Last updated on March 12th, 2025 at 08:02 am
ಸುಳ್ಯ: ಕನಕಮಜಲ್‌ಡ್ ಅಂಗಡಿ ಕಲ್ವೆ ಮಲ್ತೊಂದುಪ್ಪುನಗನೇ ಇರ್ವೆರ್ ಕಲ್ವೆರೆನ್ ಊರುದಕುಲು ಪತ್ತ್‌ದ್, ವಿಚಾರಿತ್‌ದ್ ಪೋಲೀಸೆರೆಗ್ ಒಪ್ಯಾದಿನ ನಡಕೆ ವರದಿಯಾತ್ಂಡ್.
ಕನಕಮಜಲ್ ಗ್ರಾಮೊದ ನರಿಯೂರು ಸೀತಾರಾಮ ಗೌಡ್ರೆಗ್ ಸೇರ್ದಿನ ಕಟ್ವಾನೊಡು ಧನಂಜಯ ಪನ್ಪಿನಾರೆನ ಶ್ರೀ ಗಣೇಶ್ ಸ್ಟೋರ್‌ದ ಉಲಯಿ ರಾತ್ರೆ ಸುಮಾರ್ 3.30 ತ್ತ ಅಂದಾಜಿಗ್ ಜೋರ್ ಶಬ್ದ ಕೇನೊಂದಿತ್ತ್ಂಡ್. ಸೀತಾರಾಮ ಗೌಡ್ರೆನ ಮಗೆ ಶಬ್ದ ಕೇನ್ದ್ ಅಂಗಡಿದ ಕೈತಡೆ ಬತ್ತ್‌ದ್ ತೂನಗ, ಎದುರು ಒಂಜಿ ರಿಟ್ಸ್ ಕಾರ್ ಇತ್ತ್ಂಡ್, ಅಂಗಡಿದ ಶಟರ್‌ ಓಪನ್ ಇತ್ತ್ಂಡ್‌ಗೆ. ಅಪಗನೇ ಆರ್ ಇಲ್ಲದಕ್ಲೆಗ್ ಅಂಚೆನೇ ಕನಕಮಜಲ್ ಊರುದಕ್ಲೆಗ್ ಈ ವಿಷಯ ತೆರಿಪಾದೆರ್.
ಅಂಗಡಿದ ಎದುರು ಜನ ಸೇರ್ದ್ ಅಂಗಡಿದ ಎದುರು ಉಂತುದಿತ್ತಿನ ಅಂಚೆನೇ ಅಂಗಡಿದ ಉಲಯಿ ಕಂಡೊಂದಿತ್ತಿನ ಕಲ್ವನ್ ಪತ್ತ್‌ದೆರ್. ವಿಚಾರಿಪುನಗ ಬಂಟ್ವಾಳದ ಸಜೀಪ ಮೂಲೊದ ಸುಹೈಲ್ ಬೊಕ್ಕ ರಿಯಾಜ್ ಪನ್ದ್ ಗುರ್ತ ಪನ್ತೆರ್. ಇರ್ವೆರ್ ಬಾಡಾಯಿದ ಕಾರ್‌ಡ್ ಬತ್ತಿತ್ತೆರ್ ಪನ್ದ್ ತೆರಿದ್ ಬೈದ್ಂಡ್.
ಅವೆರ್ದ್ ಬೊಕ್ಕ ಆ ಇರ್ವೆರ್ ಕಲ್ವೆರೆನ್ ಊರುದಕುಲು ಪೋಲೀಸೆರೆಗ್ ಒಪ್ಯಾದೆರ್.
ಕನಕಮಜಲ್ ಪರಿಸರೊಡು ಇಂಚಿಪ ಕೆಲ ವರ್ಷಸೊರ್ದಿಂಚಿ ಕೆಲವು ಕಲ್ವೆ ಪ್ರಕರಣೊಲು ನಡತಿತ್ತ. ಆಂಡ ಕಲ್ವೆರ್ ಇದಮುಟ್ಟ ತಿಕ್ಕ್‌ದಿಜ್ಜಂಡ್. ಇತ್ತೆ ರೆಡ್ ಹ್ಯಾಂಡಾದ್ ಊರುದಕುಲೇ ಸೇರ್ದ್ ಕಲ್ವೆರೆನ್ ಪತ್ತ್‌ದೆರ್.
ಕನಕಮಜಲ್ ಅಂಗಡಿ ಕಂಡೆರೆ ದುಂಬು ಮೊಕುಲಿರ್ವೆರ್ ಕಾವು ಡ್ ಒಂಜಿ ಅಂಗಡಿ ಕಂಡ್‌ದ್ ಬತ್ತ್‌ದೆರ್‌ಗೆ.