Last updated on September 19th, 2022 at 08:41 am
ತುಳು ಪಂಡ ಕಾಲಿ ಒಂಜಿ ಬಾಸೆ ಅತ್ತ್, ತುಳು ಪಂಡ ಒಂಜಿ ಪರಪೋಕು. ಅಪಗಾಂಡ ಬಾಸೆಗ್ಲಾ ಪರಪೋಕುಗ್ಲಾ ಧರ್ಮೊಗ್ಲಾ ಉಪ್ಪುನ ಸಂಬಂದೊ ಎಂಚಿನ? ಪರಪೋಕು ಒಂಜಿ ನೆಲಮೂಲೊದ ನಂಬೊಲಿಗೆ, ತುಳುವೆರೊನ ನೆಲಮೂಲೊದ ಜಲಮೂಲೊದ ನಂಬೊಲಿಗೆಗ್ ತಮೆರಿ ದಾದ ಪನ್ದ್ ಕೇಂಡ ಅವ್ ನಮ್ಮ ಬಾಸೆ. ಬಾಸೆ ಪರಪೋಕುಗು ತಮೆರಿ ಎಂಚ ಆಪುಂಡು? ಮಾನಿ ಕಾಡ್ ಬುಡ್ದ್ ನಾಡ್ ಗ್ ಬತ್ತಿನೆ ಸುರುಟು ಪರಪೋಕು ಉಂಡಾಂಡಾ ಬಾಸೆ ಉಂಡಾಂಡಾ ಪನ್ದ್ ಗೆರೆಪುನಗ, ಅವ್ ಬಾಸೆ ಪನ್ದ್ ತೆರಿದ್ ಬರ್ಪುಂಡು. ದುಂಬಗ್ ಈ ಬಾಸೆದ ಒರುಟು ಅವ್ವವ್ವೇ ಜಾಗೊಲೆಡ್ ಪರಪೋಕುಲು ಉದಿತ್ ಬತ್ತ್ಂಡ್. ಅಂಚಾದುಪ್ಪುನಗ ಬಾಸೆನೇ ಪರಪೋಕುಗು ತಮೆರಿ ಅತ್ತೇ?
ಬಾಸೆ ಒರಿಯ್ಜಿಡ ಪರಪೋಕು ಒರಿಯುಜಿ. ಪರಪೋಕು ದಾಂತಿನ ಧರ್ಮೋ ಅವ್ ಧರ್ಮನೇ ಅತ್ತ್. ಧರ್ಮ ಪನ್ಪಿನವು ನಮ ಬದುಕುನ ರೀತಿ ನೀತಿ ರಿವಾಜುಲು. ತುಳುವೆರ್ ಬದುಕುನ ರಿವಾಜುಲು ಎಂಚ? ಅಪ್ಪೆ ಕಟ್ಟ್, ಮೂಲ ಆಲಡೆ, ಬರಿ ಬಂದ್ರ ನಾಗೆ, ತರವಾಡ ದೈವೊಲು, ಪದಿನಾಜಿ ಕಟ್ಟ್, ಉಂದು ನಮ್ಮ ರಿವಾಜುಲು. ಪುಟ್ಟುಗೊಂಜಿ ಅಮೆ ಸೈತಿಬೊಕ್ಕೊಂಜಿ ಕರ, ಅಪ್ಪೆ ತಮ್ಮಲೆ ತಮೆರಿ, ಕುಟುಮೊಗೊಂಜಿ ಪಂಜುರ್ಲಿ ಉಂದು ತುಳುವೆರೆನ ರೀತಿ. ಅಪಗಾಂಡ ನಮ್ಮ ಬದುಕುನ ರೀತಿ ರಿವಾಜೇ ನಮ್ಮ ಧರ್ಮ ಅತ್ತೋ? ತುಳುರ್ದ್ ಮಿತ್ತ್ ದ ಧರ್ಮೊ ಉಂಡೊ ನಮಕ್?
ಪರಪುನ ತುದೆಕ್ ಕಟ್ಟ ಕಟ್ಟ್ ಡ್ ಉಂತಾಂಡ, ಒಂಜತ್ತ್ ಒಂಜಿ ದಿನ ಎರ್ತೆ ಬನ್ನಗ ಅವ್ ತಮೆಲಂದೆ ಕುಲ್ಲಾ? ಸಂಸ್ಕೃತಿದ ಪುದರ್ ಡ್ ಇನಿ ಬಾಸೆನ್ ಕೋಂಟುಗು ಎತ್ತಾಂಡ ಅಂಚಿನ ಪರಪೋಕು ಒರಿವಾ? ಮೂಲ ನೆಲತ ಧರ್ಮೊ ಬೊಕ್ಕ ಸಾವರ್ತಿಕ ಧರ್ಮೊನು ತುಳುವೆರ್ ಸರಿಯಾದ್ ಅರ್ಥ ಮಲ್ತೊನೊಡು. ಒವ್ ದೇವಲ್ಯೊಡು ಉಪ್ಪೊಡ ಅವ್ ಅಲ್ಪನೇ ಉಪ್ಪೊಡು ಒವ್ ಸಾನ ಮಾಡೊಲೆಡ್ ಉಪ್ಪೊಡಾ ಅವ್ ಅಲ್ಪೊನೇ ಉಪ್ಪೊಡು. ಒಲ್ಪ ಪೂತ ಪೂಜೆ, ಪೇರ್ ಬೊಂಡ ಅಭಿಷೇಕ ಆವೊಡ ಅಲ್ಪನೇ ಆಂಡ ಎಡ್ಡೆ. ಒಲ್ಪ ತಂಬಿಲ ಅಗೆಲ್ ಪೂ ನೀರ್ ಪಾಡೊಡಾ ಅಲ್ಪನೇ ಅವೆನ್ ಪಾಡೊಡು. ಉಂದೆನ್ ಪಗವುನವು ನೆಲಮೂಲೊದ ಪರಪೋಕು ಪನ್ಪಿ ತುದೆನ್ ಸಾರ್ವತ್ರಿಕ ಪರಪೋಕು ಪನ್ಪಿ ಕಡಲ್ಡ್ ಗೋಡ್ಯಾಯಿ ಲೆಕ್ಕ. ಒರ ಗೋಡ್ಯಿಂಡ ಬೊಕ್ಕ ತುದೆಕ್ ಅಸ್ತಿತ್ವ ಇಜ್ಜಿ.
ತುಳುಬಾಸೆ ದಾಂತೆ ತುಳುವ ನುಡಿಕಟ್ಟ್ ಉಂಡೊ? ತುಳು ಬಾಸೆ ದಾಂತೆ ತುಳುವ ದೈವೊಲು ಮದಿಪೊ? ತುಳು ಬಾಸೆದ ಲೆಪ್ಪು ದಾಂತೆ ತುಳುವ ಕುಲೆ ಪದಿನಾಜೆಕ್ಕ್ ಗೋಡ್ಯೊ? ತುಳುಬಾಸೆ ದಾಂತೆ ತುಳುನಾಡ್ ಉಂಡೊ? ನಮ್ಮ ರಂಗ್ ಕೇಪುಲ, ನಮ್ಮ ಕೊಡಿ ಕೇಪುಲ, ನಮ್ಮ ಉಡಲ್ ಡ್ ಉಪ್ಪುನು ತಿಂಗೊಲುಲಾ ಪೊರ್ತು ದೇವೆರ್ಲಾ. ಸಾರ ಕೊಡಿ ರಾಪಾಯಿನಲ್ಪ ಒಂಜಾಂಡಲಾ ತುಳುವ ಕೊಡಿ ಉಪ್ಪಡ್. ನೂದು ಬಾಸೆ ಪಾತೆರುನಲ್ಪ ತುಳುತ ಪಾಡ್ದನ ಕೇನಡ್. ಉಂದು ನಮ್ಮ ಧರ್ಮ, ಉಂದುವೇ ನಮ್ಮ ಧರ್ಮ.