Last updated on January 9th, 2025 at 11:03 am
ಕುಡ್ಲ: 2025-26ನೇ ಸಾಲ್‌ಡ್ ಪ್ರತಿ ಯೂನಿಟ್‌ಗ್ ಅಂದಾಜಿ 0.70 ರೂ. ಏರ್ಪೆರೆ ಪ್ರಸ್ತಾವನೆನ್ ಕರ್ನಾಟಕ ಎಲೆಕ್ಟ್ರಿಸಿಟಿ ಬೋರ್ಡ್‌ಗ್ ಮೆಸ್ಕಾಂ ಕಡಪುಡ್ದಿತ್ತ್‌ದ್, ಈ ಮುಕೇನ ಪೊಸ ವರ್ಸೊದ ಸುರೂಟೆ ಮೆಸ್ಕಾಂ ರೇಟ್ ಏರ್ಪುನ ಪುರಪು ಕೊರ್ತುಂಡು.
ಇತ್ತೆ ಇಪ್ಪುನ ರೇಟ್‌ಡ್ ಮೆಸ್ಕಾಂ ತನ್ನ ಕಂದಾಯ ಅಗತ್ಯೊಲೆನ್ ಎತ್ತೆರೆ ಆವೊಂದಿಜ್ಜಿ ಪನ್ದ್ ಮೆಸ್ಕಾಂ ನೆವನ ಪನ್ತ್‌ನ್ಡ್. ರೇಟ್ ಏರ್ಪುನ ಪ್ರಸ್ತಾವನೆಗ್ ಆಕ್ಷೇಪಣೆ ಇತ್ತ್ಂಡ, ಆಕ್ಷೇಪಣೆ ಸಂದಾವೆರೆ ಸಂದರಪ್ಪುಲಾ ಉಂಡು.
ಇತ್ತೆ ಯೂನಿಟ್‌ಗ್ ಸರಾಸರಿ ಸಪ್ಲೈ ಕರ್ಚಿ 9.23 ರೂ. ಇತ್ತ್‌ದ್, ಇತ್ತೆದ ರೇಟ್‌ಡ್ ಸರಾಸರಿ ಕಲೆಕ್ಷನ್ ಯೂನಿಟ್‌ಗ್ 8.53 ರೂ. ಆತ್ಂಡ್. ಅಂಚಾದ್ ಯೂನಿಟ್‌ಗ್ 0.70 ರೂ. ಕಂದಾಯ ಕುಂದೆಲ್ ಆವೊಂದುಂಡು ಪನ್ಪಿನ ಮೆಸ್ಕಾಂ ವಾದ.
2023-24ತ ಅಕೇರಿಗ್ ಇತ್ತೆದ ಕರೆಂಟ್ ರೇಟ್‌ಡ್ 5,942.73 ಕೋ.ರೂ. ಕಂದಾಯ ಬರ್ಯೆರೆ ಉಂಡು. ಆಂಡ ವಾರ್ಷಿಕ ಕಂದಾಯ 6,310.39 ಕೋ.ರೂ. ಆದಿತ್ತ್‌ದ್, ಅಗತ್ಯ ಕಾರಣೊಲೆರ್ದಾವರ 367.66 ಕೋ.ರೂ ಕಂದಾಯೊದ ಕುಂದೆಲ್‌ನ್ ಮೆಸ್ಕಾಂ ಉಲ್ಲೇಖ ಮಲ್ದ್ಂಡ್. ಈ ಪ್ರಕಾರ 2025-26ನೇ ಸಾಲ್‌ಡ್ ಕಂದಾಯ 5,850.81 ಕೋ.ರೂ ಅಂದಾಜಿ ಮಲ್ತಿತ್ತ್‌ದ್, 5,961.63 ಕೋ.ರೂ. ಕಂದಾಯ ಅಗತ್ಯೊನು ಲೆಕ್ಕ ಪಾಡ್ದೆರ್. ಅಂಚ 110.82 ಕೋ.ರೂ ಕಂದಾಯ ಕುಂದೆಲ್ ಅಂದಾಜಿ ಪಾಡ್ದ್ 0.70 ರೂ. ರೇಟ್ ಏರ್ಪುನ ವಾದ ಮಂಡನೆ ಮಲ್ದ್ಂಡ್.