Last updated on February 21st, 2025 at 10:31 am
ಬೆಂಗಳೂರು, ಫೆ.21: ಜನೊಕುಲು ಇತ್ತೆನೇ ಅಗತ್ಯ ಸೊತ್ತುಲೆನ ಬಿಲೆ ಎಚ್ಚ ಆತಿನೆರ್ದಾವರ ಕಂಗಾಲಾತೆರ್, ಇತ್ತೆ ಕುಡಲಾತ್ ಕಾಸ್ದ ಒತ್ತಡ ತೂವೊಡಾತ್ಂಡ್. ಮಾ. 7ತಾನಿದ ರಾಜ್ಯ ಬಜೆಟ್ ಮಂಡನೆರ್ದ್ ಬೊಕ್ಕ ನಂದಿನಿ ಪೇರ್ದ ರೇಟ್ ₹5 ಎಚ್ಚ ಆವರೆ ಉಂಡು. ಪೇರ್ದ ಪ್ರಮಾಣ ಇತ್ತೆ ಪ್ರತಿ ಪ್ಯಾಕೆಟ್ಗ್ 1,050 ಎಂಎಲ್ರ್ದ್ ಪೂರ್ಣ ಲೀಟರ್ಗ್(1000ml) ಸಮ ಮಲ್ಪುಲೆಕ ದಿಂಜಾವೆರ್. ಉಂದೆರ್ದಾವರ ಒಂಜಿ ಲೀಟರ್ ನಂದಿನಿ ಟೋನ್ಡ್ ಪೇರ್ದ ಬಿಲೆ 47 ರೂಪಾಯಿಗ್ ಏರುಂಡು.
ಉಂದು ಕರಿನ ಮೂಜಿ ವರ್ಸೊಡು ಕರ್ನಾಟಕ ಪೇರ್ ಒಕ್ಕೂಟೊದ (ಕೆಎಂಎಫ್) ಗರಿಷ್ಠ ಬಿಲೆ ಎರ್ತೆ ಆದುಂಡು. ಉಂದೆಕ್ ದುಂಬು, 2022 ಟ್ ಪೇರ್ದ ಬಿಲೆನ್ ಪ್ರತಿ ಲೀಟರ್ಗ್ 3 ರೂ. 2024 ಟ್ ಕೆಎಂಎಫ್ ಪ್ರತಿ ಪ್ಯಾಕೆಟ್ಗ್ 2 ರೂಪಾಯಿದಾತ್ ಎಚ್ಚ ಮಲ್ತಿತ್ತ್ಂಡ್, ಒಟ್ಟುಗು ಪ್ರತಿ ಪ್ಯಾಕೆಟ್ಗಾ 50 ml ಪ್ರಮಾಣೊಲಾ ಎಚ್ಚ ಮಲ್ತಿತ್ತ್ಂಡ್.
ಕಾಫಿ ಬುಲೆಪಿನಕಲೆನ ಸಂಘ ಮಾರ್ಚ್ಗ್ ಕಾಫಿ ಪೊಡಿಕ್ ಪ್ರತಿ ಕೆಜಿಗ್ 200 ರೂಪಾಯಿದಾತ್ ಎಚ್ಚ ಮಲ್ಪುನ ಘೋಷಣೆ ಮಲ್ತಿನ ಬೆರಿಟೇ ಪೇರ್ದ ಬಿಲೆ ಎರ್ತೆ ಗ್ರಾಹಕೆರೆಗ್ ಕುಡೊಂಜಿ ಪೆಟ್ಟ್ ಪಾಡಿಲೆಕ ಆತ್ಂಡ್. ಅವೆತೊಟ್ಟುಗು, ಬಸ್ಸ್, ಮೆಟ್ರೋದ ಟಿಕೆಟ್ ರೇಟ್ಲ್ಲಾ ಎಚ್ಚ ಆತ.
ರಾಜ್ಯ ಸರ್ಕಾರ ನೀರ್ದ ರೇಟ್ ಏರ್ಪುನ ಪ್ರಕ್ರಿಯೆಡ್ ಉಂಡು. ಅವೆತ ನಡುಟು, ಬರ್ಪಿನ ಫೈನಾನ್ಶಿಯಲ್ ವರ್ಸೊಗು ಕರೆಂಟ್ದ ರೇಟ್ ಪ್ರತಿ ಯೂನಿಟ್ಗ್ 67 ಪೈಸೆ ಎಚ್ಚ ಮನ್ಪೆರ ಎಸ್ಕಾಂಲು ಕರ್ನಾಟಕ ವಿದ್ಯುತ್ ನಿಯಂತ್ರಣ ಆಯೋಗೊಗು ಕಾಯೆಸ್ ಮಲ್ತ್ದ.
ಪೆತ್ತ ತಾಂಕುನಕುಲು ಪ್ರತಿ ಲೀಟರ್ಗ್ 5 ರೂಪಾಯಿ ಎಚ್ಚ ಮನ್ಪೆರ ಒತ್ತಾಯ ಮಲ್ದೆರ್, ಆಂಡ ಅಕೇರಿದ ನಿರ್ಧಾರ ಮುಖ್ಯಮಂತ್ರಿಯೆರೆನ ಕೈಟ್ ಉಂಡು. ರಾಜ್ಯ ಬಜೆಟ್ರ್ದ್ ಬೊಕ್ಕ ಉಂದೆನ್ ಜಾರಿಗ್ ಕನಪ ಪನ್ದ್ ಕೆಎಂಎಫ್ ವ್ಯವಸ್ಥಾಪಕ ನಿರ್ದೇಶಕೆ ಬಿ. ಶಿವಸ್ವಾಮಿ ತೆರಿಪಾದೆರ್.