Last updated on February 26th, 2025 at 11:30 am
ಒಡಿಪು: ತುಳುನಾಡ್‌ಡೇ ದೈವಾರಾಧನೆಗೆ ಅಪಮಾನ ಆಪಿನಂಚಿನ ನಡಕೆ ನೆಲ್ಲಿಕಟ್ಟೆ ಪನ್ಪಿನಲ್ಪ ನಡತಿತ್ತ್ಂಡ್. ನೆಲ್ಲಿಕಟ್ಟೆಡ್ ಮೆರವಣಿಗೆ ಒಂಜೆಟ್ ಕೊರಗಜ್ಜೆ, ಬಬ್ಬು ಸ್ವಾಮಿ, ತನ್ನಿಮಾನಿಗ ದೈವದ ಏಸ ಪಾಡೊಂದು ಒಂತೆ ಜನ ಪಾಲ್‌ಪಡೆದಿತ್ತೆರ್. ಈತ್ ದಿನ ಗಟ್ಟದ ಆಮೆಯಿಟ್ ದೈವಾರಾಧನೆಗ್ ಅಪಮಾನ ಆವೊಂದುಂಡು ಪನ್ದ್ ನಮ ವಿರೋಧ ಮಲ್ತೊಂದಿತ್ತ. ಇತ್ತೆ ನಮ್ಮ ತುಳುನಾಡ ಒಡಿಪುಡೇ ಇಂಚ ದೈವೊಲೆಗ್, ದೈವಾರಾಧನೆಗ್ ಅಪಮಾನ ಆವೊಂದುಪ್ಪುನ ಇಸಯಡ್ ಬಾರೀ ಚರ್ಚೆ ಉಂಡಾದಿತ್ತ್ಂಡ್. ಸಾಮಾಜಿಕ ಬಲೆತ್ತಾನೊಡು ದೈವೊದ ಏಸ ಪಾಡಿನಕ್ಲೆನ ಮಿತ್ತ್ ಬಾರೀ ಆಕ್ರೋಶ ತೋಜಿದ್ ಬತ್ತಿತ್ತ್ಂಡ್.
ಈ ದಿಸೆಟ್ ಅಖಿಲ ಭಾರತ ದೈವಾರಾಧಕೆರೆ ಒಕ್ಕೂಟ ಕೇಂದ್ರೀಯ (ರಿ ) ಒಡಿಪು ಜಿಲ್ಲೆ ಬೊಕ್ಕ ಪಾಣಾರ ಯಾನೆ ನಲಿಕೆ ಸಂಘ ಒಡಿಪು ಜಿಲ್ಲೆ
ಮೊಕಲೆನ ಮುತಾಲಿಕೆಡ್ ನೆಲ್ಲಿಕಟ್ಟೆದ ಬಬ್ಬುಸ್ವಾಮಿ ದೈವಸ್ಥಾನೊಡು ಒಟ್ಟು ಮಾತೆರ್ಲಾ ಸೇರ್ದ್, ಸುಕ್ರಾರ ನಡತಿನ ಇಸಯೊದ ಬಗೆಟ್ ಆಕ್ರೋಶ ತೂಪಾಯೆರ್.
ಬೊಕ್ಕ ಪಾತೆರ್ನ ಮೆರವಣಿಗೆದ ಆಯೋಜಕೆರ್, ಆಡಳಿತ ಮಂಡಳಿ ಉಂದು ಎಂಕ್ಲು ಬೋಡು ಬೋಡೂಂದು ಅಪಚಾರ ಮಲ್ಪೊಡೂಂದು ಮಲ್ದಿನ ಅತ್ತ್, ಎಂಕುಲ್ಲಾ ದೈವ ದೇವೆರೆ ಮಿತ್ತ್ ಭಕ್ತಿ ಇತ್ತಿನಕುಲು. ಎಂಕ್ಲು ಮಲ್ತಿನೆಟ್ ತಪ್ಪು ಇಪ್ಪು, ಉಂದೆರ್ದಾವರ ಏರೆಗ್ ಬೇಜಾರ್ ಆದಿತ್ತ್ಂಡಲಾ ಎಂಕ್ಲು ದೈವೊದ ಎದುರು ಮಾಪು ನಟ್ಟೊಂದುಲ್ಲ ಪನ್ದ್ ಪನ್ಡೆರ್.
ನನ ದುಂಬಗ್ ಇಂಚ ಆವಂದಿಲೆಕ ತೂವೊನುವ, ಕಲಾವಿದೆರ್ ಎಂಕುಲು ಪನ್ಡಿನೆಕ್ ಏಸ ಪಾಡ್ದೆರ್, ಅಕ್ಲೃನ ದಾಲ ತಪ್ಪು ಇಜ್ಜಿ, ಮಾತೆರೆನ್ಲಾ ಮನ್ನಿಪೊಡು ಪನ್ದ್ ಪನ್ಡೆರ್.
ಈ ಪೊರ್ತುಡು ಅಖಿಲ ಭಾರತ ದೈವರಾಧಕೆರೆ ಒಕ್ಕೂಟ ಕೇಂದ್ರಿಯ (ರಿ ) ಒಡಿಪು ಜಿಲ್ಲೆ ಉಂದೆತ ಅಧ್ಯಕ್ಷೆ ವಿನೋದ್ ಶೆಟ್ಟಿ, ಪಾಣಾರ ಸಂಘೊದ ಜಿಲ್ಲಾಧ್ಯಕ್ಷೆ ಪಾಂಡುರಂಗ ಪಾಣಾರ, ಒಕ್ಕೂಟದ ಕಾರ್ಯದರ್ಶಿ ದಿನೇಶ್ ಪೂಜಾರಿ ಪಾಣಾರ, ಸಂಘೊದ ಕಾರ್ಯದರ್ಶಿ ಸುಕೇಶ್, ಒಕ್ಕೂಟದ ಉಪಾಧ್ಯಕ್ಷೆ ಸುಧಾಕರ ಪಾಣಾರ, ದೈವಾರಾಧನೆ ಸಮಿತಿದ ಅಧ್ಯಕ್ಷೆ ಸುರೇಶ್ ನಿಂಜೂರು, ತಾಲೂಕು ಒಕ್ಕೂಟದ ಕಾರ್ಯದರ್ಶಿ ದಿನೇಶ್ ಪಾಣಾರ, ಒಕ್ಕೂಟೊದ ಪದುಕೆರ್ ರಮೇಶ್ ಪೂಜಾರಿ, ಕೃಷ್ಣ ಪೂಜಾರಿ, ಬಾಲಕೃಷ್ಣ ಪೂಜಾರಿ, ನೀಲೇಶ್ ಪೂಜಾರಿ, ಒಕ್ಕೂಟದ ಜತೆ ಕಾರ್ಯದರ್ಶಿ ಶ್ಯಾಮ್, ಶ್ರೀನಿವಾಸ್, ರವಿ, ಗಣೇಶ್, ಜಯ ಪಾತ್ರಿ ಒಕ್ಕೂಟದ ಪದುಕೆರ್ ಅಂಚೆನೇ ಪಾಣಾರ ಸಂಘೊದ ಪದುಕೆರ್ ಒತ್ತುಪಾಲ್ ಇತ್ತೆರ್. ಅಂಚೆನೇ ಆಡಳಿತ ಮಂಡಳಿದ ಅಧ್ಯಕ್ಷೆ ಶೇಖರ್ ಪೂಜಾರಿ ಬೊಕ್ಕ ಆಡಳಿತ ಮಂಡಳಿದ ಮಾತಾ ಪದುಕೆರ್‌ಲಾ ಇತ್ತೆರ್.
