Last updated on February 27th, 2025 at 09:24 am
ಕುಂಭಮೇಳೊಗು ಪೋದು ಬತ್ತಿತ್ತ್‌ದ್, ಕೋಡೆ ಶಿವರಾತ್ರೆದ ಲೆಕ್ಕೊಡು ಇಶಾ ಫೌಂಡೇಶನ್‌ಗ್ ಪೋತಿನೆತ ಬಗೆಟ್ ತನ್ನ ವಿರುದ್ಧ ಬರೊಂದುಪ್ಪುನ ಟೀಕೆಲೆಗ್ ಡಿಸಿಎಂ ಡಿಕೆ ಶಿವಕುಮಾರ್ ಪ್ರತಿಕ್ರಿಯೆ ಕೊರ್ತೆರ್. ಯಾನ್ ಹಿಂದೂ ಆದ್ ಪುಟ್ಟುದೆ, ಹಿಂದೂ ಆದೇ ಸೈಪೆ ಪನ್ದ್ ಡಿಕೆ ಶಿವಕುಮಾರ್ ಕಾರ್ ಒಯಾಪುನಕ್ಲೆಗ್ ಖಾರದ ಟಾಂಗ್ ಕೊರ್ತೆರ್.
ಸದಾಶಿವನಗರೊಡು ಪತ್ರಿಕಾಗೋಷ್ಠಿಡ್ ಪಾತೆರ್ನ ಡಿಕೆ ಶಿವಕುಮಾರ್, ಯಾನ್ ಕುಂಭಮೇಳೊಡು ಪಾಲ್‌ಪಡೆತಿನ ಎನ್ನ ನಂಬಿಕೆ, ಯಾನ್ ಹಿಂದೂ ಆದ್ ಪುಟ್ಟುದೆ, ಹಿಂದೂ ಆದೇ ಸೈಪೆ. ಆಂಡ ಮಾತಾ ಧರ್ಮದ ಬಗೆಟ್ ಗೌರವ ದೀವೊಂದೆ ಪನ್ದ್ ಪನ್ಡೆರ್.
ಉಂದೇ ಪೊರ್ತುಡು ಮಹಾಕುಂಭಮೇಳೊದ ಅಟ್ಟನೆದ ಬಗೆಟ್ಲಾ ಪಾತೆರ್ದ್ ಪುಗರ್ದಿನ ಡಿಕೆ ಶಿವಕುಮಾರ್, ಕುಂಭ ಮೇಳೊಡು ಎಡ್ಡೆ ಅನುಭವ ಆತ್ಂಡ್. ಬಾರೀ ಎಡ್ಡೆ ವ್ಯವಸ್ಥೆ ಮಲ್ದೆರ್ ಪನ್ದ್ ಎಡ್ಡೆಪುದ ಪಾತೆರ ಪನ್ಡೆರ್. ಕುಂಭಮೇಳ ವಿಷಯೊನು ರಾಜಕೀಯ ಮನ್ಪುನೆನ್ ವಿರೋಧಿಪುನ ಮುಕೇನ ತನ್ನನೇ ಪಕ್ಷೊದಕುಲೆಗ್ ಟಾಂಗ್ ಕೊರ್ತೆರ್. ಕುಂಭಮೇಳೊಗು ಪೋತಿನೆಕ್ ಯಾನ್ ಬಿಜೆಪಿಗ್ ಮುಟ್ಟ ಆವೋಂದುಲ್ಲೆ ಪನ್ದ್ ಕೆಲ ಮಾಧ್ಯಮೊಲು, ಸಾಮಾಜಿಕ ಮಾಧ್ಯಮೊಲೆಡ್ ವರದಿ ಆವೊಂದುಂಡು. ಯಾನ್ ಪುಟ್ಟುನಗನೇ ಕಾಂಗ್ರೆಸ್ಸಿಗೆ. ಕುಂಭ ಮೇಳೊಗು ಪೋಪುನ ಎನ್ನ ನಂಬಿಕೆ, ಬಿಜೆಪಿದ ಆರೋಪೊಲೆನ್ ಸೀರಿಯಸ್ ಆದ್ ಗೆತೊನೊರ್ಚಿ ಪನ್ದ್ ಪನ್ಡೆರ್.
