Last updated on March 18th, 2025 at 07:47 pm
ಬೆಂಗಳೂರು: ಎಂಇಎಸ್‌‌ದ ಉಪದ್ರೊನು ಅಂಕೆಗ್ ಕನವೊಡು, ಬೇತೆ ಬೇತೆ ಕ್ಷೇತ್ರೊಲೆಡ್ ಕನ್ನಡೆರೆಗ್ ಬೇಲೆ ಕೊರೊಡು, ಕನ್ನಡೆರೆ ಮಿತ್ತ್ ಬೇತೆ ಭಾಷೆದಕ್ಲೆನ ದಾಳಿ ಉಂತೊಡು- ಇಂಚ ಪಾಕ ಕಾಯೆಸ್‌ಲೆನ್ ದೀದ್ ಬರ್ಪಿನ ಮಾ.22ತಾನಿ ಕರ್ನಾಟಕ ಬಂದ್‌ (Karnataka Bandh) ಮನ್ಪುವ ಪನ್ದ್ ಕನ್ನಡಪರ ಪೊರ್ಮ್ಬಾಟಗಾರೆ ವಾಟಾಳ್ ನಾಗರಾಜ್ ಘೋಷಣೆ ಮಲ್ದೆರ್.
ಕರ್ನಾಟಕ ಬಂದ್‌ಗ್ ಸಂಬಂಧಿಸಿತ್‌ದ್ ಬೆಂಗಳೂರುದ ಖಾಸಗಿ ಹೋಟೆಲ್‌ಡ್ ಇನಿ ಇನಯ ನಡತ್ಂಡ್. ಪಾಕ ಕನ್ನಡಪರ ಸಂಘಟನೆದ ಮುಖಂಡೆರ್ ಪಾಲ್‌ಗೆತೊಂದಿತ್ತೆರ್. ಬೊಕ್ಕ ಸುದ್ದಿಗೋಷ್ಠಿ ಮಲ್ತ್‌ದ್ ಪಾತೆರ್ನ ವಾಟಾಳ್ ನಾಗರಾಜ್, ಆನಿ ಕಾಂಡೆ 6ರ್ದ್ ಬಯ್ಯ 6 ಮುಟ್ಟಲಾ ಕರ್ನಾಟಕ ಬಂದ್‌ ಮಲ್ಪುವ. ಕಾಂಡೆ 10:30ಕ್ಕ್ ಟೌನ್‌ಹಾಲ್‌ರ್ದ್ ಫ್ರೀಡಂ ಪಾರ್ಕ್ ಮುಟ್ಟ ಪ್ರತಿಭಟನಾ ಮೆರವಣಿಗೆ ಮಲ್ಪುವ ಪನ್ದ್ ಪನ್ಡೆರ್.
ರಾಜ್ಯೊಡು ದಿನೊರ್ದು ದಿನ ಕನ್ನಡೆರೆ ಮಿತ್ತ್ ಬೇತೆ ಭಾಷೆದಕಲೆನ ದಾಳಿ ಎಚ್ಚ ಆವೊಂದುಂಡು. ಬೆಂಗಳೂರು, ಬೆಳಗಾವಿಡ್ ಕನ್ನಡೆರೆ ಮಿತ್ತ್ ಹಲ್ಲೆ ಆವೊಂದುಂಡು. ಬಿಹಾರ, ಬಂಗಾಳ, ತಮಿಳು, ತೆಲುಗು, ಮಾರ್ವಾಡಿದಕುಲು ರಾಜ್ಯೊಡು ಸುಮಾರ್ 2 ಕೋಟಿ ಜನ ಉಲ್ಲೆರ್. ತರೆ ಗೀಸುನೆರ್ದ್ ಪತ್ತ್‌ದ್ ಪಾನಿಪುರಿ ಮಾರುನಕ್ಲ್‌ಲಾ ಬೇತೆ ರಾಜ್ಯೊದಕುಲು. ಉಂದೆನ್ ಮಾತ ಕೇನುನಕುಲು ಏರ್? ಮೊಕಲೆನ ಮಿತ್ತ್ ಸರ್ಕಾರ ನಿರ್ದಾಕ್ಷಿಣ್ಯ ಕ್ರಮ ಗೆತೊನೊಡು ಪನ್ದ್ ಒತ್ತಾಯ ಮಲ್ತೆರ್.
ಆತೇ ಅತ್ತಂದೆ ಎಂಇಎಸ್, ಶಿವಸೇನೆನ್ ನಿಷೇಧ ಭಲ್ಪೊಡು. ಬೆಳಗಾವಿ ಎಂಕ್ಲೆನವು. ಬೆಳಗಾವಿಡ್ ಶಿವಾಜಿ, ಸಂಭಾಜಿ ಒರು ಬೋಡಾ? ಪನ್ದ್ ಕೇನ್ಡೆರ್.
ಬೊಕಲಾ ಪಾತೆರ್ದ್… ಶಿವಾಜಿನ ಜೀವನ ಚರಿತ್ರೆದ ಪಿಚ್ಚರ್‌ಡ್ ನಟನೆ ಮನ್ಪೆರೆ ಒತ್ತೊಂದಿನ ನಟೆ, ನಿರ್ದೇಶಕೆ ರಿಷಬ್ ಶೆಟ್ಟಿಗ್ ವಾಟಾಳ್ ನಾಗರಾಜ್ ಪರೋಕ್ಷ ವಾರ್ನಿಂಗ್ ಕೊರ್ತೆರ್. ಕಾಂತಾರ ಚಿತ್ರೊದ ನಟೆ ‘ಛತ್ರಪತಿ ಶಿವಾಜಿ’ ಸಿನಿಮಾ ಮನ್ಪೆರ ಪಿದಡ್ದೆರ್. ಆರ್ ಪಿಚ್ಚರ್ ಮನ್ಪೆರೆ ಬಲ್ಲಿ, ಶಿವಾಜಿ ಚಿತ್ರ ಬತ್ತ್ಂಡ ಬಹಿಷ್ಕಾರ ಮಲ್ಪುವ ಪನ್ದ್ ರಿಷಬ್ ಶೆಟ್ಟಿ ಪುದರ್ ಪನಂದೆ ವಾರ್ನಿಂಗ್ ಕೊರ್ತೆರ್.