ಉಪ್ಪರಿಗೆಡ್ ಅಡೆಂಗಿನ ಉಲ್ಲಾಲ್ದಿನ ಕಿರುವಾಳ್..

Last updated on February 28th, 2025 at 06:46 pm

ಒಂಜಿ ಕಾಲೊಡು ಚವಲಬೇಪಾಯಿ ಕಲ್ಲ ಮಾಡೊಡು, ನೆತ್ತರಿನ್ನ ವರ್ಣೊದ ಮುಗೊಟು, ಸೂರ್ಯ ತೇಜಿದ ಕಿರುವಾಳುಡ್, ಮುಗುರಿನ್ನ ಮಲ್ಲಿಗೆದ ಪೂಮುಡಿಟ್, ಮಾಮಲ್ಲ ವೈಭವದ ನೇಮೊಚ್ಚಯ, ಕೆರೆ ತುಡರಬಲಿ, ವಲಸರಿ ಒಳಕ್ಕೊಂದು ಮೆರೆಯೊಂದಿತ್ತೆರ್ಗೆ ಪಟ್ಟೋರಿದ ಉಲ್ಲಾಲ್ದಿ. ಆಂಡ ಕಾಲ ಮಗ್ರುದ್ ಪೋನಗ ಮಣ್ಣ್ ತುಚ್ಚಿಂಡ್ ದೈವ ಮಾಡ. ಆ ವೇಳ್ಯೆಡ್ ಭಂಡಾರ ಕಿರುವಾಳ್ ಸರ್ವಲಾ ನೀರಗುಂಡಿಗ್ ಸರಿ ಆಂಡ್.

ನನ ಕುಡೊರ ಈ ಮಾಮಲ್ಲ ಉಚ್ಚಯನ್ ನಡಪಾವೊಡುಂದು ಇಂದೆತ ಬಗೆಟ್ ಊರಜನಮಂದೆಲು ಬೇಲೆ ಬೆನ್ಪಿನತ ಇಡೆಟ್ ಕೊಣಾಜೆ ಬೂಡು ಪನ್ಪಿ ಪಟ್ಟೋರಿದ ಮಾಮಲ್ಲ ಮಡಸ್ಥಾನೊದ ಇಲ್ಲ ಚಾವಡಿದ ಮೇಲುಪ್ಪರಿಗೆದ ಕುತ್ತಟ್ಟೊದ ಮೂಲೆಡ್ ಕಿರುವಾಳ್ ದಂಚಿನ ಕಡ್ಸಲೆ ಒಂಜಿ ತೋಜಿನೆಟ್ಟ್ ಐನ ಪೊರ್ಲು ತೂಯೆರೆಗ್ ಊರು ಸೇರೊನ್ನ ಪೊರ್ತು. ಆ ಕರ್ಬನ್ನ ಕಡ್ಸಲೆದ ಮೈಯ್ಯಿನ್ನ ರೂಪೊಡು ಬುಡ್ಪಯಿ ದೇಕಿಲ, ಒರ್ಪೊರ್ತುಡು ಜೋಡು ಬಿರೆಲೆ ಪೊಗ್ಗುನಾತ್ ಉಪ್ಪಿನ ಕೈತ ಪತ್ತ್, ಸಪುರ ಒರುಟು ಉದ್ದ ಆಯೊದ ಈ ಕಡ್ಸಲೆ ಅಂದಾಜಿ ಐನೂದು ಕಾಲೊರ್ದ್ಲ ಪಿರಾಕ್ದ ಸತ್ಯಂದ್ ತೆರಿದ್ ಉಂದು ಕಾಲೊಡು ಅಪ್ಪೆ ಉಲ್ಲಾಲ್ದಿನ ಭಂಡಾರ ಸೊತ್ತುಲೆಡ್ ಒರಿನ ಪಟ್ಟದ ಕಡ್ಸಲೆ ಆದಿಪ್ಪುಂದ್ ತೆರಿನಕ್ಲೆ ಪಾತೆರೊಡು ಗೊಂತುಗು ಬತ್ತ್ಂಡ್. ಏನಿಗ್ ಈ ಮಣ್ಣುಡ್ ಉಲ್ಲಾಲ್ದಿ ಅಪ್ಪೆ ಇತ್ತೆರಿನ್ಪಿನೆಕ್ ನನೊಂಜಿ ಸಾಕ್ಷಿ ಆದ್ ನೆಗತ್ಂಡ್ ಈ ಸೂರ್ಯ ತೇಜಿದ ಕಿರುವಾಳ್.‌. ನನಲಾ ಆ ಸತ್ಯೊಲೆ ಚಿತ್ತಡ್ ಒವು ಪುಂಚರ್ದ್  ಒವು ಮರಿ ಲಕ್ಕು ಪನ್ಪಿ ಸರ್ವಲಾ ಆ ಬೆಮ್ಮೆರ್ ಧರ್ಮರಸು ಉಲ್ಲಾಲ್ದಿನ ಚಿತ್ತ…

ಇನಿಕ್ ಊರು ಕೂಡೊಂದು ಮಂದೆ ಸೇರೊಂದು ಅಪ್ಪೆ ಉಲ್ಲಾಲ್ದಿನ ಧರ್ಮಮೆಚ್ಚಿನ್ ಪೆರಪ್ಪ ನಡಪಾವೊಡುಂದು ಬಲ್ಯಾಯ ಬಲ್ಮೆಡ್ ಸಾರಿ ಪಾಡ್ದ್ ಕಟ್ಟ್ ಕಟ್ಲೆಲೆನ್ ತೆರಿಯೊಂದು, ತಂತ್ರಿಲು ದೀಯಿ ದಿನಮಾನದಂಚ ಸುಗ್ಗಿಡ್ ನಾಲ್ ಪೋಪುನಾನಿ [18-03-2025] ಒರಿ ಧರ್ಮರಸುಲೆಗ್  ಒರಿ ಬಂಟಜಾವದೆ ಅರಸುಲೆಗ್ ಸಿರಿಮುಡಿಟ್ ಕಂಚಿಮಿಂಚದ ನೇಮಲ, ಅಪ್ಪೆ ಉಲ್ಲಾಲ್ದಿ ನಡಿರ್ಲ ಭದ್ರಕಾಳಿ ಜಾಮೊಡು ಪೂಮುಡಿಟ್ ಕೆರೆನೇಮ, ವಲಸರಿದ ಪೊರ್ಲು ನಡಪರೆ ನಿಚ್ಚಯ ಮಲ್ತುದೆರ್‌.‌ಉಂದು ನಮ್ಮ ಕಣ್ಣ ಭಾಗ್ಯಂದ್ ಎನ್ಯೊಂದು ಬಲೆ ಈ ಪೊರ್ಲ ಕೂಟೊಡು ಭಕ್ತಿದೊಟ್ಟು ಪಾಲ್ ಪಡೆಯೊನ್ಗ..

✍️ವಿಜೇತ್ ಎಂ ಶೆಟ್ಟಿ ಮಂಜನಾಡಿ