Last updated on January 25th, 2025 at 11:40 am
ಒಡಿಪು ಜನವರಿ 25: ಅಪರಿಚಿತ ಜನ ಒರಿ ಐನ್ ವರ್ಸ ಪ್ರಾಯೊದ ಪೊಣ್ಣು ಬಾಲೆಗ್ ಲೈಂಗಿಕ ಕಿರುಕುಳ ಕೊರ್ತಿನ ನಡಕೆ ಒಡಿಪುಡು ನಡತಿತ್ತ್‌ದ್, ಈ ಬಗೆಟ್ ಪೊಣ್ಣನ ಅಪ್ಪೆಅಮ್ನೆ ಕೊರ್ತಿನ ಒಯಿಲ್‌ದ ಪ್ರಕಾರ ಒಡಿಪು ಮಹಿಳಾ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಒಡಿಪು ಪೇಂಟೆದ ಪಿಪಿಸಿ ಮುಟ್ಟದ ಓಣಿಡ್ ಗುರುವಾರ ಮಧ್ಯಾಹ್ನದ ಪೊರ್ತುಗು ಈ ನಡಕೆ ನಡತ್‌ದ್ಂಡ್. ಸುಮಾರ್ 30 ವರ್ಷದ ಆಣ್ಜೊವು ಈ ಬೇಲೆ ಮಲ್ದಿನಾಯೆ.
ಸಾದಿಡೆ ನಟ್ಟೊಂದು ತಿರ್ಗೊಂದಿತ್ತಿನಾಯನ ಬೇಲೆ ಉಂದಾದಿತ್ತ್‌ದ್, ಆರೋಪಿ ಅಂಚಿಂಚಿ ತಿರ್ಗೊಂದುಪ್ಪುನ ಸಿಸಿ ಟಿವಿಡ್ ಕೈದಾತ್ಂಡ್. ಕುಡೊಂಜಿ ಪೊಣ್ಣನೊಟ್ಟುಗು ಇತ್ತಿನ ಈ ಪೊಣ್ಣನ್ ಚಾಕಲೇಟ್‌ದ ಅಂಗಲ್ಪು ತೋಜಾದ್ ಆರೋಪಿ, ಆಲೆನ್ ಅಂಗಡಿದ ಬರಿತ ಓಣಿಗ್ ಲೆತೊಂದುಪೋದು ಬೇಲಿ ಬರಿಟ್ ಲೈಂಗಿಕ ಕಿರುಕುಳ ಕೊರ್ಯೆರ ದುಂಬಾದಿತ್ತ್‌ದ್, ಈ ಪೊಣ್ಣನ್ ನಾಡೊಂದು ಬತ್ತಿನ ಕುಡೊರ್ತಿ ಪೊಣ್ಣನ್ ತೂದು ಅಲ್ಪರ್ದ್ ಪದ್ರಾಡಾತೆ.
ಆಯೆ ಲೈಂಗಿಕ ಕಿರುಕುಳ ಕೊರ್ತಿನ ಬಗೆಟ್ ಇಲ್ಲದಕ್ಲೆಡ ತೆರಿಪಾದಿತ್ತ್‌ದ್, ಒಡಿಪು ಮಹಿಳಾ ಪೊಲೀಸ್ ಸ್ಟೇಶನ್‌ಡ್ ಪ್ರಕರಣ ದಾಕಲಾತ್ಂಡ್. ಪೊಲೀಸೆರ್ ಆರೋಪಿನ್ ನಾಡೊಂದುಲ್ಲೆರ್. ಈ ಪ್ರಕರಣೊದ ಬಗೆಟ್ ತಾಪುರ್ತೋಪು ಕ್ರಮೊಕು ಜಿಲ್ಲಾ ಉಸ್ತುವಾರಿ ಸಚಿವರ್ ಅಂಚೆನೇ ಮಹಿಳಾ ಬೊಕ್ಕ ಜೋಕುಲೆ ಅಭಿವೃದ್ಧಿ ಸಚಿವೆ ಲಕ್ಷ್ಮೀ ಹೆಬ್ಬಾಳ್ಕರ್ ಸೂಚನೆ ಕೊರ್ತೆರ್.
ಪೊಣ್ಣಗ್ ಲೈಂಗಿಕ ಕಿರುಕುಳ ಪ್ರಕರಣೊದ ಶಂಕಿತ ಆರೋಪಿನ ಫೋಟೋ ಅಲ್ಪದ ಸಿಸಿ‌ಟಿವಿ ಕ್ಯಾಮರಾದಲ್ಲಿ ಕೈದಾದಿತ್ತ್‌ದ್ ಆಯನ ಬಗೆಟ್ ಸಾರ್ವಜನಿಕೆರ್ ಒವ್ವೇ ಒಲವು ಇತ್ತ್ಂಡ ಒಡಿಪು ಮಹಿಳಾ ಪೊಲೀಸ್ ಸ್ಟೇಶನ್‌ಗ್ ತೆರಿಪಾಯೆರ ಬಿನ್ನಪು ಮಲ್ದೆರ್.
ಕಂಟ್ರೋಲ್ ರೂಮ್ : 9480805400
ಪೊಲೀಸ್ ನಿರೀಕ್ಷಕೆರ್, ಮಹಿಳಾ ಸ್ಟೇಷನ್ : 9480805430
ಮಹಿಳಾ ಸ್ಟೇಷನ್ : 08202525599
ಪೊಲೀಸ್ ಉಪನಿರೀಕ್ಷಕೆರ್, ಮಹಿಳಾ ಸ್ಟೇಷನ್ : 8277988949