Last updated on January 9th, 2025 at 12:47 pm
ಕುಡ್ಲ ಜನವರಿ 09: ಸ್ಮಾರ್ಟ್ ಸಿಟಿ ಕುಡ್ಲದ ಸಾದಿಲೆಡ್ ಕಾಲಿ ಗುಂಡಿ ಗುರುಂಪುಲೆನವೇ ಕಾರ್ಬಾರ್. ಈ ಗುಂಡಿಲೆಗ್ ಬೂರ್ದ್ ಏತೋ ಜನ ತನ್ಕುಲೆ ಜೂವ ಕಲವೊಂದೆರ್. ಆಂಡಲಾ ಜಿಲ್ಲಾಡಳಿತ ಮಾತ್ರ ಉಂದೆತ ಬಗೆಟ್ ಗೇನ ಕೊರ್ಪಿಲೆಕ ತೋಜೊಂದಿಜ್ಜಿ. ಆಂಡ ಪ್ರಾಯದಾರ್ ಒರಿ ನಂತೂರು‌ದಲ್ಪ ಇಪ್ಪುನ ಸಾದಿದ ಗುಂಡಿ ಗುರುಂಪುಲೆನ್ ತನ್ನ ಕಾರ್‌ಡೇ ಮಣ್ಣ್ ಕನತ್‌ದ್ ನಿಗಿತೊಂದುಲ್ಲೆರ್.
ನಂತೂರು ಸಾದಿ ಅಗೆಲ್ಪುನ ಬೇಲೆ ಬಾರೀ ಬರಸ್‌ಡ್ ಸುರು ಆದ್ ಇತ್ತೆ ಮನಿಪಂದೆ ಆತ್ಂಡ್. ಇತ್ತೆ ಇಪ್ಪುನ ಸಾದಿಡ್ ಕಾಲಿ ಗುಂಡಿ ಗುರುಂಪುಲೇ ದಿಂಜಿದಿತ್ತ್‌ದ್, ಗಾಡಿಲೆಡ್ ಪೋಪುನಕ್ಲೆಗ್ ಬಾರೀ ಬಂಙ ಆಪುಂಡು. ಉಂದುವೇ ಸಾದಿಡೆ ಪೋದು ಬರ್ಪುನ ಪಾಂಡುರಂಗ ಕಾಮತ್ ಮೇರ್ ತನ್ನ ಕಾರ್‌ಡ್ ಮಣ್ಣ್ ಕನತ್‌ದ್ ಸಾದಿದ ಗುಂಡಿ ಗುರುಂಪುಲೆನ್ ನಿಗಿತೊಂದುಲ್ಲೆರ್. ಜನೊಕ್ಲೆನ ಟ್ಯಾಕ್ಸ್‌ದ ಕಾಸ್‌ಡೇ ಕಾರ್ಯಭಾರ ನಡಪಾವುನ ಸ್ಥಳೀಯ ಆಡಳಿತ ಮಲ್ಪೊಡಾಯಿನ ಬೇಲೆನ್ ಈ ಪ್ರಾಯದಾರ್ ಮಲ್ತೊಂದುಲ್ಲೆರ್. ಉಂದು ನಮ್ಮ ಸ್ಮಾರ್ಟ್ ಸಿಟಿತ ಪರಿಸ್ಥಿತಿ.