Last updated on February 27th, 2025 at 10:13 am
ಬಜಪೆ ಗ್ರಾಮೊದ ನೆಲ್ಲಿದಡಿಗುತ್ತುದ ದೈವ ಕಾಂತೇರಿ ಜುಮಾದಿ ಸಾನೊಗು ಪೋದು ನಿಚ್ಚೊದ ಪೂನೀರ್ ದೀಪಿನೆಕ್ ಅವಕಾಶೊನು ನಿರಾಕರಿಪುನ ಮುಕೇನ MSEZ(ಮಂಗಳೂರು ಸ್ಪೆಷಲ್ ಎಕಾನಮಿಕ್ ಜೋನ್) ತುಳುನಾಡ್‌ದ ಆಸ್ಮಿತೆ, ನಂಬೊಲಿಗೆದ ಮಿತ್ತ್ ಸವಾರಿ ಮಲ್ಪೆರೆ ಪಿದಡ್ದ್ಂಡ್.
ಮಂಗಳೂರು ಎಸ್‌ಇಝೆಡ್‌ ಕಂಪೆನಿ ಭೂ ಸ್ವಾಧೀನದ ಪೊರ್ತುಡು ನೆಲ್ಲಿದಡಿ ಗುತ್ತುದ 22 ಇಲ್ಲ್‌ಲೆನ ಅಡಿಲಕ್ಕಾಯೆರ ಒಪ್ಯಾವುನ ಸಭೆಟ್ ದೈವೊಲೆಗ್ ನಿಚ್ಚೊಲಾ ಪೂನೀರ್, ಸಂಕ್ರಾಂತಿ, ಪರ್ಬ, ಚೌತಿ, ಅಸ್ಟೆಮಿ, ಮಾರಿ, ಬಂಡಿ, ಚಾವಡಿ ನೇಮ, ಪದಿನಾಜಿ ಗೋಡ್ಯಾವುನ ಇಂಚಿನ ಕಾರ್ಯಕ್ರಮ ಅಂಚೆನೇ ಬೇತೆ ಬೇಲೆಲೆನ್ ಮನ್ಪೆರ ಅವಕಾಶ ಕೊರ್ಪ ಪನ್ದ್ ಪಾತೆರ ಕೊರ್ದಿತ್ತ್ಂಡ್. 2016ತ ಡಿಸೆಂಬರ್‌ಡ್ ಜಿಲ್ಲಾಧಿಕಾರಿನ ಅಧ್ಯಕ್ಷತೆಡ್ ನಡತಿನ ಸಭೆಟ್ಲಾ ಉಂದೇ ತೀರ್ಮಾನೊಗು ಬತ್ತಿತ್ತೆರ್.
ನೆಲ್ಲಿದಡಿಗುತ್ತು ಬೊಕ್ಕ ಊರುದಕ್ಲು MSEZ ಅಧಿಕಾರಿಲೆಗ್ ಒಲವು ಕೊರ್ದು, ಬೊಕ್ಕ ದೈವಸಾನೊಗು ಪೋದು ಚಾಕಿರಿಲೆನ್ ಮಲ್ತೊಂದು ಬರೊಂದಿತ್ತೆರ್. ಆಂಡ ಫೆ.12ತಾನಿ ತಿಂಗೊಲ್ದ ಸಂಕ್ರಾಂತಿ ಕರಿಪೆರ ಬಿನ್ನಪುದೋಲೆ ಕೊರ್ನಗ ಉಂದು ಅಕೇರಿದ ಅವಕಾಶ, ನನ ದುಂಬಗ್ ಆರಾಧನೆಗ್ ಅವಕಾಶ ಇಪ್ಪುಜಿ ಪನ್ದ್ MSEZ ಅಧಿಕಾರಿಲು ಪನ್ತೆರ್.
ಪೂನೀರ್ ದೀದ್ ಬಾಕಿ ಕಟ್ಟ್‌ಕಟ್ಲೆಲೆನ್ ಕರಿಪೆರೆ ಅವಕಾಶ ಮಲ್ತ್ ಕೊರ್ಯೆರ ಜನಪ್ರತಿನಿಧಿಲೆಗ್ ದೂರು ಕೊರ್ತುಂಡು. ವಿಧಾನಸಭೆ ಸ್ಪೀಕರ್‌ ಯು.ಟಿ. ಖಾದರ್‌, ಶಾಸಕೆ ಡಾ. ಭರತ್‌ ಶೆಟ್ಟಿ ಮೊಕುಲು SEZ ಅಧಿಕಾರಿಲೆಡ ಪಾತೆರ್ದ್, ದೈವಾರಾಧನೆಗ್ ಅವಕಾಶ ಕೊರ್ಯೆರ ಕ್ರಮ ಗೆತೊನೆರ ಸೂಚನೆ ಕೊರ್ತೆರ್.
800 ವರ್ಸೊದ ಪರತಿರಿ ಇಪ್ಪುನ ನೆಲ್ಲಿದಡಿ ಗುತ್ತು ಬೊಕ್ಕ ಕಾಂತೇರಿ ಜಮಾದಿ ದೈವಸಾನೊದ ಜಾಗೆನ್ ದೈವೊದ ಪುದರ್‌ಡ್ ರೆಜಿಸ್ಟರ್ ಮನ್ಪೊಡು. ಈ ದೈವಸಾನೊಗು ಒಂಜಿ ಬೇತೆನೇ ಸಾದಿ ಮಲ್ತ್ ಕೊರೊಡು ಪನ್ಪಿನವು ಊರುದಕ್ಲೆನ ಕಾಯೆಸ್. ಈ ಬಗೆಟ್ ಕೇಂದ್ರ ಬೊಕ್ಕ ರಾಜ್ಯ ಸರಕಾರೊಗು ಬಿನ್ನಪು ಮಲ್ತ್‌ದೆರ್.
ಈ ಭೂಮಿನ್ 2006ಟ್ SEZ ಗ್ ಸ್ವಾಧೀನ ಮಲ್ತೊನರೆ ನೋಟಿಸ್‌ ಜಾರಿಮಲ್ತಿತ್ತೆರ್. ಜಾಗೆ ಕೊರ್ಪುಜ ಪನ್ದ್ ಊರುದಕುಲು ಬೊಕ್ಕ ನೆಲ್ಲಿದಡಿ ಗುತ್ತುದ ಜನ ಪೊರ್ಮ್ಬಾಟ ಮಲ್ತೆರ್. ಕಡೆಕ್ ಬಲತ್ಕಾರಡ್ ಭೂ ಸ್ವಾಧೀನ ಮಲ್ತೊಂಡೆರ್. ನೆಲ್ಲಿದಡಿ ಗುತ್ತುದ ಜನ ಪರಿಹಾರ ಗೆತೊಂಡಿಜೆರ್. ಸರಕಾರ ಪರಿಹಾರದ ಕಾಸ್ 3.2 ಕೋಟಿ ರೂ. ನ್ಯಾಯಂತಡೆಡ್ ಡೆಪಾಸಿಟ್ ದೀದ್ ಭೂ ಸ್ವಾಧೀನ ಪ್ರಕ್ರಿಯೆ ಪೂರ್ಣ ಮಲ್ತ್ಂಡ್.
ನೆಲ್ಲಿಗಡಿಗುತ್ತುದ ದೈವೊಲೆನ್ ಬೇತೆ ಕಡೆಕ್ ಕೊನೊಪುನ ಪುನೆಪು ಪಾಕ ಸರ್ತಿ ನಡತ್ಂಡಲಾ, ವಿಫಲ ಆಂಡ್. ಕಡೆಕ್ ಎಸ್‌ಇಝೆಡ್‌ದ ಅಪಗದ ಅಧಿಕಾರಿಲು ದೈವೊದ ಎದುರು ನಟ್ಟ್‌ನಗ , ಎನ್ನ ಸಾನಿಧ್ಯೊನು ಕೊನೊಪುಂಡ ಎನ್ನ ತೀರ್ಥೊದ ಗೂವೆಲ್‌ನ್ಲಾ ಕೊನೊಲೆ ಪನ್ದ್ ದೈವ ಪನ್ದಿತ್ತ್ಂಡ್. ಬೊಕ್ಕ ಜಿಲ್ಲಾಧಿಕಾರಿ ಅಧ್ಯಕ್ಷತೆಡ್ 2016ಟ್ ನಡತಿನ ಸಭೆಟ್ ದೈವಸಾನೊದ ಸೇವೆ ಮನ್ಪೆರ ವಿಶೇಷ ಅವಕಾಶೊನು ಶಾಶ್ವತವಾದ್ ಕೊರ್ಯೆರ ಆದೇಶ ಮಲ್ತಿತ್ತೆರ್. ಅಂಚಾದ್ ಇದಮುಟ್ಟ ಸಾನೊಡು ಪೂನೀರ್ ದೀವೊಂದು, ಸಂಕ್ರಾಂತಿ ಕರಿತೊಂದು ಬರೊಂದುಲ್ಲೆರ್.
ಕರಿನ ಸಂಕ್ರಾಂತಿ ಕರಿಪುನ ಪೊರ್ತುಡು ಕಂಪೆನಿ ದೈವೊದ ಸೇವೆ ಮನ್ಪೆರ ಉಲಯಿ ಪೋವಂದಿಲೆಕ ನಿಷೇಧ ಮಲ್ದ್ಂಡ್. ತುಳುನಾಡ್‌ದ ಬಾರೀ ಪುಗರ್ತೆದ ದೈವಸ್ಥಾನೊಡು ದೈವೊಗು ಪೂನೀರ್ ದೀಯೆರ ಮೂಜಿನೆದಾಯನ ಅನು ನಟ್ಟುನ ಸ್ಥಿತಿ ಬೈದ್ಂಡ್. ಇತ್ತೆ ಈ ನೆಲ್ಲಿದಡಿಗುತ್ತುದ ಅಸ್ಮಿತೆ ಅಸ್ತಿತ್ವದ ಪೊರ್ಮ್ಬಾಟೊಗು ತುಳುವೆರಾಯಿನ ನಮ ಮಾತಾ ಕೈಗೋಡ್ಯಾವೊಡು ಪನ್ದ್ ನೆಲ್ಲಿದಡಿಗುತ್ತುದ ಧನರಾಜ್ ಶೆಟ್ಟಿ ಪನ್ಡೆರ್.