Last updated on March 27th, 2025 at 11:32 am
ಪುತ್ತೂರು, ಮಾ. 27: ಕುಡ್ಲರ್ದ್ ಬೆಂಗಳೂರ್‌ಗ್ ಪೋವೊಂದಿತ್ತಿನ ರೈಲ್‌ರ್ದ್ ಜವನೆ ಒರಿ ಬೂರ್ದ್ 15 ಗಂಟೆ ಕರಿದ್ ತಿಕ್ಕಿನ ನಡಕೆ ಸವಣೂರ್‌ಡ್ ನಡತ್‌ದ್ಂಡ್.
ಮಾ 25ತಾನಿ ರೈಲ್‌ಡ್ ಕುಮಟಾರ್ದ್ ಕುಡ್ಲ ಆದ್ ಬೆಂಗಳೂರ್‌ಗ್ ಪೋವೊಂದಿತ್ತಿನ ಉದಯ ಕುಮಾರ್ ರಾತ್ರೆ 11 ಗಂಟೆದ ಅಂದಾಜಿಗ್ ಸವಣೂರುದ ಕೈತಲ್ ಸುಣ್ಣಾಜೆ ದಲ್ಪ ರೈಲ್‌ರ್ದ್ ಬೂರ್ದೆರ್. ಉಂದು ಜನದಾಂತಿನ ಜಪ್ಪಂಗೆಲ್ ಜಾಗೆ. ಬೂರಿನಲ್ಪರ್ದ್ 25 ಫೀಟ್‌ದಾತ್ ತಿರ್ತ್ ಜಾರೊಂದು ಪೋದಿತ್ತಿನ ಜವನೆ ಅಲ್ಪನೇ ಮೋರಿದ ಬರಿಟ್ ಜೆತ್ತಿನ ಸ್ಥಿತಿಟೇ ಬಾಕಿಯಾದಿತ್ತೆರ್. ರಾತ್ರೆ ಜವನೆ ರೈಲ್‌ರ್ದ್ ಬೂರುನೆನ್ ಬೇತೆ ಪ್ರಯಾಣಿಕೆರ್ ತೂದಿತ್ತ್‌ದ್ ನೆಟ್ಟಣ ಎತ್ತಿನೇ ರೈಲ್ವೆ ಮಾಸ್ಟರ್ ಗುಮನೊಗು ಕನತ್‌ದೆರ್. ಆಂಡ ಜವನೆ ಬೂರ್ದಿನ ಜಾಗೆ ಒವ್ವು ಪನ್ದ್ ಏರೆಗ್ಲಾ ತೆರಿದಿಜ್ಜಂಡ್. ಅಂಚಾದ್ ನಾಡ್ಯೆರ ಆತಿಜಿ.
ಮಾ.26ತಾನಿ ಸುಣ್ಣಾಜೆ ಡ್ ಬೋರ್‌ವೆಲ್ ಪಂಪ್ ಒಯ್ಪೆರ ಪೋದಿತ್ತಿನ ದಿನೇಶ್ ಆಚಾರ್ಯ, ಸಂತೋಷ್ ಅಲೆಕ್ಕಾಡಿ ಪ್ರತಾಪ್ ಪರಣೆ ಮೊಕಲೆಗ್ ಮೋರಿದ ಕೈತಲ್ ಏರೋ ನರಕ್ಕುನ ಶಬ್ದ ಕೇನ್ದ್‌ನ್ಡ್. ಅಪಗನೇ ಈ ವಿಚಾರೊನು ಸಾಮಾಜಿಕ ಕಾರ್ಯಕರ್ತೆ ಸಚಿನ್ ಸವಣೂರು ಮೆರೆಗ್ ತೆರಿಪಾದೆರ್. ಆರ್ ಅಡೆ ಬತ್ತ್‌ದ್ ಜವನನ್ ನಾಡ್ದ್ ಆರೈಕೆ ಮಲ್ತ್‌ದ್ ವಿಚಾರಿಪುನಗ, ಆಯೆ ಕುಮಟಾರ್ದ್ ಬೆಂಗಳೂರ್‌ಗ್ ಪೋವೊಂದಿತ್ತಿನ ಬಗೆಟ್ ತೆರಿಂಡ್.
ಬೊಕ್ಕ ಪೊಲೀಸೆರೆ ಸೂಚನೆದ ಪ್ರಕಾರ ಜವನನ್ ಆ್ಯಂಬುಲೆನ್ಸ್‌ಡ್ ಕುಡ್ಲದ ಆಸ್ಪತ್ರೆಗ್ ದಾಕಲ್ತ್‌ದೆರ್. ಜವನನ ಮೋನೆ ಬೊಕ್ಕ ಕಾರ್‌ಗ್ ಗಾತಿದ ಗಡಿಕುಲಾತ.