Last updated on January 31st, 2025 at 08:23 am
ತಿರುವನಂತಪುರ ಜನವರಿ 30: ದೇಶದ ಬಾರೀ ಶ್ರೀಮಂತ ದೇಲಂತಡೆ ಕೇರಳದ ತಿರುವನಂತಪುರ ಶ್ರೀ ಅನಂತ ಪದ್ಮನಾಭ ಸ್ವಾಮಿ ದೇಲಂತಡೆದ ಪೆರಿಯನಂಬಿ ಪಟ್ಟ ಬಜೀ ಕಿಞ್ಞ ಪ್ರಾಯೊಗೇ ಕೊಕ್ಕಡದ ಅರ್ಚಕೆರೆಗ್ ತಿಕ್ಕ್‌ದ್ಂಡ್.
ಇಂಚಿಪ ಕರಿನ ಆಜಿ ತಿಂಗೊಲುಗ್ ದುಂಬು ಇಡೆಗ್ ಪ್ರಧಾನ ಅರ್ಚಕೆರಾದ್ ಸೀದಾ ನಿಯುಕ್ತಿ ಆದಿತ್ತಿನ ಕೊಕ್ಕಡದ ದಿ. ಸುಬ್ರಾಯ ತೋಡ್ತಿಲ್ಲಾಯೆರೆ ಮಗೆ ಬಡೆಕ್ಕರ ಶ್ರೀ ಸತ್ಯನಾರಾಯಣ ತೋಡ್ತಿಲ್ಲಾಯ ಯಾನೆ ನಾಗೇಶ ತೋಡ್ತಿಲ್ಲಾಯ 45 ವ. ಮೆರೆಗ್ ಅರ್ಚಕೆರಾದ್ ಸೇರ್ದಿನ ಆಜೇ ತಿಂಗೊಲುಡು ಮಾಯಲ್ಲ ಗೌರವ ಇಪ್ಪುನ ಮಹಾ ಪ್ರಧಾನ ಅರ್ಚಕ ಸ್ಥಾನ ತಿಕ್ಕ್‌ದ್ಂಡ್.
ಅಕ್ಕರದೇಶಿ ಪ್ರತಿನಿಧಿಯಾದುಪ್ಪುನ ಪೆರಿಯ ನಂಬಿ ಅತ್ತ್ಂಡ ಮಹಾ ಪ್ರಧಾನ ಅರ್ಚಕೆರ್ ಪನ್ಡ ಆರೆಗ್ ಅನಂತ ಪದ್ಮನಾಭ ಸ್ವಾಮಿ ಸಂಸ್ಥಾನೊರ್ದು ಕೊರ್ಪುನ ಕೊಡೆ ಅತ್ತ್ಂಡ ಸತ್ತಿಗೆ ಮರ್ಯಾದೆ ಇಪ್ಪುನ ವಿಶೇಷ ಸ್ಥಾನ. ಈ ಪೆರಿಯ ನಂಬಿ ಸ್ಥಾನ ತುಳುನಾಡ್‌ದ ಪಾಕ ಜನಕ್ ತಿಕ್ಕ್‌ದಿತ್ತ್ಂಡಲಾ ಈತ್ ಕಿಞ್ಞ ಪ್ರಾಯೊಡು ತಿಕ್ಕಿನ ನಿದರ್ಶನೊಲು ಇಜ್ಜ. ಜೀವನೊದ ಸಂಧ್ಯಾ ಕಾಲೊಡೇ ಈ ಪಟ್ಟ ತಿಕ್ಕೆದಿನವು. ಶ್ರೀ ಅನಂತ ಪದ್ಮನಾಭ ಸ್ವಾಮಿನ ಪ್ರಧಾನ ಅರ್ಚಕೆರಾದ್ ಚಾಕಿರಿ ಮನ್ಪುನ ಭಾಗ್ಯ ತಿಕ್ಕುನವು ವೈಕುಂಠಡೇ ದೇಬೆರೆನ್ ಸ್ವತಃ ಪೂಜೆ ಮಲ್ತಿಲೆಕ ಪನ್ಪಿನ ನಂಬೊಲಿಗೆ ಉಂಡು. ಉಂದು ತುಳುನಾಡ್‌ಗೊಂಜಿ ಪೆರ್ಮೆದ ಇಸಯ.