Last updated on March 1st, 2025 at 08:40 am
ಕುಡ್ಲ , ಫೆ.28: ಸೆಕೆಂಡ್ ಪಿ.ಯು.ಸಿ ಪರೀಕ್ಷೆ ಮಾರ್ಚ್ 1 ರ್ದ್ 20 ಮುಟ್ಟ ನಡಪರೆ ಇತ್ತ್‌ದ್, ಪರೀಕ್ಷಾ ಕೇಂದ್ರೊಲೆಡ್ ಕಾನೂನು ಬಾಹಿರ ಬೇಲೆಲು, ಅತ್ತಂದಿ ನಡಕೆಲು ನಡಪಂದಿಲೆಕ ಪರೀಕ್ಷೆಲೆನ್ ಶಾಂತಿಯುತವಾದ್ ಅಂಚೆನೇ ದಾಲ ಎಚ್ಚಿ ಕಮ್ಮಿ ಆವಂದಿಲೆಕ ನಡಪಾವುನ ದಿಟ್ಟಿಡ್ ಕುಡ್ಲ ಜಿಲ್ಲೆದ ಪರೀಕ್ಷಾ ಕೇಂದ್ರೊಲೆನ ಸುತ್ತಮುತ್ತದ 200 ಮೀಟರ್ ಜಾಗೆನ್ ನಿಷೇಧಿತ ಪ್ರದೇಶ ಪನ್ದ್ ಘೋಷಣೆ ಮಲ್ತ್‌ದ್ ನಿಷೇಧಾಜ್ಞೆ ಜಾರಿಮಲ್ತ್‌ದ್ ಜಿಲ್ಲಾಧಿಕಾರಿ ಮುಲ್ಲೈ ಮುಗಿಲನ್ ಎಂ.ಪಿ ಬೊಕ್ಕ ಉಪ ಪೋಲಿಸ್ ಆಯುಕ್ತೆ ಸಿದ್ದಾರ್ಥ್ ಗೋಯಲ್ ಆದೇಶ ಮಲ್ದೆರ್.
ಕುಡ್ಲ ಪೋಲಿಸ್ ಕಮಿಷನರೇಟ್ ಸೀಮೆದ 30 ಪರೀಕ್ಷಾ ಕೇಂದ್ರೊಲೆಡ್ ಅಂಚೆನೇ ಜಿಲ್ಲಾ ಪೋಲಿಸ್ ಸೀಮೆದ 25 ಪರೀಕ್ಷಾ ಕೇಂದ್ರೊಲೆಡ್ ನಿಷೇಧಾಜ್ಞೆ ಜಾರಿಮಲ್ದ್ಂಡ್. ನಿಷೇಧಿತ ಜಾಗೆಡ್ ಒವ್ವೇ ರೀತಿಡ್ ಪರೀಕ್ಷೆಡ್ ಕಾಪಿ ಮನ್ಪೆರ ಸಕಾಯ ಮನ್ಪುನು, ಚೀಟಿ ಅತ್ತ್ಂಡ ಬೇತೆ ರೀತಿಡ್ ಉತ್ತರ ಬರೆದ್ ಪಟ್ಟುನು ಅತ್ತ್ಂಡ ಬೇತೆ ಒವ್ವೇ ಸೊತ್ತುನು ಪಟ್ಟುನು/ ಕಡಪುಡುನೆನ್ ಅಲಕ್ಕ ನಿಷೇಧ ಮಲ್ದ್ಂಡ್.
ನಿಷೇಧಿತ ಜಾಗೆಡ್ ಒವ್ವೇ ರೀತಿದ ಸ್ಫೋಟಕ ಸೊತ್ತುನು ಪತೊಂದು ಪೋಪುನು ಅಂಚೆನೇ ಬೇತೆ ಮಾರಕ ಕೈದ್‌ಲೆನ್ ಪತೊನುನೆನ್ ನಿಷೇಧ ಮಲ್ದ್ಂಡ್.
ಪರೀಕ್ಷೆದ ದಿನತಾನಿ ಪರೀಕ್ಷೆ ಮುಗಿಪುನೇಟ ಪರೀಕ್ಷಾ ಕೇಂದ್ರೊದ ಸುತ್ತಮುತ್ತದ ಜೆರಾಕ್ಸ್ ಬೊಕ್ಕ ಕಂಪ್ಯೂಟರ್/ಸೈಬರ್ ಅಂಗಡಿಲೆನ್ ಬಂದ್ ಮನ್ಪೆರ ಪನ್ತೆರ್.
ಈ ನಿಷೇಧಾಜ್ಞೆ ಜಾರಿಡುಪ್ಪುನ ಜಾಗೆಡ್ ಸರಕಾರೊದ ಆದೇಶದಂಚ ನಡಪುನ ಒವ್ವೇ ಕಾರ್ಯಕ್ರಮ, ಸಭೆ ಸಮಾರಂಭೊಲೆಗ್ ಅನ್ವಯ ಆಪುಜಿ. ಬ್ಯಾಂಕ್ ಭದ್ರತಾ ಸಿಬ್ಬಂದಿಲು ಬೇಲೆದ ಪೊರ್ತುಡು ಲಾಠಿ /ಶಸ್ತ್ರಾಸ್ತ್ರ ಗಲಸುನೆಕ್ ಅನ್ವಯ ಆಪುಜಿ ಪನ್ದ್ ಜಿಲ್ಲಾಧಿಕಾರಿ ಅಕಚೆನೇ ಜಿಲ್ಲಾ ಡಂಡಾಧಿಕಾರಿ ಮುಲ್ಲೈ ಮುಗಿಲನ್ ಎಂ.ಪಿ ತೆರಿಪಾದೆರ್.