Last updated on January 10th, 2025 at 08:50 am
ಕುಡ್ಲ: ವಾಮಂಜೂರ್‌ಡ್ ನಡತಿನ ಗನ್ ಮಿಸ್ ಫೈರ್ ಪ್ರಕರಣೊಗು ಸಂಬಂಧಿತ್‌ದ್ ಗನ್ ಪೈರ್ ಮಲ್ತಿತ್ತಿನ ಆರೋಪಿ ಪೊಲೀಸೆರೆಗ್ ರಡ್ಡ್ ರಡ್ಡ್ ಕತೆಕ್ಲೆನ್ ಪನ್ದಿತ್ತೆ ಪನ್ದ್ ಪೊಲೀಸ್ ಆಯುಕ್ತೆ ಅನುಪಮ್ ಅಗರ್ವಾಲ್ ಮಾಧ್ಯಮೊಲೆಗ್ ತೆರಿಪಾದೆರ್.
ಜನವರಿ 6 ತಾನಿ ಅದ್ದು ಅಲಿಯಾಸ್ ಬದ್ರುದ್ದೀನ್ (34) ಪನ್ಪಿನಾಯೆ ಲೈಸೆನ್ಸ್‌ದಾಂತಿನ ಪಿಸ್ತೂಲ್‌ನ್ ತನ್ನ ಅಂಗಡಿಡ್ ಕುಲೋಂದು ಪರೀಕ್ಷೆ ಮಲ್ತೊಂದಿತ್ತೆ. ಈ ಪೊರ್ತುಡು ಆಯೆ ಟ್ರಿಗ್ಗರ್ ಒತ್ತುದಿನೆರ್ದಾವರ ಫೈರ್ ಆದ್ ಅಂಗಡಿಡ್ ಕುಲ್ದಿತ್ತಿನ ಮೊಹಮ್ಮದ್ ಸಫ್ವಾನ್ (25) ಪನ್ಪಿನಾಯಗ್ ಗುಂಡು ತಾಗ್‌ದ್ ಸಫ್ವಾನ್‌ನ್ ಆಸ್ಪತ್ರೆಗ್ ದಾಕಲ್ತ್‌ದಿತ್ತೆರ್.
ಈ ಬಗೆಟ್ ಮಾಧ್ಯಮೊಲೆಗ್ ಒಲವು ಕೊರ್ನ ಪೊಲೀಸ್ ಕಮಿಷನರ್ ಅನುಪಮ್ ಅಗರ್ವಾಲ್ ಇತ್ತೆಗ್ ನಡಕೆಗ್ ಸಂಬಂಧಿತ್‌ದ್ ಗ್ರಾಮಾಂತರ ಸ್ಟೇಷನ್‌ಡ್ ಎಫ್‌ಐಆರ್ ಆದ್ ಜಡ್ತೆ ನಡತೊಂದುಂಡು. ಆರೋಪಿ ರಡ್ಡ್ ರಡ್ಡ್ ಸರ್ತಿ ಪೊಲೀಸೆರೆ ಜಡ್ತೆದ ಸಾದಿ ತಪ್ಪಾವುನ ಬೇಲೆ ಮಲ್ದೆ. ಸುರುಕು ಸಫ್ವಾನ್‌ನ ಕೈಟುಪ್ಪುನಗನೇ ಪಿಸ್ತೂಲ್ ಮಿಸ್ ಫೈರ್ ಆದ್ ಗುಂಡು ಬಂಜಿಗ್ ತಾಗ್‌ದ್ ಪೆಟ್ಟಾತ್ಂಡ್ ಪನ್ದ್ ಪೆಟ್ಟಾತಿನ ಜವನಡನೇ ಸುಳ್ಳು ಪನ್ಪಾದೆ. ಜಡ್ತೆ ಮಲ್ತ್‌ದಾನಗ ಉಂದು ಸುಳ್ಳು ಪನ್ದ್ ತೆರಿದ್ ಬೈದ್ಂಡ್. ಅಂಚಾದ್ ಸಿಸಿ ಕ್ಯಾಮರಾ ಪರಿಶೀಲನೆ ಮಲ್ತಿತ್ತ.
ಅವೆರ್ದ್ ಬೊಕ್ಕ ಕುಡೊಂಜಿ ಕತೆ ಕಟ್ಟೆರೆ ಸುರು ಮಲ್ತ್‌ದೆ. ಈ ಪಿಸ್ತೂಲ್ ಬಜ್ಪೆದ ಭಾಸ್ಕರ್ ಪನ್ಪಿನಾರೆನವು, ಆರ್ ಅವೆನ್ ಬುಡ್ದ್ ಪೋತೆರ್. ನಡಕೆ ನಡತಿ ಬೊಕ್ಕ ಆರ್ ಈ ರೀತಿ ಕತೆ ಕಟ್ಟ್‌ದ್ ಪನ್ಯೆರ ಪನ್ದಿತ್ತೆರ್ ಪನ್ದ್ ತೆರಿಪಾದೆ. ಆತನಗ ಅಲರ್ಟ್ ಆಯಿನ ಪೊಲೀಸೆರ್ ಬದ್ರುದ್ದೀನ್ನ್ ವಶೊಕು ಗೆತೊಂದು ಜಡ್ತೆ ಮಲ್ತಿನಗ ಸತ್ಯ ಸಂಗತಿ ಪಿದಯಿ ಬೈದ್ಂಡ್. ಈ ಲೈಸೆನ್ಸ್ ದಾಂತಿನ ಪಿಸ್ತೂಲ್‌ನ್ ಮೂಡುಶೆಡ್ಡೆ ನಿವಾಸಿ ಇಮ್ರಾನ್ ಪನ್ಪಿನಾಯೆ ಅದ್ದು ಅಲಿಯಾಸ್ ಬದ್ರುದ್ದೀನ್‌ನ್‌ಗ್ ಕೊರ್ದಿತ್ತೆ. ಇಮ್ರಾನ್‌ಗ್ ಈ ಪಿಸ್ತೂಲ್ ಕೇರಳ ಮೂಲೊದ ಒರ್ಯರ್ದ್ ತಿಕ್ಕ್‌ದ್ಂಡ್. ಇತ್ತೆ ಪೊಲೀಸೆರ್ ಆಯನ್ ಪತ್ತೆರೆ ಕೇರಳಡ್ ನಾಡೊಂದುಲ್ಲೆರ್. ಬದ್ರುದ್ದೀನ್ನ್ ಅರೆಸ್ಟ್ ಮಲ್ತಿತ್ತ್‌ದ್, ಆಯೆ ರೌಡಿಶೀಟರ್ ಪನ್ಪಿನ ಒಲವು ಉಂಡು. ಸಫ್ವಾನ್‌ಲಾ ಉಂಬ್ಯನ ಗ್ಯಾಂಗಾ‌ದಾಯೆನೇ ಆದಿತ್ತ್‌ದ್, ಮೊಕುಲು ಎಂಕ್ಲೆನ ಸಾದಿ ತಪ್ಪಾಯೆರ ತೂತೆರ್ ಪನ್ದ್ ಪೊಲೀಸ್ ಕಮಿಷನರ್ ಪನ್ಡೆರ್.