Last updated on January 23rd, 2025 at 06:54 pm
ವಿಟ್ಲ : ವಿಟ್ಲದ ಬೋಳಂತೂರ್‌ದ ಉದ್ಯಮಿ ಒರಿಯನ ಇಲ್ಲಡ್ ಇಡಿ ಅಧಿಕಾರಿಲೆ ಲೆಕ ಬತ್ತ್‌ದ್ ದಗೆ ಮಲ್ದಿನ ಪ್ರಕರಣೊಗು ಸಂಬಂಧಿತ್‌ದ್ ಒರಿ ಅಂತರಾಜ್ಯ ಕಲ್ವನ್ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.
ಕೈದಾತಿನಾಯನ್ ಕೇರಳದ ಕೊಲ್ಲಂ ನಿವಾಸಿ ಅನಿಲ್‌ ಫರ್ನಾಂಡಿಸ್‌ ಪನ್ದ್ ಗುರ್ತ ಪತ್ತ್‌ದೆರ್. ಕೈದಾತಿನಾಯರ್ದ್ ಕೃತ್ಯೊಗು ಗಲಸ್‌ದಿನ KL-02-BP-1104 ರಿಜಿಸ್ಟ್ರೇಷನ್‌ದ ಎರ್ಟಿಗಾ ಕಾರ್, 5,00,000/-ರೂ ಕಾಸ್ ಅಂಚೆನೇ ನಕಲಿ ಕೃತ್ಯ ಮಲ್ಪುನಗ ಕಾರ್‌ಗ್ ಪಾಡೊನುನ ನಕಲಿ TN-20-DB-5517 ನಂಬರ್ ಪ್ಲೇಟ್‌ನ್ ವಶೊಕು ಗೆತೊಂದಿತ್ತ್‌ದ್, ಸ್ವಾದೀನ ಮಲ್ತೊಂದಿನ ಕಾಸ್ ಬೊಕ್ಕ ಗಾಡಿಲೆನ ಒಟ್ಟು ಮೌಲ್ಯ- 11,00,000/- ರೂ ಆತ್ಂಡ್.
ಜನವರಿ 3 ತಾನಿ ರಾತ್ರೆ ಬಂಟ್ವಾಳ ತಾಲೂಕು ವಿಟ್ಲ ಪೊಲೀಸ್‌ ಸ್ಟೇಷನ್ ಸೀಮೆದ ಬೋಳಂತೂರ್ ನಾರ್ಶ ಪನ್ಪಿನಲ್ಪ, ಉದ್ಯಮಿಯೊರಿಯನ ಇಲ್ಲಗ್ ಬತ್ತಿನ 6 ಜನ ಇಡಿ ಅಧಿಕಾರಿಲು ಪನ್ದ್ ನಂಬಾದ್, ಇಲ್ಲಡ್ ಅಡಿಮೇಲ್ ಮಲ್ತ್ ನಾಡ್ದ್, ಸುಮಾರ್ 30 ಲಕ್ಷ ಕಾಸ್‌ನ್ ಕಂಡೊಂದು ಪೋದಿತ್ತೆರ್.
ಈ ಪ್ರಕರಣೊಗು ಸಂಬಂಧಿತ್‌ದ್ ವಿಟ್ಲ ಪೊಲೀಸ್‌ ಸ್ಟೇಶನ್‌ಡ್ ಪ್ರಕರಣ ದಾಕಲಾದಿತ್ತ್ಂಡ್. ಆರೋಪಿಲೆನ್ ಪತ್ತೆರೆ ನಾಲ್ ವಿಶೇಷ ಜಡ್ತೆದ ಕೂಟೊಲೆನ್ ಮಲ್ತ್‌ದೆರ್. ಇತ್ತೆ ಒರಿ ಆರೋಪಿ ಅರೆಸ್ಟ್ ಆದಿತ್ತ್‌ದ್ ಒರಿನಕಲೆನ್ ಪತ್ತೆರೆ ಬೇಪು ಪಾಡ್ದೆರ್.