ಕುಡ್ಲ : ರಂಗೋತ್ಸವ ಸಾಂಸ್ಕೃತಿಕ ಪಂತೊದ ಪಟ್ಟಿರ್ದ್ ಭೂತಾರಾಧನೆನ್ ಗೆಪ್ಪೊಡು ಪನ್ದ್ ತುಳು ಅಕಾಡೆಮಿ ಗುರ್ಕಾರೆ ತಾರಾನಾಥ್ ಗಟ್ಟಿ ಆಗ್ರಹ

Last updated on February 21st, 2025 at 08:47 am

ಕುಡ್ಲ, ಫೆ.20: ಶಾಲೆಲೆಡ್ ನಡಪಾಯೆರ ಅಟ್ಟನೆ ಮಲ್ದಿನ ರಂಗೋತ್ಸವ ಕಾರ್ಯಕ್ರಮೊದ ಪಟ್ಟಿರ್ದ್ ಭೂತಾರಾಧನೆದ ಉಲ್ಲೇಖೊನು ಗೆಪ್ಪೊಡು ಪನ್ದ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಅಧ್ಯಕ್ಷೆ ತಾರಾನಾಥ್ ಗಟ್ಟಿ ಕಾಪಿಕಾಡ್ ಮೇರ್ ಯೋಜನಾ ನಿರ್ದೇಶಕೆರೆಗ್ ಓಲೆ ಬರೆದ್ ಒತ್ತಾಯ ಮಲ್ದೆರ್.

ವಿದ್ಯಾರ್ಥಿಲೆಡ ದೇಶೊದ ಬೇತೆ ಬೇತೆ ಕಲೆ ಬೊಕ್ಕ ಸಂಸ್ಕೃತಿದ ಬಗೆಟ್ ಅಭಿರುಚಿ ಉಂಡು ಮನ್ಪುನ ದಿಟ್ಟಿಡ್ ಅಟ್ಟನೆ ಮಲ್ದಿನ ರಂಗೋತ್ಸವ ಕಾರ್ಯಕ್ರಮ ಒಂಜಿ ಎಡ್ಡೇನ ಪರಿಕಲ್ಪನೆ ಆದುಂಡು. ರಂಗೋತ್ಸವಡ್ ಒವು ಮಾತ ಸಾಂಸ್ಕೃತಿಕ ಚಟುವಟಿಕೆಲೆನ್ ಮನ್ಪೊಲಿ ಪನ್ಪಿನ ಬಗೆಟ್ ಉದಾರ್ಮೆ ಕೊರ್ತಿನ ಪಟ್ಟಿಡ್ ಭೂತಾರಾಧನೆನ್ಲಾ ಉಲ್ಲೇಖ ಮಲ್ದಿನ ಇಲಾಖೆದ ಕ್ರಮ ಸಮ ಇಜ್ಜಿ ಪನ್ದ್ ಓಲೆಡ್ ಬರೆತೆರ್. ಈ ಸುತ್ತೋಲೆರ್ದ್ ಭೂತಾರಾಧನೆದ ಪುದರ್ ಗೆತ್ತ್‌ದ್ ಪೊಸ ಸುತ್ತೋಲೆನ್ ಪ್ರಕಟ ಮನ್ಪೆರ ಆಗ್ರಹ ಮಲ್ತ್‌ದೆರ್.

ಭೂತಾರಾಧನೆ ತುಳುನಾಡ್‌ದ ಅತ್ಯುನ್ನತ ಸಾಂಸ್ಕೃತಿಕ ಅಂಚೆನೇ ಆರಾಧನ ಪರಂಪರೆ ಆದುಂಡು. ಆಂಡ ಭೂತಾರಾಧನೆನ್ ಸಾಂಸ್ಕೃತಿಕ ಪಂತೊದ ಭಾಗ ಆದ್ ತೂಪುನ ಸಮ ಅತ್ತ್. ಆರಾಧನೆದ ಒಂಜಿ ಪ್ರಕಾರೊನು ಶಾಲೆಲೆನ ಪಂತೊದ ಮಿತ್ತರ್ಮೆಗ್ ಕನತಿನೇ ಆ ಜನೊಕ್ಲೆನ ನಂಬೊಲಿಗೆಗ್ ಪೆಟ್ಟಾಪುನ ಸಹಜ ಪನ್ದ್ ಆರ್ ಪನ್ತೆರ್. ಈ ದಿಸೆಟ್ ಇಲಾಖೆ ಇತ್ತೆನೇ ಒರ ಕಡಪುಡ್ದಿನ ಸುತ್ತೋಲೆನ್ ಪುನರ್ ಪರಿಶೀಲನೆ ಮಲ್ತ್‌ದ್ ಉದಾರ್ಮೆಗ್ ಕೊರ್ತಿನ ಸಾಂಸ್ಕೃತಿಕ ಕಾರ್ಯಕ್ರಮೊಲೆನ ಪಟ್ಟಿಡ್ ಉಲ್ಲೇಖ ಮಲ್ದಿನ ಭೂತಾರಾಧನೆದ ಪುದರ್ ಗೆಪ್ಪೆರ ಆಗ್ರಹ ಮಲ್ದೆರ್.