Last updated on January 24th, 2025 at 11:11 am
ಕುಡ್ಲದ ಪೆದುಮಲೆ ಪನ್ಪಿನಲ್ಪ ಸುಮಾರ್ 300 ವರ್ಸದ ಪಿರವು ನೆಲಸಮ ಆದಿತ್ತಿನ ದೈವಸ್ಥಾನದ ಪರಒರಿಕೆಲು ತಿಕ್ಕುದ್ ದೈವೊಲೆನ ಕಾರ್ನಿಕೊಡು ಪಿರ ಪೊಸ ದೈವಸ್ಥಾನ ನಿರ್ಮಾಣ ಆವೊಂದುಂಡು.
ಕುಡ್ಲದ ನೀರ್‌ಮಾರ್ಗ ಗ್ರಾಮದ ಪೆದುಮಲೆ ಪನ್ಪಿನಲ್ಪ ಶ್ರೀ ಉಮಾಮಹೇಶ್ವರ ದೇಲಂತಡೆ ಉಂಡು. ಈ ದೇಲಂತಡೆತ ಜೀರ್ಣೋದ್ದಾರ ಮಲ್ಪರೆ ಪ್ರಶ್ನೆ ದೀದುಪ್ಪುನಗ ದೇವಸ್ಥಾನೊದ ಜೀರ್ಣೋದ್ದಾರದ ದುಂಬು ಮುಲ್ಪನೇ ಉಪ್ಪುನ ದೈವಸ್ಥಾನೊದ ಜೀರ್ಣೋದ್ದಾರ ಆವೊಡು ಪನ್ದ್ ತೆರಿದ್ ಬೈದಿತ್ತ್ಂಡ್. ಆಂಡ ಅದಮುಟ್ಟ ಅಲ್ಪದ ಜನಕ್ಲೆಗ್ ಅಲ್ಪ ದೈವಸ್ಥಾನ ಇತ್ತ್ಂಡ್ ಪನ್ದ್ ತೆರಿದಿತ್ತಿಜಿ. ಅಂಚ ಅಲ್ಪ ನಾಡುನಗ ಅಲ್ಪದಕುಲು ಬನ ಪನ್ದ್ ಲೆಪ್ಪುನ ಜಾಗೆಡ್ ಇತ್ತಿನ ಬಲ್ಲೆಲೆನ್ ಪೂರಾ ದೆತ್ತ್ ತೂನಗ ಅಲ್ಪ ದೈವಸ್ಥಾನದ ಪರಒರಿಕೆಲು ತೋಜಿದ್ ಬೈದ. ದೈವಸ್ಥಾನೊದ ಪಂಚಾಂಗ ತೋಜರೆ ತಿಕ್ಕುದ್ಂಡ್. ಅಂಚೆನೆ ಕೊಡಿಮರೊತ ದಂಬೆ ಕಲ್ಲ್ ಲಾ ತೋಜರೆ ತಿಕ್ಕ್ಂಡ್. ಅಂಚೆನೆ ಮಣಿ ಬೊಕ್ಕ ದೈವೊಲೆನ ಪಾಕ ಸೊತ್ತುಲು ತಿಕ್ಕಿಯ. ಸುಮಾರ್ 300 ವರ್ಸೊರ್ದಿಂಚಿ ದೈವೊಲೆಗ್ ನೇಮ ಆವಡ್ ಒವ್ವೇ ಸೇವೆ ಆವಡ್ ನೆಟೆ ನಡದಿಜಿ. ಮುಲ್ಪ ದೈವಸ್ಥಾನ ಇತ್ತಿನವೇ ನೆಟೆದಕಲೆಗ್ ತೆರಿದಿತ್ತಿಜಿ. ಆಂಡ ದೈವದ ಚಾವಡಿ ಉಪ್ಪುನ ಜಾಗೆದಲ್ಪ ಜನಕುಲು ದೈವೊಗು ಎಡ್ಡೆಮಿಲ್ಲಿದ ಪೊರ್ತುಡು ಪೂ ಪಾಡೊಂದಿತ್ತೆರ್. ಆಂಡ ಉಂದು ವಾ ದೈವದ ಚಾವಡಿ ಪನ್ದ್ ಲಾ ಜನಕ್ಲೆಗ್ ತೆರಿದಿತ್ತಿಜಿ. ಮುಲ್ಪ ಸುಮಾರ್ 500 ವರ್ಸದ ಪಿರಾಕ್ದ ಕುದುರೆದ ಮಿತ್ತ್ ಒರಿ ಬೀರೆ ಕುಲ್ದಿನ ಅಂಚೆನೆ ಸೂರ್ಯೆ ಚಂದ್ರೆ ಮುದ್ರೆ ಇತ್ತಿನ ದಂಬೆಕಲ್ಲ್ ತಿಕ್ಕುದ್ಂಡ್. ಪ್ರಶ್ನೆಡ್ ಉಂಡು ಅರಸು ದೈವ ವಾಜಿಲ್ಲಾಯೆ ಬೊಕ್ಕ ಜುಮಾದಿ ಸಾನಿಧ್ಯ ಪನ್ದ್ ತೆರಿದ್ ಬೈದ್ಂಡ್.
ದೈವಸ್ಥಾನದ ಜೀರ್ಣೋದ್ದಾರದ ಬಗೆಟ್ ಪಾತೆರಿನ ವಾಜಿಲ್ಲಾಯ-ಜುಮಾದಿ ದೈವಸ್ಥಾನದ ಟ್ರಸ್ಟ್ ಅಧ್ಯಕ್ಷೆ ಗಿರಿಧರ್ ಶೆಟ್ಟಿ ಮೇರ್ ಪೊಸ ದೈವಸ್ಥಾನದ ಕಾರ್ಯ 90% ಮುಗಿದ್ಂಡ್. ಉಂದು ಕೊಡಿಯೇರ್ದ್ ಉಚ್ಚಯ ಆವೊಂದಿತ್ತಿನ ದೈವಸ್ಥಾನ, ಪೊಸ ಗುಂಡ ಕಟ್ಟಾವುನ ಬೇಲೆನ್ ದೈವೊಲೇ ಎದುರು ಉಂತುದು ಎಡ್ಡೆಡ್ ನಡಪಾಪೊಂದುಲ್ಲೆರ್ ಪನ್ದ್ ಪನ್ಡೆರ್.