲದ ಬೇಲೆದಾಲ್ ಇಲ್ಲದ ಕೈತಲ್ ಬನ್ನಗ ದುರ್ಘ‌ಟನೆ ಬೊಲ್ಪುಗು ಬೈಡ್ಂಡ್. ಅನೂಪ್‌ ಕುಟುಂಬದ ಸದಸ್ಯೆರೆಗ್ ಒಲವು ಕೊರ್ತುಂಡು ಪನ್ದ್ ಪೊಲೀಸೆರ್ ತೆರಿಪಾದೆರ್.
ಅನೂಪ್‌ ಆತ್ಮಹತ್ಯೆ ಮಲ್ಪುನ ದುಂಬು ಒಂಜಿಪುಟದ ಡೆತ್‌ನೋಟ್‌ ಬರೆದ್ ಮೆಗ್ಯೆ ಅಮಿತ್‌ಗೆ ಇ-ಮೇಲ್‌ ಮಲ್ತ್ ಕಡಪುಡ್ದೆರ್. ಅವೆಟ್ ಅಮ್ಮೆರ್ ಸೇರ್ದ್ ಇಡೀ ಕುಟುಂಬದಕುಲು ಎನ್ನೊಟ್ಟುಗು ಪಾತೆರೊಂದಿಜ್ಜೆರ್. ಮಾತೆರ್ಲಾ ದೂರ ಆತರ್. ಉಂದೆರ್ದ್ ಮಸ್ತ್ ಬೇನೆ ಆತ್ಂಡ್. ಅಂಚೆನೆ ಒಂಜರೆ ವರ್ಷದ ಪಿರವು ರಾಕೇಶ್‌ ಪನ್ಪಿನಾಯೆ ಲಕ್ಷಾಂತರ ರೂ. ದೆತೊಂದು, ಪಿರ ಕೊರಂದೆ ವಂಚನೆ ಮಲ್ದೆ. ಎನ್ನ ಸುರುತ ಮಗಲೆಗ್ ಬುದ್ಧಿಮಂದ ಉಂಡು. ಅವೆರ್ದ್ ಎಂಕುಲು ಮಂಡೆಬೆಚ್ಚೊಡುಲ್ಲ. 2ನೇ ಬಾಲೆ ಆಂಡಲಾ ನಿಕುಲು ಏರ್ಲಾ ಎನಡ ಪಾತೆರೊಂದಿಜ್ಜರ್. ಅಂಚಾದ್ ಈ ನಿರ್ಧಾರ ಮಲ್ದೆ ಪನ್ದ್ ಉಲ್ಲೇಖ ಮಲ್ದೆರ್.