Last updated on January 18th, 2025 at 09:27 am
ಸುಳ್ಯ: ಕ್ಷುಲ್ಲಕ ಕಾರಣೊಗು ಬೊಡೆದಿನ್ ಬೆಡಿಟ್ ಶೂಟ್ ಮಲ್ತ್‌ದ್ ಕೆರ್ದ್ ಆರೋಪಿ ಕಂಡನೆ ಬೊಕ್ಕ ತಾನ್‌ಲಾ ಆ್ಯಸಿಡ್ ಪರ್ದ್ ಆತ್ಮಹತ್ಯೆ ಮಲ್ತೊಂದಿನ ನಡಕೆ ಸುಳ್ಯ ತಾಲೂಕ್‌ದ ನೆಲ್ಲೂರು ಕೆಮ್ರಾಜೆ ಗ್ರಾಮೊದ ಕೋಡಿಮಜಲ್ ಪನ್ಪಿನಲ್ಪ ನಡತಿನ ವರದಿಯಾತ್‌ನ್ಡ್.
ಕೋಡಿಮಜಲ್ ನಿವಾಸಿ, ರಾಮಚಂದ್ರ ಗೌಡ ಅಲಿಯಾಸ್ ಚಂದ್ರ(53) ಬೊಡೆದಿನ್ ಕೆರ್ದ್, ಆತ್ಮಹತ್ಯೆ ಮಲ್ತೊಂಡಿನಾರ್. ಆರೆನ ಬೊಡೆದಿ ವಿನೋದಾ(43) ಕೊಲೆಯಾತಿನಾರ್. ಆರೋಪಿ ಲೈಸೆನ್ಸ್ ಇತ್ತಿನ ತನ್ನ ಬೆಡಿಟೇ ಈ ಬೇಲೆ ಮಲ್ತ್‌ದೆರ್ ಪನ್ದ್ ತೆರಿದ್ ಬೈದ್ಂಡ್.
ನಡಕೆದ ಒಲವು
ರಾಮಚಂದ್ರೆ ಕರಿನ ರಾತ್ರೆ ವನಸ್ ಮಲ್ತಿಬೊಕ್ಕ ಕ್ಷುಲ್ಲಕ ಕಾರಣೊನು ಪತೊಂದು ಇಲ್ಲಡ್ ಕಂಟ್ಯೊನರೆ ಸುರು ಮಲ್ತ್‌ದೆರ್. ಆವೆರ್ದ್ ಬೊಕ್ಕ ಗಲಾಟೆ ಜೋರು ಜೋರೇ ಆವೊಂದು ಪೋದಿತ್ತ್‌ದ್, ರಾಮಚಂದ್ರೆ ಬೆಡಿಟ್ ಕಡೀರ ಮಗೆ ಪ್ರಶಾಂತ್‌ಗ್ ನೋಟ ದೀತೆರ್ ಪನ್ದ್ ಪನೊಂದುಲ್ಲೆರ್. ಈ ಪೊರ್ತುಡು ನಡುಕು ಬತ್ತಿನ ಬೋಡೆದಿ ವಿನೋದಾ ಬೆಡಿನ್ ಒಯ್ತೊನರೆ ಪುನೆತೆರ್ ಪನ್ದ್ ತೆರಿದ್ ಬೈದ್ಂಡ್.
ಉಂದೆರ್ದಾವರ ಬೊಡೆದಿನ ಮಿತ್ತ್ ಪಿಸಿರಾಯಿನ ಆರೋಪಿ ರಾಮಚಂದ್ರೆ ಬೆಡಿಟ್ ಬೊಡೆದಿಗ್ ಶೂಟ್ ಮಲ್ತ್‌ದೆರ್. ವಿನೋದಾ ಅಲಾಪನೇ ಕುಸ್ಕ್‌ದ್ ಬೂರ್ದ್ ಜೂವ ಬುಡ್ತೆರ್. ಪತ್ನಿ ಸೈತಿಬೊಕ್ಕ ರಾಮಚಂದ್ರೆ ರಬ್ಬರ್ ಶೀಟ್ ಮನ್ಪೆರ ಗಲಸುನ ಆ್ಯಸಿಡ್ ಪರ್ದ್ ಆತ್ಮಹತ್ಯೆ ಮಲ್ತೊಂದೆರ್ ಪನ್ದ್ ತೆರಿದ್ ಬೈದ್ಂಡ್.
ಈ ಬಗೆಟ್ ಪ್ರಶಾಂತ್‌ನ ಪಾತೆರೊದ ಲೆಕ ಸುಳ್ಯ ಸ್ಟೇಷನ್‌ಡ್ ಪ್ರಕರಣ ದಾಕಲಾತ್ಂಡ್.
