Last updated on February 17th, 2025 at 08:35 am
ಬಂಟ್ವಾಳ ತಾಲೂಕ್‌ದ ಕೊಳ್ನಾಡ್ ಮುಟ್ಟದ ಬೋಳಂತೂರು ನಾರ್ಶದ ನಿವಾಸಿ, ಸಿಂಗಾರಿ ಬೀಡಿ ಸೇರ್ದ್ ಬೇತೆ ವೈವಾಟ್ ಮಲ್ತೊಂದಿತ್ತಿನ ಸುಲೈಮಾನ್ ಮೆರೆನ ಇಲ್ಲಗ್ ಇಡಿ ಅಧಿಕಾರಿಲು ಪನ್ದ್ ಪನೊಂದು ನಕಲಿ ದಾಳಿ ಮಲ್ದಿನ ಪ್ರಕರಣೊಗು ಸಂಬಂಧಿತ್‌ದ್ ಜಡ್ತೆ ಕೂಟ ಕೇರಳದ ಪೊಲೀಸ್ ಎಎಸ್ ಐ ಒರಿಯನ್ ಕೈದ್ ಮಲ್ದ್ಂಡ್.
ತ್ರಿಶೂರು ಕೊಡಂಗಲ್ಲೂರು ಪೊಲೀಸ್ ಸ್ಟೇಶನ್‌ಡ್ ಎಎಸ್‌ಐ ಆದಿತ್ತಿನ ಶಹೀರ್ ಬಾಬು (49) ಪನ್ಪಿನಾಯನ್ ವಿಟ್ಲ ಪೊಲೀಸೆರ್ ಕೈದ್ ಮಲ್ತ್‌ದ್, ಲೆತಬೈದೆರ್. ಇಕ್ಬಾಲ್ ಪರ್ಲಿಯ ಬಂಟ್ವಾಳ (38), ಸಿರಾಜುದ್ದೀನ್ ನಾರ್ಶ (37) ಬೊಕ್ಕ ಅಬ್ಬಾರ್ ಬಜಾಲ್ (28) ಮೊಕುಲು ಕೈದಾತಿನ ಬೇತೆ ಮೂವೆರ್ ಆರೋಪಿಲು.
ಕೇರಳದ ಕೊಡಂಗಲ್ಲೂರು ಪೊಲೀಸ್ ಸ್ಟೇಶನ್‌ದ ಎಎಸ್‌ಐ ಶಹೀರ್ ಬಾಬು ನಕಲಿ ಇ.ಡಿ ಕೂಟ ಕಟ್ಟೊಂದು ತನ್ನ ಪಾಲ್‌ದ ಕಾಸ್ ಗೆತೊಂದೆ. ಉಂಬ್ಯೆ ಕುಡ್ಲಗ್ ಬತ್ತ್‌ದ್ ಎಂಚ ಯೋಜನೆ ನಡಪಾವೊಡು ಪನ್ದ್ ಮಾರ್ಗದರ್ಶನ ಕೊರೊಂದಿತ್ತೆ. ಇ.ಡಿ ಅಧಿಕಾರಿಲೆ ಲೆಕ ನಟನೆ ಮನ್ಪೆರೆ, ತಿಕ್ಕಿನೆನ್ ಪೂಜೊಂದು ಪದ್ರಾಡಾಯೆರೆ ಬೋಡಾಪಿನ ಮಾತಾ ಒಲವು ಕೊರ್ದಿತ್ತೆ. ಉಂಬ್ಯೆ ತನ್ಕ್ ತಿಕ್ಕೊಡಾಯಿನ ತಿಕ್ಕಿನೇ ದಾಲ ಆವಂದಿಲೆಕ ಪೊಲೀಸ್ ಬೇಲೆಗ್ ಪೋಪೆದೆ. ಒರೊರ ರಜೆ ಗೆತೊನೆದೆ. ಸುರೂಟು ವಿಟ್ಲ ಪೊಲೀಸೆರ್, ಪತ್ತ ಒಲವು ಇತ್ತ್‌ದ್ ಕೇರಳಗ್ ಪೋದು ದಾಳಿ ಮಲ್ಪುನ ವಿಷಯ ಉಂಬ್ಯಗ್ ತೆರಿದ್, ಕಲ್ವೆರೆನ್ ದೆಂಗ್ ತಪ್ಪಾದಿತ್ತೆ.
ಈ ಪ್ರಕರಣೊಗು ಸಂಬಂಧಿತ್‌ದ್ ಇತ್ತೆನೇ ಕೇರಳದ ಕೊಟ್ಟಾಯಂ ನಿವಾಸಿ ಅನಿಲ್ ಫೆರ್ನಾಂಡಿಸ್‌, ಸಚಿನ್ ಬೊಕ್ಕ ಶಬಿನ್ ಪನ್ಪಿನ ಆರೋಪಿಲೆನ್ ಪೊಲೀಸೆರ್ ಕೈದ್ ಮಲ್ದೆರ್. ಇತ್ತೆ ಕುಡ ನಾಲ್ವೆರ್ ಆರೋಪಿಲೆನ್ ಕೈದ್ ಮಲ್ದೆರ್. ನನಲ ಕೆಲ ಆರೋಪಿಲು ದೆಂಗ್‌ತಪ್ಪಾದ್ ಕುಲ್ಲುದೆರ್. ಇ.ಡಿ ಅಧಿಕಾರಿಲೆ ಲೆಕ ನಾಟಕ ಮಲ್ತಿನ ಪ್ರಧಾನ ಆರೋಪಿಗ್ ಒರ್ಮೆಲ ನಾಡೊಂದುಲ್ಲೆರ್.