Last updated on January 9th, 2025 at 04:46 pm
ಕುಡ್ಲ: ಪಿರಾಕ್‌ದ ಪರತಿರಿ ಇಪ್ಪುನ ಗುಜ್ಜರಕೆರೆನ್ ಸ್ಮಾರ್ಟ್‌ಸಿಟಿ ಯೋಜನೆದ ಮುಕೇನ ಕೋಟಿಗಟ್ಲೆ ರೂಪಾಯಿ ಕರ್ಚಿ ಮಲ್ತ್‌ದ್ ಬುಲೆಚ್ಚಿಲ್ ಮಲ್ದೆರ್. ಆಂಡ, ಗುಜ್ಜರಕೆರೆ ನೀರ್ ತೆಟ್ಟ್‌ದಿತ್ತ್‌ದ್. ಪರ್ಯೆರ ಯೋಗ್ಯವಾದಿಜ್ಜಿ ಪನ್ದ್ ಕುಡೊರ ಸಾಬೀತಾತ್‌ನ್ಡ್.
ಕೆದುತ ಪಡ್ಡಾಯಿ ಮರ್ಗಿಲ್‌ರ್ದ್ ದೆತ್ತ್‌ದ್ ಪರೀಕ್ಷೆ ಮಲ್ದಿನ ನೀರ್‌ದ ಪ್ರತಿ 100 ಮಿಲಿ ಲೀಟರ್‌‌ಡ್ ಟೋಟಲ್‌ ಕಾಲಿಫಾರ್ಮ್ ಸಂಖ್ಯೆ 1,600ದಾತ್ ತೋಜಿದ್ ಬೈದ್ಂಡ್. ಫೀಕಲ್‌ ಕಾಲಿಫಾರ್ಮ್ ಸಂಖ್ಯೆ 300 ದಾತ್ ಇತ್ತ್‌ದ್, 100 ಎಂ.ಎಲ್‌.ನೀರ್‌ಡ್ ಈ ಪ್ರಮಾಣೊದ ಅಂಶ ತೋಜಿದ್ ಬರ್ಪುನ ಬಾರೀ ಅಪಾಯಕಾರಿಯಾದುಂಡು. ಮೂಡುಬಡಕಾಯಿರ್ದ್ ದೆತ್ತಿನ ನೀರ್‌ಡ್ಲಾ ಪ್ರತಿ 100 ಎಂ.ಎಲ್‌ಡ್ ಟೋಟಲ್‌ ಕಾಲಿಫಾರ್ಮ್ ಸಂಖ್ಯೆ 1600ದಾತ್ ಉಂಡು, ಫೀಕಲ್‌ ಕಾಲಿಫಾರ್ಮ್ ಸಂಖ್ಯೆ 300ದಾತ್ ಉಂಡು ಪನ್ದ್ ವರದಿಡ್ ಬರೆದಿತ್ತ್‌ದ್, ಈ ನೀರ್ ಪರ್ಪಿನ ಅಪಾಯಕಾರಿ ಪನ್ದ್ ಸ್ಪಷ್ಟವಾದ್ ತೆರಿಪಾದೆರ್.
100 ಮಿ.ಲೀ. ನೀರ್‌ಡ್ ಟೋಟಲ್‌ ಕಾಲಿಫಾರ್ಮ್ ಪ್ರಮಾಣ 0 ಇತ್ತ್ಂಡ ಮಾತ್ರ ಎಡ್ಡೆ ನೀರ್ ಬೊಕ್ಕ ಪರ್ಯೆರೆ ಗಲಸೊಲಿ. 1-3 ಇತ್ತ್ಂಡ ಸಮಾಧಾನಕರ ಬೊಕ್ಕ 4-10ತಾತ್ ಇತ್ತ್ಂಡ ಆತ್ ಎಡ್ಡೆ ಅತ್ತ್. 10ರ್ದ್ ಮಿತ್ತ್ ಇತ್ತ್ಂಡ ಪರ್ಯೆರನೇ ಬಲ್ಲಿ. ಫೀಕಲ್‌ ಕಾಲಿಫಾರ್ಮ್‌ಲಾ 0 ಇತ್ತ್ಂಡ ಮಾತ್ರ ಪರೊಲಿ.
ಕೆದುತ ಬುಲೆಚ್ಚಿಲ್‌ಗ್ ದುಂಬು ಈ ಅಂಶೊಲೆನ್ ತೂವಂದೆ ಕೋಟಿಗಟ್ಲೆ ಕಾಸ್‌ನ್ ಈ ಕೆದುಕು ದೊರಿತ್‌ದೆರ್.