Last updated on February 17th, 2025 at 10:58 am
ಮಂಡ್ಯ ಫೆ. 17: 13 ವರ್ಸೊದ ಆಣ್ ಒರಿ ಒರಿಜಿನಲ್ ಬೆಡಿ ಪನ್ದ್ ಪಿನ್ಪಿಜ್ಜಂದೆ ಫೈರಿಂಗ್ ಮಲ್ತಿನೆರ್ದಾವರ 3 ವರ್ಸೊದ ಆಣ್ ಬಾಲೆ ತೀರ್ದಿನ ನಡಕೆ ಮಂಡ್ಯ ಜಿಲ್ಲೆ ನಾಗಮಂಗಲ ತಾಲೂಕ್‌ದ ದೊಂದೇಮಾದಿಹಳ್ಳಿ ಗ್ರಾಮೊಡು ನಡತ್‌ದ್ಂಡ್.
ಪಡ್ಡಾಯಿ ಬಂಗಾಳೊದಕುಲಾಯಿನ ಶಶಾಂಕ್ ಬೊಕ್ಕ ಲಿಪಿಕಾ ದಂಪತಿಲೆನ ಮಗೆ ಅಭಿಷೇಕ್(3) ತೀರ್ದಿನ ಬಾಲೆ. ಕಾಂಗ್ರೆಸ್ ಮುಖಂಡೆ ನರಸಿಂಹಮೂರ್ತಿ ಮೆರೆನ ಕೋರಿದ ಫಾರಂಡ್ ಕರಿನ ಕೆಲ ವರ್ಸೊರ್ದಿಂಚಿ ಈ ದಂಪತಿ ಬೇಲೆ ಮಲ್ತೊಂದಿತ್ತೆರ್. ದಂಪತಿಲೆನ್ ತಿಕ್ಯೆರೆ ಬಾವೆ ಶಂಕರ್ ದಾಸ್ ಬೊಕ್ಕ ಆರೆನ ಮಗೆ ಸುದೀಪ್ ದಾಸ್ ಬತ್ತಿತ್ತೆರ್. ಈ ಪೊರ್ತುಡು ಜೋಕುಲಿರ್ವೆರ್ ಗೊಬ್ಬೊಂದಿತ್ತೆರ್.
ಗೊಬ್ಬೊಂದುಪ್ಪುನಗ ಲೈಸೆನ್ಸ್ ಇತ್ತ್‌ದ್ ದೀವೊಂದಿತ್ತಿನ ನರಸಿಂಹಮೂರ್ತಿ ಮೆರೆನ ಬೆಡಿ ಸುದೀಪ್‌ನ ಕೈಕ್ ತಿಕ್ಕ್‌ದಿತ್ತ್‌ದ್, ಒರಿಜಿನಲ್ ಬೆಡಿ ಪನ್ದ್ ಪಿನ್ಪಿಜ್ಜಂದೆ ಫೈರಿಂಗ್ ಮಲ್ತ್‌ದೆ. ಅವೆತ ಗುಂಡು ಅಲ್ಪನೇ ಇತ್ತಿನ ಅಭಿಷೇಕ್‌ನ ಬಂಜಿದುಲಯಿ ಪೊಗ್ಗುದಿತ್ತ್‌ದ್, ಅಪ್ಪೆ ಲಿಪಿಕಾಗ್ಲಾ ಗಡಿಕುಲಾತ.
ಗಾತಿದ ಪೆಟ್ಟಾದಿತ್ತಿನ ಬಾಲೆನ್ ಅಪಗನೇ ನಾಗಮಂಗಲ ಆಸ್ಪತ್ರೆಗ್ ದಾಕಲ್ತ್‌ದಿತ್ತ್‌ದ್, ಮರ್ದ್ ಪಲಿಪಂದೆ ತೀರ್ದ್ಂಡ್. ಜಾಗೆಗ್ ಮಂಡ್ಯ ಎಸ್ಪಿ ಮಲ್ಲಿಕಾರ್ಜುನ ಬಾಲದಂಡಿ ಬತ್ತ್‌ದ್, ಪರಿಶೀಲನೆ ಮಲ್ದೆರ್. ಒಟ್ಟುಗು ನಾಗಮಂಗಲ ಗ್ರಾಮಾಂತರ ಪೊಲೀಸೆರ್ ಬೆಡಿನ್ ವಶೊಕು ಗೆತೊಂದು ಜಡ್ತೆ ಸುರು ಮಲ್ದೆರ್..