Last updated on February 21st, 2025 at 02:06 pm
ಪುತ್ತೂರು: ಬದಿಯಡ್ಕ ಪೊಲೀಸ್ ಸ್ಟೇಶನ್ ಸೀಮೆದ ನೀರ್ಚಾಲ್ ಪನ್ಪಿನಲ್ಪ ತಿಗಲೆ ಬೇನೆಗ್ ಮರ್ದ್ ಬೋಡು ಪನ್ದ್ ಕೇನೊಂದು ಆಯುರ್ವೇದ ಅಂಗಡಿಗ್ ಪೊಗ್ಗುದು ಅಲ್ಪದ ಪೊಂಜೊವುನ ಕೆಕ್ಕಿಲ್ಡ್ ಇತ್ತಿನ ಮೂಜರೆ ಪವನ್ ತೂಕೊದ ಕರಿಯಮಣಿನ್ ಲಕ್ಕಾದಿನ ಪ್ರಕರಣೊಗು ಸಂಬಂಧಿತ್ದ್ ಇರ್ವೆರ್ ಆರೋಪಿಲೆನ್ ಬದಿಯಡ್ಕ ಪೊಲೀಸೆರ್ ಪತ್ತ್ದೆರ್.
ಪುತ್ತೂರು ತಾಲೂಕ್ದ ಕುಂಜೂರು ಪಂಜ ನಿವಾಸಿ ಶಂಸುದ್ದೀನ್ ಅಸ್ಕರ್ ಅಲಿ(28.ವ), ಪುತ್ತೂರು ಬನ್ನೂರು ನಿವಾಸಿ ನೌಷಾದ್ ಬಿ.ಎ(37.ವ) ಕೈದಾತಿನ ಆರೋಪಿಲು. ಬದಿಯಡ್ಕ ಪೊಲೀಸೆರ್ ಮೊಕಲೆನ್ ಫೆ.20 ದಾನಿ ಬೆಂಗಳೂರ್ಡ್ ಪತ್ತ್ದೆರ್.
ಜ. 11 ತಾನಿ ಬಯ್ಯಡ್ ನೀರ್ಚಾಲ್ ಮಿತ್ತಪೇಂಟೆಡ್ ಈ ನಡಕೆ ನಡತಿತ್ತ್ಂಡ್. ಜೇನುಮೂಲೆ ದಿ. ಡಾ.ಶಂಕರನಾರಾಯಣ ಭಟ್ರೆನ ಬೊಡೆದಿ ಸರೋಜಿನಿ ಎಸ್.ಎನ್. ಮೆರೆನ ರಾಘವೇಂದ್ರ ಆಯುರ್ವೇದ ಮೆಡಿಕಲ್ ಡ್ ಕಲ್ವೆ ನಡತ್ದ್ಂಡ್. ಬೈಕ್ಡ್ ಇರ್ವೆರ್ ಜವನೆರ್ ಬತ್ತಿತ್ತ್ದ್, ಒರಿ ಬೈಕ್ಡೇ ಕುಲ್ಲುದು, ಕುಡೊರಿಯನ್ ಮೆಡಿಕಲ್ಗ್ ಕಡಪುಡ್ದೆ. ಆಯೆ ಉಲಯಿ ಬತ್ತ್ದ್ ತಿಗಲೆ ಬೇನೆಗ್ ಮರ್ದ್ ಬೋಡು ಪನ್ದ್ ಕೇನ್ದೆಗೆ. ಮರ್ದ್ ಕೊರೊಂದುಪ್ಪುನಗ ಜವನೆ ಸರೋಜಿನಿ ಮೆರೆನ ಕೆಕ್ಕಿಲ್ಡಿತ್ತಿನ ಮೂಜರೆ ಪವನ್ ತೂಕೊದ ಬಂಗಾರ್ದ ಕರಿಮಣಿ ಒಯ್ತ್ದ್ ಬೈಕ್ ಬರ್ತೊಂದು ಇರ್ವೆರ್ಲಾ ಪದ್ರಾಡಾತೆರ್.
ಈ ಬಗೆಟ್ ಬದಿಯಡ್ಕ ಪೊಲೀಸೆರ್ ಕೇಸ್ ದಾಕಲ್ತ್ದ್ ಜಡ್ತೆ ಸುರು ಮಲ್ತಿತ್ತೆರ್. ಬೇತೆ ಬೇತೆ ಸಿಸಿ ಟಿ.ವಿ ಕ್ಯಾಮರಾ, ಸೈಬರ್ ಮುಕೇನ ಜಡ್ತೆ ಮಲ್ತ್ದ್ ಆರೋಪಿಲೆನ್ ಪತ್ತ್ದೆರ್. ಕಂಡ್ದಿನ ಬಂಗಾರ್ನ್ ಕುಡ್ಲದ ಬಂಗಾರ್ದ ಕಟ್ಟೆ ಒಂಜೆಕ್ ಮಾರ್ದಿತ್ತ್ದ್, ಇತ್ತೆ ವಶೊಕು ಗೆತೊಂದೆರ್. ಕಾಸ್ರೋಡ್ ಡಿವೈಎಸ್ಪಿ ಸುನಿಲ್ಕುಮಾರ್ ಮೆರೆನ ಆದೇಶದಂಚ ಬದಿಯಡ್ಕ ಸಿ.ಐ.ಸುಬೀರ್, ಎಸ್.ಐ.ನಿಖಿಲ್, ಮುಹಮ್ಮದ್, ಪ್ರಸಾದ್, ಶ್ರೀನೇಶ್ ಮೊಕುಲು ಮಾತ ಕಾರ್ಯಾಚರಣೆಡ್ ಇತ್ತೆರ್.